Qazaq kúresinen Belorýsıa eliniń bas qalasy Mınskide ótip jatqan álem chempıonatynyń fınaldyq beldesýine shyqqan balýandar anyqtaldy. Islam Ábishev basqaratyn Dúnıejúzilik qazaq kúresi federasıasynyń jetinshi ret ótkizip jatqan álem chempıonatyna 45 elden balýandar qatysty. Erler arasyndaǵy saıys asa tartysty ótti.

60 keli salmaqta  VII álem chempıonatynyń altyn medeline qazaqstandyq Jaqsylyq Musyrmanov pen mońǵol balýany  Enhbol Enhtaıban talasady. Ekeýi de jıyrmadan endi asqan balýandar.

70 keli salmaqta Armenıa balýany Albert Mhıtrán men reseılik Álı Tursynov fınalda kúresedi.

80 kelide álem chempıonatynyń altyn medalin tájikstandyq  Hamroz Radjabov pen  Belorýsıa balýany Vadım Shoka beldesedi.

90 keli salmaqta qazaqstandyq Erlan Omarov pen reseılik Aleksandr Roslákov toqaılasty.

90 keliden aýyr salmaqta Belarýs alyby, qazaq kúresinen buǵan deıin de álem chempıonaty qatysyp, beldesip kórgen Aleksandr Vahavák pen qazaqstandyq  Talǵat Ámirenov álem chempıony ataǵyna talasady.

"Birikken kúresi áleminiń" (UWW)  kúntizbelik josparyna saı ótkizilip otyrǵan jetinshi álem chempıonatyna qatysýshy elder talantty balýandaryn ákep saldy. Oǵan biz irikteý beldesýlerinde kózimizdi jetkizdik. Úndistannan kelgen balýandar, Afrıka qurlyǵynan kelgen sportshylar qazaq kúresin ájeptáýir meńgerip qalǵanyn baıqatty. Azıa men Eýropa qurlyǵynan, Brazılıadan kelgender de sheberlikterin pash etip kúresti.   

Búgin qyzdar 2 salmaq dárejesinde álem chempıonaty ataǵyna talasady. Sondaı-aq erler de (80 keliden joǵary balýandar) absolúttik salmaqta medal úshin kúresedi.

Qýanysh Bajaq,

Belorýsıa, Mınsk.