Reseı Federasıasynyń syrtqy ister mınıstri Sergeı Lavrov ótken aptadaǵy Qazaqstanǵa jasaǵan resmı saparynda QR Prezıdentiniń ákimshiligi basshysynyń birinshi orynbasary Marat Tájınge «Dostyq ordenin» tabys etti. Ol Astanaǵa Máskeý memlekettik halyqaralyq qatynastar ınstıtýty (MMHQI) túlekteriniń IV halyqaralyq forýmyna kelgen. Forýmǵa kelgen túlekterdi Prezıdent Nazarbaev ta Aqordada qabyldaǵan bolatyn.
Qazaqstanǵa Reseı men Qazaqstan arasyndaǵy dıplomatıalyq qarym-qatynas ornaǵanyna 25 jyl tolýyna oraı kelgen Lavrovtyń Qazaqstannyń Reseıdegi eks-elshisi Tájınge orden syılaǵany BAQ betinde dabyra bolǵan joq.
«Dostyq ordeni» - Reseı Federasıasynyń memlekettik syılyǵy. Bul orden Reseı prezıdentiniń 1994 jyly 2 mamyrynan № 442 jarlyǵymen bekitilgen. «Dostyq ordenimen» Reseı Federasıasynyń azamattary marapattalady, oǵan qosa, bul orden sheteldik memleketterdiń dostyq pen tynyshtyqty, memleketter arasyndaǵy túsinistikti, ulttar arasyndaǵy tyǵyz mádenı, dostyq qarym-qatynasty ornatýǵa baǵyttalǵan erekshe isteri úshin beriledi.
Lavrovtyń Qazaqstanǵa sapary qarsańynda Reseıdegi BAQ betterinde «Marat Tájın — Qazaqstannyń patrıoty jáne Reseı Federasıasynyń dosy» atty maqala da jaryq kórdi. Qamshy.kz maqalanyń aýdarmasyn oqyrman nazaryna usynady.
«Fılosofıa jáne áleýmettaný ǵylymdarynyń kandıdaty, ekonomıs, áleýmettanýshy jáne saıasatker – osynyń barlyǵy memleket qaıratkeri Marat Tájınniń boıynda bar. Jumys babyn biletin, tájirıbesi mol, óz isiniń mamany bolǵan Tájın basqa da tańdaýly saıasatkerlerden oq boıy ozyq turady.
Alaıda, basqa da saıasatkerlermen salystyrǵanda Tájın BAQ-qa óte sırek suhbat berip, kóleńkede qalatyn kezderi bolady. Sonymen, Marat Tájın kim? Onyń Qazaqstan úshin róli qandaı?
Marat Tájınniń saıasat mansabyna jetý joly 1992 jyly Qazaqstannyń prezıdent apparaty jáne mınıstrler kabınetiniń ishki saıası basqarma bóliminiń birinshi orynbasary bolyp taǵaıyndalǵan kezinen bastalady. Joǵary mansapty sheneýnikter qataryna qosylǵan Marat Muhanbetqazyuly árdaıym basqarýshy saıasatkerler qatarynda bolyp, joǵarǵy laýazymnan túsken emes.
Ol 2001 jyly Ulttyq qaýipsizdik Komıtetin jáne 2007-2009 jyldary QR Syrtqy ister mınıstrligin basqarǵan, oǵan qosa 2013-2014-ke deıin memlekettik hatshy bolsa, 2014-2017 jyldar arasynda Qazaqstannyń Reseıdegi elshisi bolǵan.
Ótken ǵasyrdyń toqsanynshy jyldary Marat Tájın prezıdent apparatyn aqparattyq-saraptamalyq qyzmetpen qamtamasyz etip otyrǵan. Tájınniń syrtqy saıası alańda jáne elimizdiń ishki máselerinde kóptegen bastamasyn elbasy Nursultan Ábishuly árdaıym qoldap otyrǵan. Eki myńynshy jyldardyń basyndaǵy daǵdarystan shyǵýda da Tájın jáne onyń kómekshileri talmaı eńbek etip, qıyn-qystaý kezeńnen shyǵýǵa múmkindik jasady.»
