Elbasy memlekettik tildi latyn qarpine kóshirý jónindegi jobany iske asyrý úshin qurylǵan jumys tobynyń múshelerimen kezdesti, dep habarlaıdy Qamshy.kz aqparat agenttigi Aqordaǵa silteme jasap.

Jıynda Memleket basshysyna qoǵamdyq talqylaýlar barysynda kelip túsken usynystardy eskere otyryp ázirlengen qazaq tiliniń latyn qarpine negizdelgen biryńǵaı standartynyń jobasy usynyldy.

Qazaqstan Prezıdenti memlekettik tildi reformalaý rýhanı jańǵyrý baǵdarlamasy aıasyndaǵy mańyzdy máselelerdiń biri ekenin atap ótti.

 «Osy kúnderi qazaq tiliniń jańa álipbıine qatysty másele belsendi talqylandy. Kóptegen adamdar atsalysty. Qazaq tilin latyn álipbıine kóshirý týraly ıdeıa táýelsizdik alǵan jyldary týǵan. Bul másele meniń qatań baqylaýymda bolatyn», - dedi Nursultan Nazarbaev.

Sonymen qatar, Memleket basshysy qazaq tiliniń latyn álipbıine kóshý prosesiniń tarıhı mańyzyn eskerip, atalmysh másele boıynsha úılesimdi sheshimge kelý kerektigin málimdedi.

«Birde bir el óziniń jańa álipbıin qoǵam talqysyna salǵan emes. Biz úshin ár adamnyń oıy mańyzdy. Prezıdent ákimshiligine latyn álipbıine kóshý týrasynda 300-ge jýyq usynys tústi. Jastar da bul proseske belsene atsalysty», – dep atap ótti Qazaqstan prezıdenti.

Nursultan Nazarbaev óz kezeginde qazaq tiliniń jańa álipbıine qatysty jobasyn talqylaýda atsalysqan qoǵamdyq birlestikter men ǵylymı ortanyń belsendiligine basa nazar aýdardy.

Kezdesý barysynda atqarylǵan jumystardyń nátıjesi týraly Memleket basshysyna Ahmet Baıtursynov atyndaǵy Til bilimi ınstıtýtynyń jetekshisi E. Qajybek, Sh. Shaıahmetov atyndaǵy tilderdi damytý ortalyǵynyń respýblıkalyq úılestirý-ádistemelik ortalyǵynyń dırektory E. Tileshov baıandady.

Jıynǵa qatysýshylardyń baıandamalaryn tyńdaǵan Memleket basshysy kóńil aýdararlyq mańyzdy máselelerdi umytpaý kerektigin eskertti.

«Jalpy, atqarylyp jatqan jumystardyń negizgi baǵyttaryn qoldaımyn. Jobany iske asyrý barysynda álemdik tájirıbe eskerildi. Bul óte mańyzdy. Sonymen birge, qazaq álipbıin latyn qarpine kóshirý úderisine qatysty aqparattyq-túsindirý jumystaryn jalǵastyrý qajet», – dedi Memleket basshysy.

Qazaqstan Prezıdenti bul reforma basqa tilderdiń damýyna nuqsan keltirmeı, azamattardyń quqyqtaryn buzbaýǵa tıis ekenine erekshe toqtaldy.

«Qazaq tiliniń latyn qarpine kóshýi orys tildi azamattardyń quqyqtaryn, orys tili men basqa da tilderdiń múmkindikterin shektemeıdi. Orys tiliniń kırıll qarpinde qoldanylýy ózgerissiz qalady. Ol burynǵydaı qyzmet atqara beretin bolady. Jańa álipbıge kóshý qazaq tilin meńgerýdi jeńildetedi», – dedi Nursultan Nazarbaev.

Elbasy latyn qarpine kóshý kúrdeli úderis ekenin, sondaı-aq onyń maqsaty tilimizdi damytý jáne ony álemdik aqparattyq keńistikke shyǵarý úshin jaǵdaı jasaý bolyp tabylatynyn atap ótti.

Budan bólek, Memleket basshysy jańa álipbıdi bilim berý júıesine engizý úshin muǵalimder men ádistemelik bazany daıyndaý qajettigin aıtyp, Úkimetke ony kezeń-kezeńimen engizý jónindegi jospar ázirleýdi tapsyrdy.

Sońynda Nursultan Nazarbaev qazaq álipbıin reformalaýǵa qoldaý bildirip, ony iske asyrýǵa belsendi atsalysqan barsha qazaqstandyqtarǵa, ǵalymdar men tiltanýshylarǵa alǵys aıtty.