Qazaqstandyq erejesiz jekpe-jek sheberi "Suńqar" atymen tanylǵan Arman Ospanov Máskeýde ótken ASV 77 týrnırinde reseılik sportshy Aleksandr Polpýdnıkovten tóreshiler sheshimi boıynsha jeńildi, - dep habarlaıdy Qamshy.kz aqparat agenttigi Vesti.kz saıtyna silteme jasaı otyryp.
Jartylaı jeńil salmaqta ótken jekpe-jek 3 raýndqa josparlanǵan bolatyn. Birinshi raýnd aıaqtalar tusta Arman birneshe aýyr soqqy alyp, esin jıyp úlgerdi. Nátıjesinde ýaqyt dabyly qos sportshynyń dem alýyna múmkindik berdi. Al ekinshi raýnd asa tartysty ótti. Reseılik sportshy alǵa umtyla tússe, ańdysyn tapqan Arman soqqynyń astyna alǵan. "Suńqardyń" soqqylary dóp tıýimen erekshelendi. Áıtse de eki sportshynyń da osy sátte sharshaǵany anyq baıqaldy. Bir-biriniń joıqyn soqqylaryn kóterip qana qoımaı, judyryq siltep, tyǵyryqtan shyǵar jol izdedi. Bul joly da sportshylardy ekinshi raýndtyń ýaqyt dabyly tynystap alýlaryna mursha berdi. Úshinshi raýndta ekeýi de shabýylǵa asyqpady. "Suńqar" ádiske salýǵa asyqqanmen, qarsylasy múmkindik bermedi.
Bul raýndta Arman qarsylasyna ese jibere qoıǵan joq. Nátıjesinde ýaqyt ta aıaqtalyp, jeńimpazdy tóreshiler anyqtady. Olar 4:1 esebimen Aleksandr Polpýdnıkovty jeńimpaz retinde tanydy. Al jınalǵan kórermen tóreshiler sheshimimen kelispeıtinin bildirip, reseılik sportshyǵa sóz bergende ysqyryqqa basty.
Arman Ospanov pen Aleksandr Polpýdnıkov osyǵan deıin de bir-birimen kezdesken. 2013 jyly League S-70 týrnırinde ótken jekpe-jekte otandasymyz qarsylasyn birinshi raýndta-aq jeńip shyqqan bolatyn.
Búgingi jekpe-jek qorytyndysy boıynsha bir-birin jeńip, nátıjeleri teńesti. Al kelesi kezdesýge reseılik sportshy qarsy emes ekenin aıta ketti.
— Eger tóreshiler sheshimi unamaı jatsa, úshinshi jekpe-jekke shyǵýǵa daıynmyn. Árıne, Arman kelisse. Sóıtip núktesin qoıatyn bolamyz, - dedi Aleksandr.
Alǵashqy kezdesýinde japon sportshysy Taıchı Nakajımany ekinshi raýndta nokaýtpen jeńdi. Ekinshi jekpe-jegin Almatydaǵy ASV 69 týrnıriniń basty jekpe-jeginde brazılıalyq sportshy Tıago Sılvaǵa qarsy ótkizip, qarsylasyna ese jiberip alǵan. Bul - otandasymyzdyń sporttyq mansabyndaǵy alǵashqy jeńilisi edi. Búgin ekinshi ret jeńildi. Aıta keteıik, ASV 77 týrnırinde qazaq sportshysy Asyljan Baqytjanuly da qatysyp, reseılik Mýslım Mahmýdovty ekinshi raýndta nokaýtpen jeńdi.
