Sonaý bir alys ólkede,

Ósip tur bir túp qalaqaı,

Taǵdyrǵa únsiz kónse de,

Umytpady ony balaqaı.

Qıaldyń er sap taıyna,

Qýraıyn mingen at qylyp.

Ashýly qalaqaıyna,

Alaqanyn júr shaqtyryp.

Muńaıady eken  nesine,

Tunjyrap únsiz balaqaı.

Jýsannan kóri esine,

Túsedi jıi qalaqaı

Taý tasy týǵan dalanyń,

Shertedi ǵajap ertegi.

Qalaqaı jyry balanyń,

Janynyń aýyr derti edi.

Ár kúni aldan ertemen,

Araılap tańnyń atary,

Alysta sol bir  ólkeden,

Bastalǵan ómir sapary.

Mekeni týǵan balanyń,

Qońyrqaı taýdyń arjaǵy.

Túsinde ǵazız ananyń,

Berdi aıan birde arýaǵy.

«Kelmeısiń nege qulynym,

Babańnyń týǵan jerine»

Kóz jasy sonda ulynyń,

Tógildi etek-jeńine.

 ***

Zymyrap jyldar arada,

Oraldy ulan eline.

Qaraıdy únsiz dalaǵa,

Tunshyǵyp ishteı demine.

Esine aldy kúrsinip,

Sonaý bir sulý kóktemdi.

Ózgerip ketken tirshilik,

Ótkennen eshbir joq belgi.

Sezindi tuńǵysh qadirin,

Topyraǵyn týǵan dalanyń.

Jermenen jeksen qabirin,

Tapty áreń izdep ananyń.

Kezikti kórip qaıtadan,

Qalaqaıymen jeriniń.

Muńaıyp ishteı aıtady án,

Jybyrlatýmen erinin.

Súıiný álde tamsaný,

Keýdesin muńnyń qysqany.

Aqyryn sozyp saýsaǵyn,

Qalaqaıyn kep ustady

—Esińde joq pa bala kún,

Sıpasań netti aıalaı,

Ashýly shóbi dalanyń,

Shaqty kep muny aıamaı.

Ómirdiń altyn araıly,

Keýdeden tańy atqany.

Qan bolyp boıǵa taraıdy,

Qalaqaı shóptiń shaqqany.

Túsiný qıyn ómirdi,

Op-ońaı adam sorlamaq.

Kóz jasy jerge tógildi.

Jańbyrsha jaýǵan sorǵalap.

Basa almaı ashshy kúıikti,

Qoshtasty taýy, tasymen.

Qalaqaıyn sol súıikti,

Sýaryp sońǵy jasymen.

Bul ballada 2008 jyly aqpan aıynda aqyn Júrsin Erman uıymdastyrǵan "Bir óleń — Bir álem" respýblıkalyq jyr músháırasynda úshinshi oryndy ıelendi.  

Muqash Qojahmetuly, dıktor, jýrnalıs

 28.07.2012 jyl. Astana, tún.