Bul – aqyn Serik Qapshyqpaıulynyń seksenniń seńgirinde turyp oqyǵan óleńi bolatyn. Tórt jyl buryn Almatyda – Jazýshylar odaǵynyń sahnasynda zańǵarǵa shyqqan serkedeı múıizi áıtiktenip, qasqaıyp turyp oqyp edi osy óleńin. Jurt dúr silkingen.

"Kıim túrin tańdasań, qońyrynan deýshi ediń,

Sonyńdy endi oılasam, janyń eken ol seniń.

Etik túrin tańdasań, beriginen deýshi ediń,

Sonyń endi oılasam, janyń eken ol seniń".

Osylaı jelkildetip, jelpildetip bastalatyn uzaq dastandy Sekeń dosy Toqtarqan Jekibaıǵa arnaǵan bolatyn. Shyn máninde Serik Qapshyqpaıdyń ózi osyndaı kórkem minezdi, erki berik, qaısar, tózimdi jan edi.

"Meniki me qubyla?!

Meniki me quba tań?!

Meniki ǵoı kún myna,

Meniki ǵoı bul Otan", – dep tebirenetin aqyn.

Joǵaltyp alǵan baqytyn, aırylyp qalǵan qymbatyn bir sátke taýyp alyp, keýdesine batyra qushaqtap, taǵaty taýsyla aıǵaılaǵan kýanyshty jannyń daýysy keledi qulaǵyńa. Ol – aırylyp qalǵan azattyǵyn, kóz jazyp qalǵan Otanyn qaıta tapqan, qushaǵyna qapsyra qushqan jannyń – aqynnyń daýsy edi.

Iá, Seke, mynaý atqan azattyqtyń quba tańy da, qazaqtyń azat uly Otany da sizdiki: eshkimniń talasy joq, Seke!

Shyńjańnyń Sháýesheginen shyqqan Omarǵazy Aıtan, Zadaqan Myńbaı, Serik Qapshyqpaı degen kisiler Shyńjań qazaq poezıasynyń mektebin qalyptastyrǵan, bir dáýirin jasaǵan qubylys edi. Burynyraq ta Omarǵazy Aıtan, ótken jyly Zadaqan Myńbaı qaıtty ómirden. Endi búgin Serik Qapshyqpaıdyń da aqyn júregi soǵýyn toqtatty.

"Ýytyn jaıyp isikshe,

Bireýdiń assa ataǵy.

Ataǵym meniń kúshikshe.

Úıshiginde jatady",

- degeni bar edi Sekeńniń. Tynbaı óz júregimen syrlasyp, tynbaı óleń órýmen ǵana ómir súrdi Sekeń. Seksenniń seńgirine kelgenshe ataǵyn aldyǵa súırep, arpalysqan jan emes edi ol. Kórkem minezdi Sekeń jasaǵan poezıa qazaq tiliniń sulý qubylysy – minsiz óleńder  Serik Qapshyqpaı ataǵyn úıshikte qaldyrmas. Táýelsizdik nyǵaıar, "Halyq aǵarar",  Kazaqtyń kórkem tili ústemdik qurar. Sol kezde Serik Qapshyqpaı jasaǵan kórkem mura da, jalaýyn jelbiretip tuǵyrynda turar.

Seke, Táýelsiz elińizde eńbek ettińiz, "kárkisi" boldyńyz, " biraq azat Otany bar kisi" boldyńyz jáne oǵan kanaǵat ettińiz... Janyńyz jánnatta bolsyn! Siz súıgen Otan máńgi bolsyn!

Janazańyzda sapta turyp, Shákirtińiz, inińiz: Almas Ahmetbekuly.

(Sýrette "Tarbaǵataı" jýrnalynyń redaktorlary: Serik Qapshyqbaı, Qumar Demesin, Almas Ahmetbekuly)