Qazaqstan AQSH pen Reseıdiń qarym-qatynasy nasharlaǵyna alańdaýshylyq bildiredi. Bul týraly Prezıdent Nursultan Nazarbaev Donald Tramppen birlesken pres-konferensıada aıtty dep habarlaıdy Qamshy.kz aqparat agenttigi halyqaralyq aqparat kózderine silteme jasap.

- Soltústik Koreıa máselesin AQSH, Qytaı men Reseı úsheýi tize qosyp qana sheshe alady. Osy oraıda AQSH pen Reseıdiń baılanysy úzilgenine biz jaqyn kórshileri retinde, árıne, alańdaımyz, - dedi Prezıdent.

Nursultan Nazarbaev álemdegi tórtinshi ıadrolyq arsenaldan bas tartqan memleket retinde Qazaqstannyń basqalardy ózinen úlgi alýǵa shaqyrýǵa moraldyq quqyǵy baryn atap ótti. Sonymen qatar ol AQSH-tyń 2001 jyly Aýǵanstanda terorızmge qarsy júrgizgen kúresin belsendi qoldaǵanyn eske saldy.

- Qazir Aýǵanstanda jasalyp jatqan úlken jumystardy qoldap otyrmyz. Terorızm oshaǵyna qarsy turý – bárimizdiń, Aýǵanstannyń búkil kórshileriniń mindeti, - dedi Nazarbaev.

Óz sózinde Nursultan Nazarbaev Aýǵanstanǵa 75 mıllıon dollarǵa gýmmanıtarlyq kómek kórsetkenin jáne myńdaǵan aýǵan jastaryn 50 mıllıon dollarǵa oqytqanyn jetkizdi.

Sonymen birge Nursultan Nazarbaev Donald Trampty prezıdenttik qyzmetine bir jyl tolýymen quttyqtap, Qazaqstan men AQSH dostyǵyn tilge tıek etti.

- Shaqyrtýyńyzǵa kóp rahmet, prezıdent myrza! Osy sátti paıdalana otyryp, sizdi prezıdenttik qyzmetińizge bir jyl tolýymen jáne ekonomıkadaǵy orasan tabystaryńyzben qutyqtaımyn. Osynda otyrǵanymnyń ózi – men úshin zor mártebe. Qazaqstannyń táýelsizdigi men terıtorıalyq tutastyǵyn qoldaǵandaryńyz biz úshin árqashan mańyzdy bolǵan. Aımaqtaǵy siz ben bizdi tolǵandyrǵan máseleler jóninde áńgimelesip, ekijaqty yntymaqtastyqty jańa deńgeıge kóteremiz dep úmittenemin. Men sizge rızamyn jáne sáttilik tileımin,  - dedi Nazarbaev.

Al Donald Tramp AQSH tarapy Qazaqstandy Ortalyq Azıa óńirindegi bolashaǵy zor, strategıalyq áriptes dep sanaıtyndyǵyn basa aıtty. Sonymen qatar Qazaqstandy óńirlik beıbitshilik pen qaýipsizdiktiń sheshýshi faktory retinde baǵalaıtynyn málimdedi.

- Meniń shaqyrtýymdy qabyl alǵanyńyz úshin rızashylyǵymdy bildiremin. Aq úıde Sizdi qabyldaý – men úshin úlken abyroı. Buǵan deıin de Saýd Arabıasynda birqatar máselelerdi talqyladyq. Qazaqstan táýelsizdik alǵaly beri kóptegen jetistikke qol jetkizdi. Qazirgi AQSH ekonomıkasy úlken bir beleske shyqty», - dedi Donald Tramp.