Qazaqstan Prezıdenti dóńgelek ústel qatysýshylarymen kezdesý uıymdastyrylǵany úshin rızashylyq bildirdi, dep jazady Qamshy.kz aqparat agenttigi.

Nursultan Nazarbaev Qazaqstan men AQSH arasynda ornyqqan qatynastardyń mańyzdylyǵy men strategıalyq sıpatyna toqtaldy.

– Amerıka Qazaqstan ekonomıkasyna salynǵan tikeleı ınvestısıalardyń kólemi boıynsha ekinshi orynda. Táýelsizdik jyldary ishinde sizderdiń kompanıalaryńyz tarapynan Qazaqstanǵa 50 mıllıard dollardan astam ınvestısıa quıyldy. Ótken jyly eki el arasyndaǵy taýar aınalymy 2 mıllıard dollarǵa jetti. Bizdiń elde energetıka, kólik, ınovasıa, medısına jáne basqa da salalarda Amerıka kapıtalynyń qatysýymen 500-den asa kompanıa tabysty jumys istep keledi. Bizdiń iri seriktesterimizdiń qatarynda Shevron, Ekson Mobıl, Djeneral Elektrık, Hellıbórton jáne basqa da kompanıalar bar, – dedi Nursultan Nazarbaev.    

Memleket basshysy eki jaqty qatynastardyń keń aýqymyn qamtıtyn Keńeıtilgen strategıalyq áriptestik týraly birlesken málimdemeni qabyldaýdyń erekshe mańyzdylyǵyn atap ótti.

Sondaı-aq, Nursultan Nazarbaev Qazaqstannyń kólik-tranzıttik áleýetin damytý úderisine toqtalyp, bıznes júrgizý úshin memleket tarapynan jaǵdaı jasaýǵa baǵyttalǵan sharalar jóninde áńgimeledi.    

– Investısıalyq ahýaldy jaqsartyp, ınvestorlardyń quqyqtaryn qorǵaý úshin turaqty jumystar júrgizilýde. Qazaqstan Ekonomıkalyq yntymaqtastyq jáne damý uıymynyń Investısıalar jónindegi komıtetiniń qaýymdastyrylǵan múshesi boldy jáne Halyqaralyq ınvestısıalar jónindegi deklarasıaǵa qosyldy. 62 eldiń, sonyń ishinde AQSH azamattary úshin bizde vızasyz rejim engizildi. Kásipkerlik salasyndaǵy zańnama jetildirilýde. 11 arnaıy ekonomıkalyq aımaq jáne 22 ındýstrıalyq aımaq jumys isteýde. Onda qajetti ınfraqurylym men jeńildikter kózdelgen, – dedi Qazaqstan Prezıdenti.  

Sonymen qatar, Memleket basshysy Qazaqstan ekonomıkasyn sıfrlandyrý jáne óndiriske ınovasıany engizý barysyna erekshe nazar aýdardy.

– «Sıfrlyq Qazaqstan» arnaıy memlekettik baǵdarlamasy qabyldandy. Osyǵan oraı, ekonomıka salalaryn sıfrlandyrý jáne ınovasıalyq ekojúıeni damytý jónindegi jobalardy júzege asyrý mańyzdy bolyp sanalady. Máselen, Nazarbaev Ýnıversıteti jáne Inovasıalyq tehnologıalar parki sıaqty ınovasıalyq klasterler jumys isteýde. Bıyl Astanada İT-startaptardyń jańa halyqaralyq tehnoparki ashylady. Osynyń bári yntymaqtastyǵymyz úshin perspektıvti baǵyt bola alady, – dedi Nursultan Nazarbaev.

Qazaqstan Prezıdenti amerıkalyq bıznesmenderge arnalǵan sózinde agroónerkásip keshenindegi birlesken jobalardy júzege asyrý úshin sheteldik ınvestorlardy qatysýǵa shaqyrdy.

Budan bólek, Memleket basshysy elimizdegi jekeshelendirý baǵdarlamasynyń iske asyrylý barysy jáne «jasyl ekonomıka» salasyndaǵy jobalardy damytý perspektıvasy týraly aıtty.

– Ótken jyly «Bolashaqtyń energıasy» atty taqyrypta Halyqaralyq «EKSPO-2017» mamandandyrylǵan kórmesin tabysty ótkizdik. Bul kórme búkil planetanyń «taza» energetıka salasyndaǵy joǵary tehnologıalyq jáne zıatkerlik áleýetin kórsetýge keremet múmkindik týǵyzdy. Kórme murasy ınovasıalyq jáne ornyqty damý mindetterine ári qaraı da qyzmet ete beretin bolady. Atap aıtqanda, EKSPO ınfraqurylymynyń bazasynda «Jasyl» tehnologıalardy jáne ınvestısıalardy damytý jónindegi halyqaralyq ortalyq jumys isteıtin bolady. Ol elimizde jáne óńirde «jasyl» jobalardy júzege asyrýǵa septigin tıgizýge arnalǵan, – dedi Qazaqstan Prezıdenti.

Sondaı-aq, Nursultan Nazarbaev «Astana» halyqaralyq qarjy ortalyǵynyń erekshe mártebesin atap ótip, onyń jumysynyń aldaǵy josparlaryna toqtaldy.

– «Astana» halyqaralyq qarjy ortalyǵynyń qatysýshylaryna 50 jylǵa deıin salyqtyq, valútalyq, vızalyq jáne eńbek rejimderi sıaqty jeńildikter beriledi. Bul – jumysy aǵylshyn quqyǵyna negizdelgen óńirdegi birden-bir ortalyq. «Astana» halyqaralyq qarjy ortalyǵynyń joǵary tehnologıalyq bırjasyn qurýǵa Shanhaı qor bırjasy jáne NASDAQ amerıkalyq bırjasy tartyldy. «Astana» halyqaralyq qarjy ortalyǵynyń «jasyl», ıslamdyq jáne ınovasıalyq qarjylyq quraldardy damytý jónindegi óńirlik ortalyqqa aınalýyna barlyq múmkindigi bar. Jaz aıynda biz halyqaralyq qoǵamdastyq úshin «Astana» halyqaralyq qarjy ortalyǵynyń resmı tanystyrylymyn ótkizýdi josparlap otyrmyz, – dedi Memleket basshysy.

Sońynda Qazaqstan Prezıdenti ótkizilgen kezdesýdiń eki eldiń jaqyndasýyna jáne ózara tıimdi áriptestikti nyǵaıtýǵa serpin beretinine senim bildirdi.