Nursultan Nazarbaev AQSH-ta «Nasdaq» kompanıasynyń prezıdenti Adına Frıdmanmen, «Goldman Sachs» kompanıasynyń prezıdenti Harvı Shvarspen, «ExxonMobil» kompanıasynyń bas atqarýshy dırektory Darren Výdspen kezdesýler ótkizdi, dep jazady Qamshy.kz aqparat agenttigi.
«Nasdaq» kompanıasynyń prezıdentimen kezdesýi barysynda kompanıanyń Qazaqstanda jumys júrgizý jónindegi sheshimin quptaıtynyn aıtty.
– Sizderdiń Qazaqstanda, «Astana» halyqaralyq qarjy ortalyǵynda jumys isteý jónindegi sheshimderińizdi qoldaımyz. Biz Konstıtýsıaǵa jáne elimizdiń birqatar zańyna ózgerister engizdik. Onda aǵylshyn quqyǵy engizilgen jáne qatysýshylardyń barlyǵyna jeńildikter qarastyrylǵan. Jumys isteıtinder úshin barlyq qolaıly jaǵdaıdy jasaımyz, – dedi Qazaqstan Prezıdenti.
Al kompanıa prezıdenti A.Frıdman Qazaqstannyń halyqaralyq qarjy ortalyǵyn qurý jolynda atqarǵan jumystarynan alǵan áseri jóninde aıtty. Sondaı-aq «Astana» halyqaralyq qarjy ortalyǵymen yntymaqtastastyqty bastaýǵa jáne Qazaqstan bırjasynyń jumysyna qajetti ozyq tehnologıalarmen qamtamasyz etýge ázir ekenin de aıtty.
«Goldman Sachs» kompanıasynyń prezıdenti Harvı Shvarspen Kezdesýde taraptar «Astana» halyqaralyq qarjy ortalyǵy men «Goldman Sachs» kompanıasynyń odan ári yntymaqtasý máselelerin talqylady.
Nursultan Nazarbaev halyqaralyq qarjy ortalyǵyn qurý úshin atqarylǵan jumystardyń nátıjelerine toqtaldy.
– Búginde barlyq quqyqtyq jaǵdaı jasaldy. Aǵylshyn quqyǵy bazasyndaǵy sot quryldy. Qatysýshylar úshin qajetti barlyq jeńildikter qarastyryldy, sonyń ishinde vıza jáne salyq jeńildikteri de bar, – dedi Qazaqstan Prezıdenti.
Sondaı-aq, Memleket basshysy «Astana» halyqaralyq qarjy ortalyǵy Amerıkanyń «Nasdaq» bırjasymen jáne Shanhaı qor bırjasymen yntymaqtastyq ornatqanyn atap ótti.
«ExxonMobil» kompanıasynyń bas atqarýshy dırektory Darren Výdspen kezdesýde Memleket basshysy Qazaqstan men «ExxonMobil» kompanıasy arasynda munaı-gaz salasynda qalyptasqan ekonomıkalyq seriktestikti aıryqsha atap ótti.
Nazarbaev bul kompanıanyń Teńiz jáne Qashaǵan munaı-gaz ken oryndaryn ıgerýge arnalǵan jobalarǵa atsalysyp otyrǵanyn aıtty.
D.Výds Nursultan Nazarbaevty Qazaqstannyń BUU Qaýipsizdik Keńesindegi tóraǵalyǵynyń bastalýymen jáne AQSH Prezıdenti D.Tramppen ótken kelissózderdiń tabysty bolýymen quttyqtady.
