Ózbekstandy 25 jyl bılegen Islam Kárimov dúnıeden ozǵan soń 2016 jyly qyrkúıek aıynda Shavkat Mırzıaev prezıdent bolyp saılandy.

Shavkat Mırzıaev memleket basshysy retindegi alǵashqy shetel saparyn byltyrǵy Naýryz merekesinde Astanadan bastady. Kezdesýden buryn da eki el basshylary telefonmen sóılesip, qazaq-ózbek qatynasyn nyǵaıtý máselesin talqylaǵan.

Baýyrlas halyqtardyń tól meıramynda Ózbekstan prezıdentiniń Qazaqstanǵa saparlap kelýi eki el arasynda ornaıtyn dostyq baılanystyń ıgi nyshanyndaı boldy.

«Reıtıń» gazetine shyqqan maqalasynda B. Ernazar degen avtor «Ortalyq Azıada jetekshi memleketter eseptelgenimen Qazaqstan men Ózbekstan arasyndaǵy alys-beris osy ýaqytqa deıin óz deńgeıinde bolmaǵany ras», - dep jazǵan edi.

Munyń sebebin sarapshylar Islam Kárimovtiń kózi tirisinde kórshiles qazaq memleketine oń qabaq tanytpaýynan kóredi. Al Mırzıaev, kerisinshe, alǵashqy saparyn «tarıhı sát» dep baǵalady. Onyń Reseıdi emes, Qyrǵyzstandy emes, Qazaqstandy tańdaýy kezdeısoqtyq bolmasa kerek.

Ózinen 17 jas kishi Mırzıaevty qabyldaǵan sátinde Nazarbaev:

- Ózbekstan – bizdiń strategıalyq áriptes, baýyrlas memleket. Bizdiń turǵyndar kórshi eldiń gúldenýin, amandyǵyn qalaıdy, - degen bolatyn.

Nazarbaev-Mırzıaev kezdesýiniń saıası mańyzyn «Eksklúzıv» jýrnalynyń bas redaktory Rasýl Jumaly da atap ótti. Karımovtyń jabyq saıasatynan keıin bir ózgeris bolady degen úmitpen Tashkentke ózi birinshi bolyp barǵan Pýtınniń «aýzy kúıdi», - deıdi ol. Sebebi memleket basshysy alǵashqy saparyn qaı elge jasasa, sol elge saıası basymdylyq beredi, «aımaqtaǵy yqpal ıesiniń» kim ekenin meńzeıdi.

Negizi Pýtın Kreml qaramaǵyndaǵy Eýrazıalyq ekonomıkalyq odaqqa (EEO) Ózbekstandy da engizbek bolǵan sıaqty. Tashkent pen Samarqanǵa barǵan saparynda ózbek áriptesterine tyǵyz yntymaqtastyq týraly ýádesin úıip-tókkeni de sol.

Biraq onyń dittegeni bolmaı shyqty, kerisinshe, Mırzıaev byltyr Bishkekte bolǵan TMD samıtin elemeı qoıdy. Ózbekstan basshysy tuńǵysh resmı saparyn Qazaqstan men Túrkmenstannan bastap, syrtqy saıasatta Ortalyq Azıadaǵy baýyrlas elderge búıregi buratynyn ańǵartty.

Shavkat Mırzıaev prezıdent bolyp saılanǵan bette Nursultan Nazarbaev onymen aqyldasyp, 2018 jyly Qazaqstandaǵy Ózbekstan jylyn ótkizýge ýaǵdalasty.  Al 2019 jyl Ózbekstandaǵy Qazaqstan jyly bolmaq. Nazarbaevtyń aıtýynsha, «osy bastamalar aıasynda ótetin is-sharalar baýyrlas halyqtarymyzdyń jaqyndastyǵyn odan ári tereńdetýge septigin tıgizedi».

Kárimovtiń beıitine topyraq salýǵa barǵan saparynda Nursultan Nazarbaev pen Shavkat Mırzıaevpen túrli saladaǵy 100 kelisimge qol qoıdy.  Sonyń eń negizgileri – Máńgilik dostyq týraly shart pen Strategıalyq áriptestik týraly shart.

Taraptar 2018 jyly demarkasıa boıynsha dalalyq jumystardy júrgizýge, ortaq avtomobıl óndirisin, temirjol jáne avıasıa salalaryn birlese damytyp, shekara máselesin sheshýge kelisti. Ózbekstanǵa Qazaqstan arqyly Eýroodaqqa jol ashylatynyn eskergen Mırzıaev eki el arasyndaǵy  logıstıkalyq baılanysty jaqsartý keregin kámil túsindi.

«Qazaqstan men  Ózbekstan – strategıalyq áriptes qana emes, eń bastysy, senimdi seriktes. Qazaqstan Ortalyq Azıada turaqtylyqty saqtaýdyń ózindik úlgisin qalyptastyrdy dep oılamyn», - dedi Qazaqstan Respýblıkasynyń Ózbekstandaǵy tótenshe jáne ókiletti elshisi Erik Ótembaev. Al elshiniń sózi qaı zamanda da onyń artyndaǵy eldiń múddesin bildirgen.

Ázirge Ózbekstan men Qazaqstan arasyndaǵy taýar aınalymy 2 mıllıard dollarǵa jýyqtady. Kúrmeýi qıyn kúrdeli másele áli kóp-aq. Biz aldaǵy ýaqytta da qazaq-ózbek qatynasyn muqıat baqylap otyramyz.