Nursultan Nazarbaev pen Donald Tramptyń kezdesýi, birinshiden, qazaqstandyq ekonomıkaǵa amerıkalyq ınvestısıanyń jańa aǵymyn qamtamasyz etý jaǵynan óte mańyzdy.

AQSH ınvestor-memleketter tiziminde seriktestik jyldary ishinde 50 mıllıard dollar kólemimen kósh bastap tur. Alaıda, búgingi tańda amerıkalyq korporasıalar biz úshin qajetti baǵyttarǵa qaıta baǵdarlanýy kerek. Bul jerde sıfrlandyrý, eksporttyq taýarlardyń negizgi úlesin quraıtyn ekonomıka salasyndaǵy óndiristik prosesterdi avtomattandyrý týraly aıtyp otyrmyz.

Bul turǵydan alǵanda Memleket basshysynyń AQSH-qa sapary bizdiń modernızasıalyq baǵdarlama men ekonomıkalyq reformalardyń negizgi vektorlaryn tanystyrý ispetti boldy.

Sondyqtan, aldaǵy ýaqytta joǵary tehnologıalardy engizý boıynsha jańa eki jaqty jobalardyń paıda bolýyn kútýimizge bolady. Bul eń aldymen, munaı-gaz sektory, munaı-hımıa salasy, energetıka, kólik-logıstıka ınfraqurylymyna qatysty.

Atap ótý kerek, Qazaqstan árdaıym shetel ınvestorlaryna, onyń ishinde amerıkalyqtarǵa da, bıznes júrgizýdiń eń tıimdi sharttaryn usynǵan. Qol qoıylǵan kelisimder qazaqstan-amerıkandyq bıznes seriktestigi aldaǵy ýaqytta da qarqynyn joǵaltpaıtynyna kepildik beredi.

Orazǵalı Selteev,

QR Tuńǵysh Prezıdenti – Elbasy Qory janyndaǵy Álemdik ekonomıka jáne saıasat ınstıtýtynyń (ÁESI) jetekshi sarapshysy