Qazaqstandyq Aınur Núsipbekova elimizde týrızmdi damytý úshin áıgili brıtandyq komık Sasha Koendi Qazaqstanǵa shaqyrýdy nemese qalalardyń birinde onyń eskertkishin ornatýdy usyndy, dep habarlaıdy Qamshy.kz aqparat agenttigi. 

Tourcenter.kz portalynyń negizin qalaýshy Aınur Núsipbekova bul usynysymen áleýmettik jelide bólisken.

«Ózderińiz biletindeı, Qazaqstan qazir ózin álemge tanytý úshin belsendi áreket etýde jáne sol úshin arnaıy Kazakh týrızm uıymy qurylyp, elimizge týrısterdi tartýmen aınalysyp jatyr. Biraq, ókinishke oraı, Qazaqstannyń basty problemasy týrısterdi ózine tarta almaýymen ǵana shektelmeıdi, jalpy kóp jerlerde bizdi el retinde eshkimniń tanymaýy bolyp tabylady. Qazaqstannyń kóptegen jetistigi bar alaıda sheteldikterdiń basym kópshiligi Qazaqstan dese, Boratty eske túsirip, birden tanı ketedi», — deıdi Aınur Núsipbaeva. Sol sebepti Borat esimdi keıipkerdi somdaǵan akter Sasha Koendi Qazaqstanǵa shaqyrýdy usynady.

«…Qara pıar degen de pıar. Ol bir ǵana fılmmen bizdiń elimiz mıllıardtap qarajat jumsap jatqan jetistikke jetti. Boratpen habarlasyp, Astanada qydyrtyp, biraz shý shyǵarýǵa bolady. Bálkim birigip ázil-ysqaq fılm túsirýge kelisýge bolatyn shyǵar. Sújeti boıynsha, Borat bolashaqqa, qazirgi Astanaǵa kelip, neshe túrli qyzyqtar kórsetip, elordamyzdyń jańa kelbetine tańǵalyp jatsa… Osy ıdeıany ári qaraı damytyp, jetildirýge bolady. Degenmen osy Borat arqyly elimizge kerek tanymaldyqqa qol jetkizip, qyrýar aqsha únemdeı alamyz. Meni qatty synǵa almassyzdar, aıta keteıin: Qaraǵandyda ma nemese basqa qalalardyń birine Boratqa arnap eskertkish ornatyp, týrısterdi sonda aparýǵa bolady», — dep oıyn ortaǵa saldy qazaqstandyq.