BİR TAL GÚL, ÁLİ ERTEREK...
Kóleńkesi pana bolyp bir taldyń,
Japan túzde ósip turdy bir tal gúl.
Ósip turdy emin erkin bir tal gúl,
Ana bir tal, eteginde bir taýdyń:
...Bir tal gúl, jeldiń ótinde,
Bir tal gúl, dóńes betinde.
Bir tal gúl, túnde tońa ma,
Bir tal gúl, jalǵyz bola ma?
Bir tal gúl, jalǵyz muńaıyp,
Minezben soǵan laıyq,
Túnder de qatty qorqa ma,
Kóńili onyń orta ma?
Ǵashyq bop, alǵa kim qular,
Bir tal gúl, seni, kim jular?
Julmashy, adam, jalynam,
Osyny oılap, qamyǵam...
Bir tal gúl, jalǵyz terbelip,
Dalama ǵajap óń berip,
Erkelep tur ma, erkelep,
Bir tal gúl, áli erterek...
QYZǴALDAQ — GÚLDİŃ ERKESİ!
Demińmen meni órteshi,
Mendegi qazir sert osy.
Qyzǵaldaq gúli dalanyń -
Tabıǵat-ana erkesi.
Qıalym ba eken bastaǵy,
Oıymdy qaıda bastady?
Qyzǵaldaq gúli dalanyń:
Ne appaq, qyzyl, sap-sary.
Appaǵy - taza aryńdaı,
Qyzyly - órter jalyndaı.
Sarysy bolsa - saǵynysh,
Saǵynyp, kútken janymdaı.
Dalamnyń gúli - qyzǵaldaq,
Salatyn qyzdaı, biz qarmaq.
Qyzǵaldaq qyzǵa uqsasa,
Qyzǵanbaq kerek, qyzǵanbaq.
Qyzǵaldaq - qyrdyń erkesi,
Kúıdirip, ıakı, órteshi!
Entigip, ázer basylyp,
Turǵandaı aqqý ór tósi...
Ýaqyt ta qazir uzaryp,
Ǵashyq bop turmyz biz anyq.
Qyzǵaldaq - qazaq qyzyndaı,
Qyzyryp ketken, qyzaryp...
SÚIÝ ÚSHİN JARALǴAN...
Alataýdyń basynda qar jatqanmen,
Eteginde gúl kóktem.
Ár kún saıyn araılap tań atqanmen,
Saýlap tur-aý jyr kókten...
Túnergenmen Alataýdyń shyńdary,
Eteginde arýlar.
Júregimniń únin kóktem tyńdady,
Basylmaıtyn jalyn bar.
Gúl jaınaǵan bar arýdyń armany,
Sábı súıý eken-aý.
Ár jigittiń ańsap súıgen ardaǵy,
Kóp kúttirse, beker-aý...
Bar ǵashyqtar, Alataýdan úırengen,
Turady olar qasqaıyp.
Aqyrynda shyn súıgender - úılengen,
Súıgenderi – «basty aıyp»...
Men qazaqtyń arýlaryn aıalap,
Súıgenderge yrzamyn.
Ǵashyqtarǵa óz úıleri - saıa baq,
Ǵashyqtyqty jyrladym.
Gúldeı kórkem bizdiń qazaq qyzdary,
Súıý úshin jaralǵan.
Saǵynyshtan, júrek bitken syzdady,
Ǵashyqtyqtan nár alǵan...
Jumash Kenebaı,
8 naýryz 2018 jyl.
