Sonymen, jazýshylardyń Almatyda ótken quryltaıyna baryp qaıttyq. Satıraǵa qyzyqty keıipkerlerdi alyp qaıttyq. «Jazýshylar da jyndy eken ǵoı?» degen kóńil–kúıdi pápkimizge salyp qaıttyq. Muhtar Shahanov pen Nurlan Orazalın týra meniń kishkentaı balalarym sıaqty eken. birin biri mazaqtap, tilderin shyǵaryp, «Qorazsyń, shakalsyń» desti. 
Qabdesh Jumadilov degen kókemiz qalamger áriptesine qarata sóz sóılep: «Sovet zamanynda «haltýrshık» edi, myna zamanda o toba, sóz serkesi bola shyǵypty!» dep tań qalǵan boldy. Qaıdan kelgenin bir qudaı biledi, bir maskúnem sahnaǵa shyǵyp ketip: «Jazýshy j-joldastar, bir án shyrqap bereıinshi?» dep qoımady. Ony sahnadan súırep shyǵardy. Biraq bir ókinishtisi, tóbeles bolmady. Negizi tóbelesý kerek edi. Jekpe- jek! Sonda bizder, delegattar kimmen tóbeleserimizdi bilmeı abydyryp turar ma edik... Shirkin– aı, tóbeles bolyp ketse ǵoı? Aýzym ańqıyp otyrǵan meniń aýzyma bir sábiz kirip ketse. Kúrtildetip jeı bersem, Tórde otyrǵan Marhabat aǵamnyń mańdaıyna kártóshke sart ete qalsa... Kendebaı aǵamnyń betine pomıdor bylsh ete qalsa. Zylıha qaryndasymnyń ıyǵyna salat tógilip ketse... Narmahan aǵamyz bireýdi bir uryp qulatyp alyp, artynan qýalap keshirim surap júrse. Mombek joq! Sóıtsek, bir jazýshyny uryp qulatyp, ústine úımelegenderdiń arasynda qalyp ketse, ony sıraǵynan tartyp, áreń shyǵarsaq... Ámzeni bir jazýshylar uryp jatsa, ony ajyratyp júrsek, Bir dramatýrg Hanbıbi apamyzdyń jelkesin qasyp jatsa. Bireýden bireý qorqyp, qashyp jatsa, sóıtip, delegattardyń mıy ashyp jatsa... Shoıbek tóbeleske qatyspaı, aýlaq jerde sháı iship otyrsa, Baqytjan Aldıar "Kókeler ne istep ketti?" dep jylap tursa... Serik Jánabil "Tóbeles qashan bitedi?" dep Qudaıdan meıirim surap tursa...
Qudaı-aı, munyń betin ary etsin, mundaı tóbeles bolǵan joq, bolaıyn, bolaıyn dep qaldy. Desek te, jańa tóraǵa bolyp belgili aqyn Ulyqbek Esdáýlettiń saılanǵanyna keremet qýanyp qaıttym!

Muhtar SHERİM