Taıaýda ótken «Jas Otan» Jastar qanatynyń IV Sezi elimizdegi jastar saıasatynyń damýyna tyń serpin bergeni sózsiz. Soǵan oraı el jastarynyń belsendiligi odan ári artyp, qoǵamdaǵy ózekti máselelerge qatysty óz pikirlerin erkin bildirýde. Búgin «Nur Otan» partıasy Tóraǵasynyń Birinshi orynbasary Máýlen Áshimbaevpen kezdesken Jambyl oblysynyń jastary elimizdiń kemel keleshegi jolynda óz oılaryn ashyq aıtyp, utymdy usynystaryn jetkizdi, dep jazady Qamshy.kz aqparat agenttigi. 

Aıta keteıik, búgin Máýlen Áshimbaev Jambyl oblysyna arnaıy saparmen bardy. Sapar barysynda ol Taraz memlekettik pedagogıkalyq ýnıversıtetiniń oqytýshylarymen jáne stýdentterimen kezdesti. Olardyń arasynda joǵaryda atalǵan «Jas Otannyń» Sezine qatysqan delegattar da bar.

Partıa Tóraǵasynyń Birinshi orynbasary Sıeziń jańa baǵytta, kreatıvti formatta ótkenine nazar aýdaryp, sol arqyly jastardyń oıy men pikirin erkin bildirýge jaǵdaı jasalǵanyn aıtty.

Sıez aıasynda ótken «Rýhanı jańǵyrý», «Sıfrly Qazaqstan», «Qazaqstanda jasalǵan», «Bilim. Ǵylym. Inovasıa» jáne «Salamatty ult» taqyrybyndaǵy 5 paneldi sesıa ótkeni belgili. Nátıjesinde kóptegen ıgi bastamalar men usynystar aıtylǵanyna nazar aýdarǵan Máýlen Áshimbaev partıa tarapynan jastarǵa arnalǵan jańa jobalar qolǵa alynǵanyn aıtty.

– Talantty jastar men aqparat salasyndaǵy startaptardy qoldaýǵa baǵyttalǵan «Digital Nation», tájirıbeli qazaqstandyq saıasatkerler men sarapshylar usynǵan túrli baǵyttaǵy eń úzdik kitaptardyń elektrondy nusqalary qoıylatyn «Jas Otan Kitaphana», sondaı-aq, sheteldik jáne qazaqstandyq jas pedagogtardy aýyl mektepterinde jumys isteýge shaqyratyn «Teach for Kazakhstan» jobalary qolǵa alyndy. Osy jobalarǵa jambyldyq jastar da belsene qatysady dep senim bildiremin, – dedi Máýlen Áshimbaev.

Stýdenttermen kezdesýinde Máýlen Áshimbaev «Qazaq tilindegi 100 jańa oqýlyq» jobasy aıasynda jaryq kórip, kúni keshe ǵana qalyń oqyrmanǵa jol tartqan 18 oqýlyq jaıyna da erekshe toqtaldy.

– Áleýmettik jáne gýmanıtarlyq salada álemdik shedevr sanalatyn ári dúnıejúziniń eń úzdik joǵary oqý oryndarynda oqytylatyn oqýlyqtardyń qazaq tiline aýdarylýy, sóz joq, mýltıplıkatıvti áser beretin aýqymdy bastama. Qolymyzǵa tıgen 18 oqýlyqtyń qaısysyn alyp qarasaq ta otandyq ǵylymnyń damýyna jáne bilim berý isiniń odan ári jetilýine ólsheýsiz úles qosatyn eńbekter ekenin ańǵaramyz. Fılosofıa, áleýmettaný, psıhologıa, ekonomıka, menedjment, kásipkerlik, dintaný, lıngvısıka, mádenıettaný, antropologıa, jýrnalısıka ǵylymdaryn qamtıtyn bul oqýlyqtar jastarymyzdyń álemdik ozyq úlgide bilim alýyna dańǵyl jol ashyp otyr, – dedi Máýlen Áshimbaev.

Sonymen qatar Partıa Tóraǵasynyń Birinshi orynbasary jastarǵa «Prezıdenttiń bes áleýmettik bastamasynyń» mańyzy, olardyń jas býynǵa berer ıgiligi jaıynda keńinen túsindirip berdi.

Sapar barysynda Máýlen Áshimbaev «Rýhanı jańǵyrý» óńirlik jobalyq keńsesine arnaıy baryp, jambyldyq zıaly qaýym ókilderimen kezdesti. Bul keńsede elektrondy kitaphana jáne vırtýaldy mýzeımen jabdyqtalǵan bes birdeı ınteraktıvti alań jumys isteıdi. Baǵdarlama aıasynda qolǵa alynǵan «Tárbıe jáne bilim», «Rýhanı qazyna», «Atameken» jáne «Aqparat tolqyny» atty kishi jobalar boıynsha óńirde aqtarylǵan jumystar men jetken jetistikter jaıynda tyńǵylyqty málimet alýǵa da múmkindik bar.

– Zıaly qaýym ókilderi Elbasy aıqyndaǵan baǵyt-baǵdardyń jetekshisi bolyp, halyqqa «Rýhanı jańǵyrý» baǵdarlamasynyń mánin egjeı-tegjeıli túsindirip otyrýlary tıis. Bul baǵdarlama Qazaqstan halqyn biriktirip, bizdiń bolashaq jeńisterimizdiń baǵdaryna aınalýy kerek, – dedi Máýlen Áshimbaev.

Sondaı-aq, partıa Tóraǵasynyń Birinshi orynbasary oblys ákimi Asqar Myrzahmetovpen birge «Nurly jer» baǵdarlamasy boıynsha salynyp jatqan kóp páterli turǵyn úı qurylysymen tanysty. Odan bólek, partıa oblystyq fılıalynyń kezekten tys XXI konferensıasyna qatysyp, partıa aldynda turǵan basym-baǵyttardy pysyqtady.