13 sáýir kúni Qazaqstan Jazýshylar odaǵy jáne Qazaqstan Respýblıkasy Kásipodaqtar federasıasy arasynda Yntymaqtastyq týraly Memorandýmǵa qol qoıý rásimi ótti.
Qujatqa Kásipodaq federasıasy atynan Tóraǵa Baqytjan Ábdiraıym jáne Qazaqstan Jazýshylar odaǵy atynan Tóraǵa Ulyqbek Esdáýlet qol qoıdy.
Kásipodaqtardyń elimizdegi eńbekkerlerdiń quqyǵyn, táýelsizdigi men zańdy múddelerin qorǵaý, quqyqtyq mádenıet qurý baǵdary Elbasynyń «Qazaqstan – 2050», «Ult jospary – 100 naqty qadam», «Bolashaqqa baǵdar: rýhanı jańǵyrý» baǵdarlamalarynda qoıǵan mindetterimen úndes bolyp keledi.
Memorandým aıasynda Qazaqstan Jazýshylar odaǵynda salalyq kásipodaq qurý qarastyrylǵan.
Memorandým shyǵarmashylyq adamdarynyń áleýmettik-ekonomıkalyq jáne eńbek quqyqtary men múddelerin qorǵaý júıesin damytýdy, ózara baılanys pen qurylymdy áriptestikti qamtamasyz etýdi kózdeıdi.
Eki jaqty kelisilgen baǵdarlamalardan, jobalardan tys Kásipodaqtar federasıasy tarapynan zeınetker jasyna jetken Qazaqstan Jazýshylar odaǵynyń músheleri úshin kásipodaq shıpajaılaryna jeńildik ádisimen joldama bólý máselesi qaraldy.
Budan keıin zeınetker jasyna jetken Odaq músheleri jıpajaılarda jeńildikpen em qabyldap, kókeıde júrgen shyǵarmalaryn jaza alýǵa múmkindik alady.
Qazaqstan Jazýshylar odaǵynyń negizgi mindeti qashannan el ádebıetin jasaıtyn qalamgerlerge jaǵdaı jasaý, únemi qamqor bola bilý. Osyndaı abyroıly mindettiń bir parasy memorandýmnyń aıasynda jasalmaq.
Buryn aqyn-jazýshylarǵa jasalǵan jaǵdaı týraly, ártúrli shıpajaılarda, shyǵarmashylyq úılerinde jazylǵan týyndylar jaıly kóp estıtinbiz. Endi mine, Táýelsiz Qazaqstan ádebıetiniń maıtalmandary – osy zamanǵy qalamgerlerdiń erkin shyǵarmashylyqpen aınalysýyna jaǵdaı jasalyp jatyr.
Qazaqstan Jazýshylar odaǵy aldaǵy kúnderi de qalamgerlerdiń erkin shyǵarmashylyqpen aınalysýyna jaǵdaı jasaý jolynda qyrýar jumys atqaratyn bolady.
Pikir qaldyrý