Balalardy shyǵarmashylyqqa baýlıtyn álemdik baǵdarlamaǵa qazaq tili engizildi, dep habarlaıdy Qamshy.kz aqparat agenttigi. 

«Zerde» ulttyq ınfokommýnıkasıa holdıńi» AQ-nyń bastamasymen «Scratch» atty álemdik baǵdarlamaǵa qazaq tili engizildi. Bul týraly holdıńtyń Sıfrlyq daǵdylardy damytý basqarmasynyń dırektory Laýra Jumanalıeva baıandap berdi.

Osyndaı joba arqyly balalardyń logıkasy damyp, bolashaqta shyǵarmashylyq shyńyna shyqqanyn nıet etken «Zerde» Holdıńi Massachýsets tehnologıa ınstıtýtynyń zertteý ortalyǵymen birlese otyryp, baǵdarlamaǵa qazaq tilin engizipti. Buǵan qosa, ondaǵy barlyq júıeni tolyqtaı memlekettik tilge aýdaryp, tehnıkalyq jumystarymen 3 aı boıy aınalysqan.

«Skrech jobasyna Lifelong Kindergarten (MTI) atty zertteý ortalyǵymen birlesip, memlekettik tildi engizdik. Bizdiń maqsat – bul baǵdarlamanyń qazaq tildi balalarǵa qoljetimdi bolǵany», – dep atap ótti Laýra Jumanalıeva.

AQSH, Ulybrıtanıa, Ońtústik Koreıa syndy memleketterde atalǵan jobany mektep baǵdarlamasyna engizgen.  Al, 2017 jyly «Zerde» Holdıńiniń bastamasymen tájirıbe retinde Astana qalasyndaǵy №27 mekteptiń oqýshylary Skrech arqyly baǵdarlamalaý negizderin úırenýde.

Bul baǵdarlamasynyń artyqshylyqtary: baǵdarlamalaýdyń negizin úıretip, balanyń shyǵarmashylyq qyryn ashady, kreatıvtilikke baýlıdy.

«Biz balalardy damytqymyz keledi. Logıkalyq oılaý júıesi men jasampazdyqty ıgergenin qalaımyz. Kishkentaıynan óz ıdeıalaryn júzege asyra alsa deımiz», – dedi L. Jumanalıeva.

Aıta keteıik, Scratch – balalardy damytýǵa arnalǵan Internet-qaýymdastastyq. Onda olarǵa kóptegen anımasıa men oıyndardy qurastyrýdy úıretedi. Sondaı-aq, ol týyndysyn álemdik deńgeıde bólise alatyn bolady. Skrech jobasyn álem turǵyndary 2002 jyldan beri qoldanýda. Oǵan 22 mln. adam tirkelgen. Kún saıyn 25 myń oqyrman jazylyp, 30 myń jańa jobalar jasalýda. 2017 jyly 30 mln. jańa joba jasalǵan. Bul balalardy kishkentaıynan shyǵarmashylyqqa baýlyp, túrli  týyndylar jasaýǵa járdemdesedi.

Murat Rahımjanov