Búgin ál-Farabı atyndaǵy Qazaq ulttyq ýnıversıtetiniń jýrnalısıka fakúltetinde medıadaǵy jasandy ıntellekt zerthanasy ashyldy. «AI MediaLab» neırojelilerdi medıa jáne komýnıkasıa salasynda qoldanatyn elimizdegi alǵashqy zerthana.

Ýnıversıtet rektory Janseıit Túımebaevtyń aıtýynsha, bul — QazUÝ-dyń bilim men tájirıbege súıenip, zamanaýı ekojúıe qalyptastyrýǵa baǵyttalǵan strategıalyq qadamy. Prezıdent Qasym-Jomart Toqaev ta óz joldaýlarynda elimizdiń tehnologıalyq jáne ǵylymı-ınnovasıalyq táýelsizdigin nyǵaıtý úshin jasandy ıntellektiniń mańyzyn birneshe ret atap ótken bolatyn.

Zerthana ál-Farabı atyndaǵy QazUÝ-dyń Jasandy ıntellekt jáne Big Data kafedrasymen birlesip keshendi ǵylymı zertteýler júrgizedi. Onda derekterdi taldaý, vızýaldy storıtellıng, joǵary sapaly keskindermen jumys isteý jáne LLM quraldaryn qoldaný arqyly túrli tehnologıalyq sheshimder ázirlenbek. Zerthana zamanaýı LG Ultra Gear monıtorlarymen jabdyqtalǵan.

«AI MediaLab» sıfrlyq tehnologıalar men áleýmettik ǵylymdardyń toǵysynda bilim berýdi maqsat etedi. Bul pánaralyq tásil bilim alýshylarǵa medıasaladaǵy jasandy ıntellekt quraldaryn meńgerýge múmkindik beredi.

2025 jyldyń sáýir aıynda ótken «Farabı álemi» halyqaralyq forýmy aıasynda medıasaladaǵy JI taqyrybyna arnalǵan halyqaralyq konferensıa ótti. Onda stýdentterdiń qatysýymen jasalǵan alǵashqy ǵylymı-kognıtıvti jáne ınklúzıvti gazet — «AI-Tamyz» tanystyryldy.

Sondaı-aq, jýrnalısıka fakúltetinde jańa «AI&Media» magıstratýra baǵdarlamasy iske qosylady. Baǵdarlama mass-medıa, IT jáne dızaın salalarynyń toǵysynda joǵary bilikti mamandar daıarlaýdy kózdeıdi.

Aıta ketý kerek, ótken jyly Qazaqstan men Qytaı arasyndaǵy memleketaralyq kelisim aıasynda QazUÝ bazasynda sýperkompúter ornatylǵan. Qazirgi ýaqytta ony iske qosý boıynsha daıyndyq jumystary júrip jatyr. Bul qurylǵy sıfrlyq «egizder» jasaý, JI damytý jáne kúrdeli ǵylymı máselelerdi sheshý úshin qoldanylmaq. Aldaǵy ýaqytta «AI MediaLab» osy sýperkompútermen ortaq derekqorǵa biriktiriledi.