Qazaqstan Prezıdentiniń Birlesken Ulttar Uıymymen seriktestik qarym-qatynastarynyń damýyna qosqan jeke úlesin ylǵı da qoldap, alqap júretin eks-bas hatshysy Pan Gı Mýn Astana ekonomıkalyq forýmyna keldi, - dep jazady Qamshy.kz aqparat agenttigi. Forým aıasynda kóne dostardyń jeke kezdesýi ótti.

– Siz Qazaqstanda birneshe ret boldyńyz. Biz ıadrolyq qarýsyzdaný baǵdarlamasy boıynsha birlese jumys istedik. 29 tamyz búkil álemde Iadrolyq synaqtarǵa qarsy is-qımyl kúni retinde atap ótiledi. Sizben jáne Koreıa Respýblıkasymen aramyzda óte jaqsy dostyq qarym-qatynas qalyptasty, – dedi Memleket basshysy.

Pan Gı Mýn Astana ekonomıkalyq forýmy jahandyq syn-tegeýrinderdi talqylap, olardy eńserý joldaryn tabý isinde mańyzdy ról atqaratynyn aıtty.

– Qazaqstanǵa jańa qyzmetimde alǵash ret kelip otyrǵanyma qýanyshtymyn. Jahandyq kóptegen problemalar bar, men olardy sheshý úshin qoldaý kórsetýge ázirmin. Astana ekonomıkalyq forýmy tek qazirgi ózekti taqyryptardy ǵana emes, sondaı-aq jahandyq damýdyń keleshektegi máselelerin de talqylaýǵa arnalǵan alańǵa aınalyp otyr, – dedi Boao Azıa forýmy keńesiniń tóraǵasy.

Áńgimelesý barysynda taraptar Boao Azıa forýmy men Astana ekonomıkalyq forýmy arasyndaǵy yntymaqtastyq máselelerin, sondaı-aq «jasyl» tehnologıalardy damytý salasynda, ǵylymı-ınnovasıa sektory men bilim berý isinde baılanystar ornatýdyń perspektıvalaryn talqylady.

Aıta ketetin bolsaq, 2010 jyly Pan Gı Mýn Astanaǵa kelgen saparynda Memleket basshysy Nursultan Nazarbaev beıbitshilik, áleýmettik ádilettilik jáne jahandyq deńgeıdegi turaqty damý salasynda sińirgen aıryqsha eńbegi úshin BUU Bas Hatshysy Pan Gı Mýnniń 1-dárejeli «Dostyq» ordenimen marapattalǵanyn atap aıtty jáne oǵan joǵary marapatty tabys etti.