Shyńjań Uıǵyr avtonomıaly aýdanyndaǵy saıası úırený ortalyqtarynda 1 mıılıon musylman qamaýda otyr. Germanıadaǵy mádenıet jáne teologıa eýropalyq mektebiniń zertteýshisi Adrıan Zens osyndaı derek keltirdi. Bul týraly «Jas Alash» gazeti jazdy.

Basylymnyń deregine súıensek, Zens Qytaıda saıası úırený ortalyqtarynyń bar ekenin naqty dáıekterimen keltirip ótken. Qytaı úkimeti Shyńjańdaǵy 40 eldimekende ornalasqan saıası úırený ortalyqtaryn damytý úshin arnaıy kelisimsharttar tapqan. 2016 jyldan beri Shyńjańnyń túkpir-túkpirinde salynyp jatqan ortalyqtardyń jalpy quny 680 mıllıon ıýánǵa (170 mıllıon dollar) shyǵatyny germanıalyq zertteýshiniń baıandamasynda aıtyldy.

Ortalyqtarda krımınaldy psıhologıa jáne áskerı tájirıbesi bar mamandar jumys isteıdi. Tipti sondaı mamandardy izdeý jumystary da qarqyndy júrip jatqan kórinedi.

Zenstiń baıandamasy Batys jýrnalıseri men zertteýshileri arasynda úlken rezonans týdyrdy.