Bul kúnderi elordamyzdyń «Dáýlet» sport kesheninde bokstan Qazaqstan Respýblıkasynyń Prezıdenti kýbogy ótip jatyr. 15 eldiń 162 boksshysy qatysyp jatqan týrnırde «Astana» Prezıdenttik kásibı sport klýbynyń quramyna kiretin «Astana arlandary» komandasy da bar.

Aıta keteıik, týrnır jeńimpazdaryna Qazaqstan boks federasıasy 2000 AQSH dollarynan taǵaıyndaǵan. Ekinshi oryn ıegerleri 1000 dollarǵa ıe bolsa, jartylaı fınalǵa jetkender 500 dollardan alady. Jalpy, júlde qoryn aıtpaǵanda, týrnırdiń mártebesi óte joǵary. Sondyqtan bolsa kerek, bıyl altynshy ret uıymdastyrylǵan Prezıdent kýbogyna Qazaqstannyń birneshe quramynan bólek, Belarýs, Úndistan, Japonıa, Qyrǵyzstan, Mońǵolıa, Qytaı, Fılıppın, Reseı, Shvesıa, Tájikstan, Taıland, Túrkmenstan, Ózbekstan jáne muhıttyń arǵy jaǵynan AQSH quramasy da kelgen.

Al «Astana arlandary» komandasy úshin QR Prezıdent kýbogy Dúnıejúzilik boks serıasynyń qarsańyndaǵy mańyzdy synaqtardy biri. Búginde elordamyzdyń «Tarlan-Arena» sport kesheninde daıyndyqtaryn pysyqtap júrgen «arlandar» Prezıdent kýbogyna tolyq quramda qatysýda.

Búgin týrnırdiń shırek fınaldyq jekpe-jekteri bastaldy. «Astana arlandary» boksshylary úshin Prezıdent kýbogy sátti jalǵasýda. Máselen, 56 kelidegi Qaırat Eralıev mońǵol boksshysy Mýnhýbaatar Tsaganbaatardy oınap júrip jeńse, dál osy salmaqtaǵy İlıas Súleımenov túrkmen qarsylasy Zarıb Jýmaevty birinshi nokaýdta-aq baýyrdan uryp, tura almastaı etip, búktep tastady. Sol sıaqty, Abylaıhan Júsipov, Aslanbek Shymbergenov jáne Qamshybek Qońqabaev ta óz jekpe-jekterin jeńispen aıaqtap, jartylaı fınalǵa joldama aldy.

Al erteń sharshy alańǵa shırek fınal aıasynda taǵy bir qatar «arlandar» shyǵady. Prezıdent kýbogy 11 maýsym kúni máresine jetpek.