«Sýǵa júzip qaıtaıyq Astanada» dedik. Tolassyz jaýǵan jańbyrdyń kesirinen sý astynda qalǵan baıǵus astanalyqtardyń jaǵdaıyn oılap, Almatyda otyrǵan biz qynjyldyq. Biraq Elordanyń ákimdigi qynjyldy ma, bilmedik. Ázirge temir tehnıka, qara jumysshylar óz jumysyn atqaryp álek. Bul týraly qala ákimdigi san ret baspasóz baıandamasyn jasady. Degenmen máseleniń túıtkili sheshilmegen. Aýa raıy boljamyna sensek, "QazGıdromet" qatelespese, respýblıka kóleminde taǵy da jaýyn-shashyn, burshaq jaýmaq. Al, bas qala bolsa, Venesıa bolyp qala bermek.
Týǵan kúnge 19 mlrd teńgesin aıamaǵan bılik aryq qazdyrýǵa kelgende nege aıanyp qalǵan degen zańdy suraq týyndaıdy. Ne de bolsa Parlament Senatynyń spıkeri Qasym-Jomart Toqaev ashýǵa minip, «Elbasynyń qatań tapsyrmasyna qaramastan Astana jelge tótep berse de, sýǵa tótep bere almaıtyn bolyp shyqty. Astanalyqtar sodan zardap shegýde. Sonymen qatar astanamyzdyń halyqaralyq bedeline nuqsan kelýde. Bul máseleni týǵan kún toılamas buryn sheshýge bolatyn edi ǵoı» depti.
Premer-mınıstr Saǵyntaev óz kezeginde ákimdikti kinálady. «Qalanyń jaǵdaıyna ákimdik jaýap beretinin bilemiz. Qaıtalap aıtamyn, qalada oryn alǵan kez kelgen jaǵdaıǵa ákimıat baspen jaýap beredi. Turǵyndar men qoǵamdyq kólik japa shekpeýi tıis. Másele tek ımıjde emes. Bul jaman ádetke aınalyp bara jatyr. Sý astynda qalyp jatqan sol baıaǵy kósheler, sol baıaǵy aýdandar. Aryqtardy ýaqytynda tazalap otyrý maqsat» dep jaýap qatty Baqytjan myrza.
RMK "QazGıdromettiń" baspasóz hatshysy Gúlvıra Janbaevanyń aıtýy boıynsha jańbyrdyń mólsherden tys jaýatyndyǵy jaıly aqparat Astana qalasynyń Tótenshe jaǵdaılar departamentine, ákimıatqa aldyn-ala berilgen bolatyn. "Olar óz kezeginde turǵyndarǵa sms-habarlama jiberdi. Óz basym áleýmettik jelilerge, jergilikti jýrnalıserge aýa raıy boljamy týraly aqparat tarattym" dedi baspasóz hatshysy.
Astananyń myna múshkil jaǵdaıy «Nuh» kınosyn eske saldy. Jaýyn-shashynnyń mólsherden tys jaýatynyn "QazGıdromet" bilse de (kúmánimiz bar-avt.) bilmegendeı qyldy. Dabyl qaǵatyn Nuh paıǵambar (ǵ.s.) joq. Qutqaramyn deıtin de Nuh paıǵambar (ǵ.s.) joq. Tapsyrma beretin, aıtýyn aıtatyn Nursultanymyz bar, oǵan biraq qulaq asatyn, jaýapkershilikti moıynmen kótere alatyn ákim joq. Ne deımiz, astanalyqtarǵa Jaratýshy Iemiz sabyr bersin, aýrý-syrqaýdan qarttar men balalardy saqtaı kórsin!
Nazarlaryńyzǵa ""QazGıdromettiń" aldaǵy úsh kúnge arnalǵan aýa raıy boljamyn usynamyz: "Salqyn jáne jańbyrly. 2018 jylǵy 23-25 tamyzǵa arnalǵan boljam: Qazaqstannyń soltústik bóligine Jańa Jer aımaǵynan sýyq aýa massalary túsetin bolady. Sondyqtan kúzgi, bultty, jańbyrly aýa-raıy, 24-25 tamyzda soltústik oblystarda qatty jańbyr jáne ekpindi jel, aýa temperatýrasy túnde 5-13 gradýsqa deıin, kúndiz 10-18 gradýs jylyǵa deıin kútiledi. Tek ońtústik óńirlerde jaýyn-shashynsyz jyly aýa-raıy saqtalady.
