Páterdegi jańbyr! Óskemendegi jańa úıge qonys tepken turǵyndar qurylys jumystarynyń sapasyna alańdaýly. Qatty nóserden soń baspanalaryna sý ketip, mazalary qashqan. Memlekettik baǵdarlama arqyly, sondaı - aq, "Samuryq Qazyna" turǵyn-úı qorynyń qarjylandyrylýymen salynǵan úılerdi turýǵa jaramsyz dep tapqan otbasylar, jańa qonystarynan bas tartpaq. Bul týraly Eýrazıa birinshi arnasy habarlaıdy.
Páterleriniń shuryq-tesik ekenine kózderi jetken turǵyndar jaýynnan keıin baspanada túsirilgen vıdeo jáne fotosýrettermen bólisip álek. Kadrlardan nóserdiń saldaryn anyq baıqaýǵa bolady. Jańbyr úı ishine shelektep aqqan.
«Proshel obılnyı dojd, vot my vıdım ego posledstvıa, nashı doma prınálı na sebá etot ýdar. No onı ne proshlı bessledno.
Shaıanbaevtar otbasy birneshe aı buryn ǵana qonys toıyn toılaǵan. Sý jańa baspanadaǵy balalar bólmesin sý basqan. Qurylystyń sapasyz júrgizilgeni kózge uryp tur: úı qabyrǵalary sógilip, shatyr tesilgen. Al mundaǵy otbasylar nesıege alynǵan osy páterler úshin on bes jyl boıy aı saıyn 120 myń teńge tóleýge mindetti.
«Iá, maıda osyndaı jaǵdaı boldy, bári aıtylǵan. Zastroıshık dırektoryna zvondap ta aıttyq. Tórt aı ótti, osy ýaqyt ishinde eshteńe istelmedi. Podrádchıkter izdep jatyrmyz dep aıtady» - deıdi qala turǵyny İlıas Shaıanbaev.
Turǵyn-úı kesheni 2015 jyly paıdalanýǵa berilgen. Al turǵyndardyń kóbi tek osy jazda kóship kelipti. Kele sala merdiger kompanıadan nysandaǵy aqaýlardy tez arada joıýdy talap etken. Al jańbyr jaýǵan saıyn turǵyndar qurylysshy kompanıaǵa osylaı dep qulash-qulash aryz da jazǵan eken. Úıde turý múmkin emestigin dáleldeý úshin tipti foto jáne vıdeo túsirip jibergen. Alaıda, shaǵymǵa qulaq asar eshkim joq. Qarasha aıynda turǵyn úı kesheniniń kepildik merzimi bitedi. Ol kezde merdiger kompanıa óz mindetinen qutylyp, qurylystyń kem-ketigin turǵyndardyń ózderi túzeıtin bolady.
«Kórshilerdiń bári chatqa jazdyq. Onyń bárin "Samuryq Qazyna", "Tehnogrýpp" sekildi mekemelerge jiberdik. Foto da, vıdeo da. Biraq eshbirinen kómek kelmedi, jaýap kelgen joq. "Jasaımyz, jasaımyz", deıdi. Biraq eshteńe istemeıdi» - deıdi qala turǵyny Erkejan Nurtazına.
Qurylys kompanıasyndaǵylar máseleni zerttep, sebebin taýypty. Úı jobaǵa saı salynǵan, biraq sapasy nashar materıaldar qoldanylypty.
«Sapa jaıyn qabyrǵa panelderin jasaýshy zaýyttan suraý kerek. Úıdiń qańqasyn sol panelderden turǵyzǵan edik. Problemany qalaı sheshemiz? Saıdıngpen qaptap shyǵamyz. Kóp úıde osy tehnologıa qoldanylyp jatyr» - deıdi qurylys kompanıasy dırektorynyń óndiris jónindegi orynbasary Alekseı Pımenov.
Másele sheshimin tapqanymen, turǵyndardyń kóńili tynyshtalar emes. Mundaǵy otbasylar memlekettik baǵdarlama sharttarynda qarastyrylsa, osy páterlerdiń baǵasymen teń basqa baspanaǵa kóship keter edik, deıdi. Endi baspana ıeleri kúzdiń jaýyn-shashynsyz bolyp, merdiger kompanıanyń jóndeý jumystaryn az ýaqyttyń ishinde jasap bitirýin kútip otyr.
