Gennadıı Golovkınnen WBC, WBA (Super) jáne IBO belbeýlerin tartyp alǵan meksıkalyq Saýl "Kanelo" Alvarestiń kelesi qarsylasy kanadalyq Davıd Leme bolýy múmkin. Bul týraly Vesti.kz Las-Vegastaǵy baspasóz máslıhatyna silteme jasap habarlady. 

"Kanelomen" úlken jekpe-jek ózimdi kórsete alatyn jaqsy múmkindik bolatyn edi. Árıne, onymen judyryqtasqym keledi. Bul jekpe-jekti ótkizýge bolady dep oılaımyn. Dıvızıondaǵy eń myqty boksshymen judyryqtasqym keledi jáne ony jeńe alamyn dep esepteımin. Golovkın týraly aıtsaq, men úsh jyl aldyndaǵydaı emespin. Qazir múmkindikterimdi jaqsy baǵalaı alamyn", - deıdi Leme.

Aıta keteıik, kanadalyq boksshy Golovkın - Alvares boks keshiniń anderkartynda ırlandıalyq Gerı "Spaık" O'Sallıvandy alǵashqy raýndta nokaýtqa jibergen. 

Al Alvarestiń promoýteri Oskar De La Hoııa meksıkalyq pen Lemeniń jekpe-jegi jyl aıaǵyna deıin ótýi múmkin ekenin aıtady: "Múmkin jeltoqsanda judyryqtasady. Aldymen jaǵdaıǵa saraptama jasap, boksshylardyń jaǵdaıyna baǵa berý kerek", - deıdi De La Hoııa.

Aıta keteıik, 28 jastaǵy meksıkalyq «Kanelo» Alvares 36 jastaǵy qazaqstandyq Gennadıı Golovkındi jeńdi. GGG kásipqoı boksta ómirinde alǵash ret jeńildi. Osylaısha Golovkınniń tıtýldarynyń bárin «Kanelo» aldy. Gennadıı Golovkın osyǵan deıin 39 jekpe-jek ótkizip bireýinde ǵana teń túsken bolatyn. Al  Saýl Alvares bolsa 52 kezdesýiniń ekeýinde teń túsip, Flod Meıvezerge ese jibergen