Qazaqstan ishki ister mınıstrligi Qylmystyq-atqarý júıesi komıteti (QAJK) Azattyqqa Muhtar Jákishevtiń advokaty Nurlan Beısekeevtiń ótinish hatyn alǵandaryn rastady. Advokat Jákishevtiń hál ústinde jatqan naýqas anasymen kezdesýine ruqsat berýin suraıdy. Komıtet ókili Jákishev advokatynyń ótinishine qatysty jaýap "sálden soń beriletinin" aıtty dep jazady Qamshy.kz aqparat agenttigi Azattyqtyń deregin negizge alyp. 

İİM men QAJK basshylyǵyna jibergen ótinishinde advokat Beısekeev qylmystyq-atqarý kodeksininiń 113-babynyń 1-tarmaǵyna silteme jasaıdy. Oǵan sáıkes, "jazasyn óteýshi jaqyn týysynyń qaıtys bolýyna nemese naýqastyń ómirine qater tóndiretindeı qatty aýyrýyna baılanysty, barý-qaıtý jolyna qajet (bes táýlikten aspaıtyn) ýaqytty eseptemegende, jeti táýlikten aspaıtyn merzimge túzetý mekemesinen shyǵýyna" quqyǵy bar.

Advokat mınıstrlik pen komıtetti Muhtar Jákishevti anasynyń jaǵdaıy jaıly habardar etýdi jáne Semeı qalasyndaǵy OV 156/14 túzetý mekemesiniń basshylyǵyn atalǵan baptyń oryndalýyn qamtamasyz etýdi suraıdy.

Muhtar Jákishev 2009 jyly mamyrda ustalǵan soń sybaılas jemqorlyq qylmysyn jasady dep aıyptalyp, 14 jylǵa sottalǵan. Ol jazasyn óteýge aldymen Almaty oblysyndaǵy Zarechnyı kentindegi túrmege jiberilgen, keıin Qaraǵandy oblysynyń Dolınka kentindegi qatań rejımdegi AK-159/6 kolonıasynda boldy. 2015 jyly týystary, advokaty men quqyq qorǵaýshylardyń ótinishiniń arqasynda ol Dolınkadan qaıta Zarechnyıǵa jiberilgen. Biraq 2017 jyly UQK-niń burynǵy tóraǵasy Nartaı Dútbaevtyń isine qatysty tergeý isine qatysý úshin Astana qalasynyń ızolátoryna etappen jiberilgen. Tergeý isi aıaqtalǵan soń mamyr aıynda Dolınkaǵa, al shilde aıynan beri Semeı qalasyndaǵy qatań rejımdegi kolonıada jazasyn ótep jatyr.

55 jastaǵy Muhtar Jákishev saıasatpen aınalyspaǵanymen, 2013 jyly qazaqstandyq birqatar quqyq qorǵaý uıymdary ony saıası tutqyn dep tanyǵan.