Jabaı batyr týraly buryn-sońdy estýińiz bar ma? Osydan 300 jyl buryn ómir súrgen Jabaı batyr zerttelmegen taqyryptardyń biri. 15 qyrkúıekte Jabaı batyrdy halyq arasynda keńinen nasıhattaý maqsatynda "Tikken týy jyǵylmaǵan Er Jabaı" atty ǵylymı-konferensıa ótti dep jazady Qamshy.kz aqparat agenttigi. Ǵylymı konferensıany aqyn Almas Ahmetbekuly júrgizip, moderatordyń qyzmetin atqardy. 

Jabaı  Qarabıuly  1680 jyly Soltústik Qazaqstan oblysynyń Jambyl aýdanynda dúnıege kelgen. Ol - qol bastaǵan bilikti áskerbasy, batyl batyrlardyń biri. Jabaı batyr jastaıynan kereıden shyqqan Qojabergen men onyń inisi Dástem sardardan, Balta Tursynbaıdan úlgi-ónege alǵan.

Tarıhı jyr-dastandar men kórkem shyǵarmalarda, ǵalymdardyń ǵylymı eńbekterinde esimi kezdesetin Jabaı batyr Orta júz Abaq kereı rýynan shyqqan. Profesor Zýfar Seıtjanuly óziniń ǵylymı maqalalarynyń birinde:  "Jánibek batyr jaý (qalmaq) qorshaýynda qalǵan kezde qazaqtar qarap turmaı lap qoıady. Jappaı shaıqas bastalady. Bul shaıqasta Jánibek ǵana emes, Qabanbaı, Bógenbaı, Oljabaı, Er Jabaı sekildi batyrlar erlik kórsetti", dep jazǵan. Sonymen birge Jabaı batyrdyń shyqqan eli týraly málimetterdi kezdestirýge bolady. 

Atalmysh sharada belgili tarıhshylar men fılologtar Jabaı batyr týraly tyń derekterdi jınaqtap, baıandama oqydy. Ǵylymı-konferensıaǵa qatysýshylar tarıhı derekterge súıenip, Qazaq handyǵynyń tarıhyn zertteýshiler men qazaq batyrlarynyń shejirelerin taratyp, ómirbaıanynan habardar ǵalymdardyń sózine júginip baıandama ázirlegen. 

"Birinshiden Er Jabaı batyrǵa arnalǵan konferensıa erterek ótý kerek edi. Degenmen eshten kesh jaqsy. Sońǵy ýaqytta jergilikti BAQ-tar men áleýmettik jelilerde "qazaqtarda batyr kóp, joq jerden batyr jasap alady", degen pikir jıi aıtylyp, jazylyp júr. Negizi qazaqta batyr kóp bolǵandyqtan elimiz osyndaı deńgeıge jetip otyr dep esepteımin. Qazaq batyryn zerttep, zerdeleýden sharshamaý kerek, jalyqpaý kerek. Ǵylymı konferensıalardyń uıymdastyrylýy jaqsy ǵoı, árıne, biraq ǵylymı dessertasıa ne monografıa jazylyp, zertteý jumystary júrgizilmeı taqyryp tarıhta bekitilmeıdi. Aldaǵy ýaqytta Er Jabaı týraly ǵylymı monagrafıa jaryq kóredi. Osyǵan uqsas zertteý eńbekteri kóbeıse, Jabaı batyrdyń aty ólmeıdi. Sonymen birge Jabaı batyr týraly derekter mektep jáne ýnıversıtet oqýlyqtaryna engizilýi kerek",- dep pikir bildirdi tarıh ǵylymdarynyń doktory, profesor Zıabek Ermuhanuly.

Ǵylymı konferensıada birqatar usynystar aıtylyp, keıin konferensıaǵa kelgen qonaqtarǵa Jabaı batyrdy eske alyp, duǵa baǵyshtaý maqsatynda as berildi. 

Ǵylymı-konferensıada jasalǵan usynystar:

1. Ǵylymı konferensıada jasalǵan baıandamalar jınaq bolyp shyǵarylyp, elimizdegi iri kitaphanalarǵa taratylsa;
2. Qazaqstan tarıhy jáne ólketaný oqýlyqtaryna Jabaı batyr týraly málimetter engizilse;
3. Er Jabaıǵa Qyzyljar, Astana sekildi qalalarda eskertkishter salý qolǵa alynsa;
4. Elimizdegi birqatar kósheler Jabaı batyrdyń atymen atalsa;
5. Er Jabaıdyń atymen atalatyn qoǵamdyq qor quryp, el aýzynda saqtalǵan tarıhı áńgimelerdi, sheteldegi derekter men ózimizdiń muraǵatta saqtalǵan derekterdi jınaqtaý jumystary jasalsa;
6. Astanadaǵy Qorǵanys mınıstrliginiń ortalyq murajaıyna Er Jabaıdyń urpaqtarynda saqtalǵan zattar qoıylsa;
7. Er Jabaıdyń jerlengen jerin anyqtap, mazar turǵyzylsa;
8. Elimizdegi bedeldi oqý oryndaryndaǵy tarıh jáne ádebıet mamandyqtarynda oqıtyn daryndy stýdentterge Er Jabaıǵa qatysty magıstrlik jáne doktorlyq dısertasıalaryna taqyryp bekitilse;
9. Qazaq tarıhy men Otan tarıhy sekildi tarıhı baǵyttaǵy jýrnaldarǵa Er Jabaı týraly derekter jıi jarıalansa;
10. QR JOO-daǵy tarıhı derekterdi zerttep, zerdeleýge beıim  talantty, daryndy stýdentterge urpaqtarynyń atynan "Jabaı batyr atyndaǵy stıpendıa" taǵaıyndalsa;