Ult ustazy Ahmet Baıtursynulynyń Qazan qalasyndaǵy fotosy tabyldy. Bul týraly ǵalym Qaıyrbek Kemeńger Egemen Qazaqstan gazetine jarıalanǵan maqalasynda aıtty. 

Qundy sýret qyrkúıek aıynyń basynda Tatarstan astanasyndaǵy ulttyq mýzeıden shyqqan. Biraq ol jerde Ahmet Baıtursynulynyń esimi jazylmapty. Tek tatar zıalysy Muhammed Idrısovtyń aty-jóni kórsetilgen. Áıtse de, bizdiń ǵalymdar ult ustazyn birden tanyǵan. Mýzeı mamandary alǵashynda sýretti túsirýge ruqsat bermeı, keıin kelisimge keledi. 

Qaıyrbek Kemeńgerdiń aıtýynsha, Ahmet Baıtursynulynyń Qazan qalasynda buryn-sońdy bolǵany týraly buǵan deıin aqparat aıtylmaǵan.

«Ahmet Baıtursynuly Qazan qalasyna keldi degen aqparatty buryn estimedik... «Kelgeni sózsiz, muny osy sýret rastaıdy» dep oı túıdik. Bir esepten, muraǵat materıalyna muqıat tatar aǵaıyn sýrettiń qaıda jáne qashan túsirilgeni jaıynda olqylyq jibere qoımas dep te oıladyq»,–deıdi ol.