AQSH-tyń Vashıngton qalasynda jerlengen jazýshy Muhtar Maǵaýınniń qabirine týǵan eldiń topyraǵy men jýsany jetkizildi.
Muhtar Maǵaýınniń uly Edige Maǵaýın ata-babalary jerlengen kıeli mekennen topyraq alyp, ákesiniń zıratyna qoıdy.
Zıaratqa Vashıngtondaǵy Kazakh American Association uıymynyń ókilderi de qatysty. Bul týraly Saparbek Naǵashybekov Facebook paraqshasynda habarlady.
«Búgin Vashıngtonǵa jaqyn jerde, qazaqtyń uly jazýshysy, abyzy Muhtar Maǵaýınniń qabirin zırat etip, qazaqtyń «topyraq aparý» dástúri jasalyp, atamyzǵa quran baǵyshtaldy. Qabyl bolsyn. Muhtar atamyzdyń uly Edige aǵamyz Qazaqstandaǵy ata babasy jerlengen jerden alyp kelgen topyraq pen jýsandy atamyzdyń qabirine kómdi», — dep jazdy ol.
Aıta keteıik, Qazaq ádebıeti men tarıhyn zerttep, ólmes mura qaldyrǵan Muhtar Maǵaýın 85 jasyna qaraǵan shaǵynda 9 qańtar kúni AQSH-tyń Merılend shtatyndaǵy úıinde qaıtys boldy. Jerleý rásimi 11 qańtarda Parklawn Memorial zıratynda ótti.
