Taıqazannyń Túrkistanǵa qaıta oralǵanyna otyz bes jyldan asty. 1989 jyly Peterbýrgten Áziret Sultanǵa jetkizilgen uly jádigermen birge tarıhı ádilet te elge qaıtty.
Bul sheshimge bir qujattyń quny jetti, al ony jolǵa salýǵa tutas býyn janyn saldy.
Arhıvten bastalǵan oralý
Túrkistannyń kóne tarıhyn zerttegen tarıhshy Zikirıa Jandarbek Ermıtajǵa eki márte baryp, derek izdedi. Sol saparlarda mýzeı dırektory, shyǵystanýshy Mıhaıl Pıotrovskıı qazaq zertteýshisine Taıqazandy kórsetti. Máseleniń kilti muraǵatta jatqan qolhatty tabýǵa tireldi, óıtkeni onda qazannyń ýaqytsha saqtaýǵa alynǵany jazylǵan edi.
Qujat tabyldy. Sodan keıin kelissózder júrdi, 1989 jyly Taıqazandy Qazaqstanǵa qaıtarý týraly tarıhı sheshim qabyldandy.
Eki júrgizýshi, on kúndik sapar
Záýlim qazandy tasý mindeti sol kezde qurylys mekemesinde júrgizýshi bolǵan Moldahan Jolymbetke júkteldi. Ol serigimen qyrkúıekte jolǵa shyqty. Peterbýrgke olar 4 kúnde jetti, al eń aýyr kezeń Taıqazandy tıeý kezinde týdy.
Mýzeı aýlasyndaǵy kran kúshke shydamady, salmaǵy 2 tonnaǵa jýyq qazan kóterilmedi. Arnaıy tehnıka Fınlándıadan kútildi, ýaqyt sozyldy. Qaıtar jolǵa olar tek on kún degende shyqty.
Saparǵa qatysqan Sheraly Berkinbaev bul isti el aldyndaǵy borysh sanady, al búgin ol kún otbasylary úshin urpaqqa aıtylatyn maqtanyshqa aınaldy.
Qaıtarǵan qaısar qaıratkerler
Taıqazandy elge ákelý isine memleket jáne qoǵam qaıratkeri Ózbekáli Jánibekov aıryqsha yqpal etti. Ol Ermıtaj basshylyǵymen birneshe ret kezdesip, istiń ilgerileýine jol ashty. Sol ýaqytta «Áziret Sultan» mýzeı-qoryǵyn Nurmahan Nazarov basqardy, úlken uıymdastyrý jumysyn osy ujym atqardy.
Mýzeı-qoryqtyń ýaqytsha dırektory Nurlan Dúkenbaevtyń aıtýynsha, qazan qazir keseneniń qaq ortasyna qoıyldy, ony jyl saıyn shamamen 1 mıllıon adam kóredi.
Nege Taıqazan mańyzdy?
Taıqazan – jaı ǵana mádenı mura emes, bereke, birlik, yntymaqtyń belgisi sanaldy. Tutas túrki dúnıesiniń rýhyn tanytqan osy relıkvıanyń tarıhı ornyna qaıtýy ult jadyna dem berdi, táýelsizdikke bet alǵan tusta qazaq qoǵamynyń eńsesin tiktedi.
Bul týraly Qamshy.kz aqparat agenttigi habarlaıdy.
