Qazirgi ýaqytta Ýkraınanyń Kerch buǵazyndaǵy tótenshe oqıǵaǵa baılanysty 30 kúndik áskerı jaǵdaı engizilgeni belgili. Alaıda, osyǵan baılanysty ýkraındyq qoǵamnyń pikiri ekige jaryldy.  «Bul Poroshenkonyń aldaǵy bolatyn prezıdenttik saılaý qarsańyndaǵy saıası amal-tásili» dep jatqandar da bar. Aqıqatyna kelsek, áskerı tótenshe jaǵdaı kezinde elde mıtıń pen narazylyq sharalaryn jáne kóshede sherý ótkizýge bolmaıdy. «Muny aldyn ala oılastyryp, Poroshenko ádeıi istep otyr» dep ózge partıalar da málimdeme jasap jatyr. «Bizdiń kóshege shyǵyp, halyqpen tikeleı tildesýimizge múmkindik bermeı otyr» deýshiler de tabylýda.

Biraq Bloomberg telearnasyna bergen suhbatynda prezıdent Petr Poroshenko áskerı jaǵdaıdyń prezıdenttik saılaýǵa esh qatysy joq  jáne onyń merzimin uzartýdyń keregi joq ekenin aıtty.

–Eger biz aldaǵy ýaqytta prezıdenttik saılaýdyń merzimin uzartsaq, onyń jeńimpazy bir-aq adam bolar edi. Ol jeńimpazdyń aty-jóni – Vladımır Pýtın. Sondyqtan biz oǵan esh múmkindik bermeýimiz kerek, –dedi Petr Poroshenko.

Bul jerde ýkraın basshysy "prezıdenttik saılaýdyń ýaqytyn taǵy uzartsaq, oǵan Kreml aralasýy múmkin" degendi meńzep otyrsa kerek.

Ýkraına prezıdentiniń aıtýynsha, «elde áskerı jaǵdaı engizý  ýkraın halqynyń konstıtýsıalyq quqyn buzbaıdy. Bul amal eldiń qorǵanys qabiletin nyǵaıtý úshin kerek».

Qazirgi ýaqytta áskerı jaǵdaı eldiń 10 oblysyna 29 qarashadan bastap engizilgeni belgili.

Eskerte keteıik, Qara teńizdiń Kerch buǵazynda Reseıdiń teńizdegi memlekettik shekarasyn buzǵan ýkraındyq úsh  áskerı korabldi orystar oq atyp, toqtatqan. Sodan beri ýkraındyq kemeler buǵazda qańtarýly tur. Al ustalǵan 23 teńizshige qatysty sot - tergeý amaldary júrgizilýde. Al Poroshenkonyń 60 kúndik merzimdik áskerı jaǵdaıyn Joǵary Rada depýtattary 30 kúnge qysqartty. Ázirge prezıdenttik saılaýǵa túsetini týraly  Petr Poroshenko málimdeme jasaǵan joq. Biraq prezıdenttik saılaýǵa ázirlik jeltoqsan aıynyń sońynda bastalady. Eldegi sosıologıalyq «Reıtıń» tobynyń málimdemesine qaraǵanda, qazirgi ýaqytta «Batkovshına» partıasynyń basshysy Iýlıa Tımoshenkonyń reıtıńi óte joǵary tur. Boljamǵa sensek, ol Poroshenkodan 17 paıyz alda keledi. Al prezıdent Poroshenkoǵa zertteý barysy kórsetkendeı, saılaýshylardyń 10 paıyzy ǵana daýys berýge daıyn sekildi.