Almatyda Denıs Tenniń urylarmen jaǵa jyrtysyp jatqanyn kórgen polıseıler jaýapqa tartylýy múmkin. Bul týraly aldyn ala sot tyńdalymy barysynda jábirlenýshi taraptyń qorǵaýshysy Nurlan Óstemirov aıtty, dep habarlaıdy Qamshy.kz aqparat agenttigi QazAqparattyń málimetine súıene otyryp.

«Vıdeosy bar. Kýágerler túsip qalǵan. Eki polısıa qyzmetkeri júr. Olar ne istep júr onda? Qazir olarǵa qatysty ulttyq búro qylmystyq is qozǵap jatyr. Biraq olar ázirge shara qabyldamaǵany úshin tartylyp jatyr. Tapsyrys berýshiler bolýy yqtımal. Qıasov Denıstiń ólimin óz moınyna alyp otyr. Vıdeoda kóringendeı, ol artqy jaǵynan kelgen. Al artqy jaǵyndaǵy adam qalaısha adamnyń aldyna kelip, sanynyń ishki jaǵynan pyshaqtyń júzin joǵary qarata tiledi. Týra has sheber sıaqty. Tamyryn tilý úshin istelgen dep oılaımyz. Sondyqtan, iste basqa da kúdiktiler bolýy múmkin ekenin joqqa shyǵarmaımyz», - dedi qorǵaýshy Óstemirov.

Munyń aldynda sottalýshylardyń jeke basy týraly málimet belgili boldy. Sottalýshy Janar Tolybaeva óziniń júktiliktiń 6,5 aılyǵynda ekenin málimdegen bolatyn. Kelesi sot otyrysy 3 qańtarǵa tańerteńgi 10-ǵa belgilendi.

Eske salsaq, Denıs Tendi bıyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.

Denıs Tenniń ólimine qatysty qylmystyq isqozǵalyp, kúdiktiler izdestirildi.

Elbasy Denıs Tenge qatysty qylmysty muqıat tekserýdi tapsyrdy. Keıin QR İİM kúdiktilerdiń ustalǵanyn jarıa etti.

Al, qyrkúıek aıynyń sońynda İshki ister mınıstri Qalmuhanbet Qasymov atalmysh qylmystyq istiń tergelýine qatysty málimet bergen bolatyn.

Keshe Almaty qylmystyq ister boıynsha aýdanaralyq mamandandyrylǵan sotta belgili sportshynyń ólimi boıynsha aldyn ala sot tyńdalymy ótti.