Qazaqstandyq aralas jekpe-jek sheberi Beıbit Nazarov jeńil salmaqta Titan FC ýaqytsha chempıondyq belbeýi úshin ótken jekpe-jekte jeńilip qaldy. Almatyda ótken týrnırdiń basty jekpe-jeginde otandasymyz amerıkalyq Martın Braýnǵa ese jiberdi. Osy jaıtqa baılanysta Ardaq Nazarovtyń ınstagram paraqshasynda "Bitken iske - synshy kóp...bárinen baýyr qymbat" degen jazbasy halyq tarapynan qyzý talqyǵa ushyrap, arty daý-damaıǵa ulasty. Ardaq Nazarovtyń azamattyǵyna shúbá keltirmeıtindigimizdi erekshe atap ótkimiz keledi. Alaıda "Qamshy" erkin oı-pikir alańy ekendigin eskere otyryp, Ardaq Nazarovtyń ashynǵan jazbasymen qatar áriptesimiz Berikbol Tólegenniń qara qyldy qaq jarǵan pikirin de oqyrman nazaryna sol qalpynda usynýdy jón sanadyq. "Sport degen - ádildik" uǵymyn jalaý etip, "bas kespek bolsa da, til kespek" joq ekendigin eki tarap ta túsinse degen nıettemiz. Qazaq jigitteriniń namysty qoldan bermeı, jeńis tuǵyrynan kórinýine tilektespiz.
Ardaq Nazarov:
"Bitken iske synshy kóp... bárinen baýyr qymbat!
Keshegi meniń basymdaǵy jaǵdaı taýǵa tússe, taý úgilip, temirge tússe, temir balqyp keter edi.
Osy kúnge jetý úshin qanshama qıyndyqtan óttik. Qandaı qıyndyq deseńizshi, bul uzaq áńgime...
Jarysqa shyqqan baýyrlarymnyń ata-analaryna shyn júrekten alǵysymdy aıtamyn. Sizder naǵyz batyr uldardy tárbıelep ósirgensizder. Alla qalasa, asyl uldaryńyz Qazaq eline áli talaı jeńis syılaıtyn bolady. Ómir bolǵan soń ystyq sýyǵy qatar júredi. "Er jigittiń moınynda qyl arqan shirimeıdi"-deıdi dana babalarymyz...
Biz eki jyl nátıjeli jumys jasap, Amerıkalyq promoýshndy Qazaqstanǵa alyp kelýimizdiń ózi úlken jeńis. Mundaǵy maqsatymyz – jigitterdiń deńgeıin álemdik shyńǵa kóterý. El úırengendeı qarsylastardy tańdap alyp kelip, barlyǵyn sabap jibergennen sportshylarymyz óspeıdi. Osyndaı jarystar arqyly jigitterimiz ósedi. Biz jańa beleske shyqtyq. Ádil jarys boldy. Myqtynyń baǵy jandy. Úlken tájirıbe aldyq. Kemshiligimizdi, qatelikterimizdi kóre bildik. Bárinen qymbat nárse – ol baýyrmaldyq. Baýyr jaqsylyǵyn asyrady, kemshiligin jasyrady. Men qasymdaǵy baýyrlarymdy eshqashan tastamaımyn. Olarǵa tıgen árbir soqqy meniń júregime tıedi...
Baýyrlarym!
Myń teńgege bılet alyp, jankúıer bolýǵa shamasy jetpeı, jeńseń, kóre almaıtyn "Oı, álsizdi ádeıi ákeldi", "oıbaı, satyp alypty jeńisti", jeńilseń, jerden alyp jerge salatyndarǵa MOIYMAŃDAR!!!
Bizdiń maqsatymyz úlken. "It úredi, kósh júredi".
Tilekshi bolǵan kúlli Qazaq Eline Alla razy bolsyn.
Bul túsingen adamǵa úlken beles, Jeńis bolsa da, basqa bolsa da, Allaǵa maqtaý aıtamyz.
Allaǵa shúkirshilik... halqyma rızamyn".
Berikbol Tólegen:
"Aıtpasa sózdiń atasy óledi. "Álemfaıters" jigitteri Almaty Arenada jekpe-jek ótkizdi. Týrnırdiń basty jekpe-jegine shyqqan Beıbit Nazarov jeńilip qaldy. Ardaq Nazarov óziniń ınsta paraqshasynda mundaı týrnırlerdi ótkizýdiń ózi jetistik ekendigin jazyp, túsindirgisi keldi. Postyna óz pikirimdi jazyp, usynysymdy aıtqanmyn. Ol kisi sózge kelmeı buǵattap tastaýdy jón kóripti. Sol pikirdi sizderdiń nazarlaryńyzǵa usynyp otyrmyn. Sonymen men ne jazdym?
"Jigitter, baýyr men rýdyń namysynan qazaqtyń namysy bıik bolýy kerek edi. Jekpe-jek pen astyndaǵy pikirlerdi tolyq oqyp shyqtym. Halyqtyń 90 paıyzy renjýli. "Halyq aıtsa, qalt aıtpaıdy" deıdi. Halyqtyń syn-pikirin "kóre almaýshylyq" dep qabyldaýdy qoıý kerek. Odan keıin kishigirim bir týrnırdi jeńip, "Álem chempıonymyz" dep aıtýdy qashan qoıasyzdar? Radıoda júrgenimde Beıbitpen suhbattasqan edim. Eshnárseni ashyp aıtpaıdy. Iá, ınternetten shyqpaıtyn, ıá, resmı saıty joq týrnırdi utyp, chempıon boldyq degen soń jýrnalıser de jaza salady. Derekkóz ózderi ǵana. Sonymen, sizder álem chempıonysyzdar ma, álde kishigirim tujyrym chempıonysyzdar ma? Bul týrnırdi jeńgen qazaqqa UFC-ge jol ashylar ma edi? Beıbit óte dármensiz boldy. Bitkennen keıin qolyn kóterýi de uıat. 2013-tegideı astyna jyǵyp beredi dep oılady ma eken? Nege myqty qazaqtardy basty kezdesýge shyǵarmadyńyzdar? Biz baýyrlarymyzdy ótirik maqtaǵanymyzben, jetistigine shyn qýana almaımyz. "UFC-ge shyqqan tuńǵysh qazaq" degen ataq úshin qanshama adamnyń joly kesildi. Qaıta, shúkir, shetel qazaǵy bul ataqty ıelenip qoıdy. Qashanǵy myń klýb ashyp, bir-birlerińizdiń jaldaryńyzǵa jarmasa beresizder? Sizderdi Azamat retinde jáne úlgili otbasy retinde qatty syılaımyn. Biraq sizder kásibı myqty sportshy emessizder. Sportshynyń mindeti sportta jetistikke jetý, qazaqtyń jaýyngerlik rýhyn tanytý. Shyn patrıot bolsańyzdar, pendeshilikten eldiń namysyn bıik qoıyńyzdar. Sózben emes, ispen".
Osy sóz Ardaq Nazarovqa jaqpady. Nazarovtarǵa degen syı-qurmetim erekshe edi. "Adamnyń kóńili bir atym nasybaıdan qalady" deýshi me edi. Bul jigitterdiń osy is-áreketi, odan qaldy UFC-ge shaqyrdy degen shyndyqqa janaspaıtyn aqparatpen halyqty aldaǵysy keletindigi meniń olarǵa degen qurmetimdi joǵaltyp jiberdi. "Platon meniń dosym, biraq shyndyq odan qymbat". Meniń aıtpaǵym – osy. Ardaq baýyrymyzdyń eldiń aldynda júrgen bedeline jaǵynyp qolpashtap qoıýǵa da bolar edi. Odan biz ósemiz be?! Qazir shoý-bızneste de, sportta da kemshiligin aıtsań kóre almaǵanyń. Iá, ras, men tek sózi men isi alshaq ketpeıtin "dostoınyı" jigitterdi kórgim keledi. Solarǵa jankúıermin!".
