Qazaqstandyq kásipqoı boksshy Rýslan Madıev (12-1, 5KO) Gennadıı Golovkınge ókpeli ekenin aıtty dep habarlaıdy Qamshy.kz aqparat agenttigi prosports.kz saıtyna silteme jasap.
Rýslan qazir Qaraǵandyda jattyǵyp júr. Aıtýynsha, dál qazir AQSH-ta judyryqtasýǵa quqy joq. Óıtkeni promoýterler GGG Promotions kompanıasymen kelisimshartym joq degen qaǵaz talap etip jatqan kórinedi.
– Endigi áreketińiz qandaı?
– Jarty jyl judyryqtaspadym. Biraq babymdamyn, kez kelgen ýaqytta sharshy alańǵa shyǵýǵa daıynmyn. GGG Promotions áli de eshteńege qol qoıǵan joq.
– Naýryzdyń sońynda Almatyda úlken boks keshi ótedi. Buǵan qatysýyńyz múmkin be?
– Qazaqstanda jekpe-jek ótkizsem, eshteńe bolmaıtyn shyǵar, biraq Amerıkada judyryqtasa almaımyn. Sebebi meni sottaýy múmkin.
– Demek, Almatyda judyryqtasa alasyz ba?
– Iá, jarys uıymdastyrýshylarymen sóılesý kerek. Eger kelisimge kelsek, sharshy alańǵa shyǵa alamyn. Jattyǵý bir bólek, resmı jekpe-jekke eshteńe jetpeıdi.
– Meniń bilýimshe, sizde GGG Promotions-pen kelisimshart bolǵan joq?
– Iá, kelisimshart bolǵan joq. Jaqynda Golovkın suhbat berip, óz kompanıasynda eshqandaı boksshymen kelisimge otyrmaǵany týraly aıtqan bolatyn.
– Kelisimshart bolmasa, olardyń sizdi sharshy alańǵa shyǵarmaýǵa qandaı quqyǵy bar?
– Amerıkada barlyq promoýterler sottardan qorqady. Sondyqtan olar táýekelge barǵysy kelmeıdi. Olarǵa meniń GGG Promotions-pen kelisimshartym joq degen qaǵaz kerek. Biraq Gennadıı maǵan bul qaǵazdy tek 100 myń dollar tólesem ǵana beretinin aıtty. Bul men úshin túsiniksiz jaǵdaı. Sebebi men bes jyl tegin jumys atqardym dese de bolady. Qazir bir tıyn da bermeımin. Golovkınnen mundaıdy kútpedim.
– Jalpy Big Bear-ge qalaı keldińiz?
– Sońǵy jekpe-jegim týraly aıtqym keledi. Bul boks keshin Golden Boy Promotions uıymdastyrdy, meni qarsylas retinde GGG Promotions-ten satyp aldy. Bul aqshadan men eshteńe kórmedim desem de bolady. Endi olar menen taǵy aqsha surap jatyr.
Al Big Bear-ge men alǵash ret bes jyl buryn keldim. Gennadıı meni shaqyrǵan bolatyn. Jaı ǵana jattyǵý oıymen barǵanmyn. Sosyn men kásibı jekpe-jekterge shyǵara bastady, birneshe kezdesýden keıin chempıondyq beldeýge tartysamyn dep oıladym. Biraq qatelestim. Bes jyl ótti, biraq chempıondyq kezdesý bermedi. Qarsylastarym myqty bolǵanymen bul jaı ǵana reıtingilik kezdesýler boldy. Buǵan qosa maǵan bapkerim unamady. Qazir qyzyǵýshylyq tanytyp jatqan bir-eki promoýter bar, biraq olar qaǵazdy talap etýde.
– Golovkınniń komandasyna qaıta oralýyńyz múmkin be?
– Joq.
– Sońǵy kezderi onda Alı Ahmedov jattyǵyp júr. Demek ol da kelisimshartsyz júr me?
– Bilmeımin, biraq óz basym eshqandaı kelisimshartqa qol qoıǵan joqpyn.
– Bir jekpe-jek úshin ortasha syıaqyńyz qansha boldy?
– Eki – eki jarym myń dollar. Sońǵy on raýndtyq eki kezdesý úshin bes myń dollar aldym. Bul, mine, ótken jyly. Buǵan deıin ortasha syıaqym eki myń dollardy quraǵan.
– Demek, Golovkın sizdiń «bostandyǵyńyz» úshin 100 myń dollar surap jatyr ma?
– Boksshy kelisimge qol qoıǵan kezde zańger qasymyzda bolýy kerek. Qelisimsharttyń bir kóshirmese mende, ekinshisi promoýterde bolýy tıis. Biraq bizde mundaı eshteńe bolǵan joq. Tipti aýyzsha kelisken joqpyz. Eger de resmı túrde kelisimge otyrsam, bul somany qaıtarar edim. Basynda Golovkın «seniki durys, boksshy retinde óskiń kelse, saǵan basqa bapker kerek» degen. Ne bolsa da, dos bolyp qalamyz dedi. Artynsha maǵan «100 myńdyq» esepshotty kórsetti. Bul qaǵazda onyń maǵan esh narazylyǵy joq ekeni týraly jazylyp turdy.
– Demek bul qarajatqa sizdiń jattyǵýyńyz, tamaǵyńyz, ushý bıletteri jatatyn shyǵar.
– Bul qaǵazda biz Rýslanǵa keremet jattyǵý lagerin usyndyq, bıletter, dári-dármekter satyp berdik delingen jáne sońynda jazý – 100 myń dollar.
– Bul máseleni sheshý joldary bar ma?
– Birinshi suhbattan keıin olar menimen habarlasatyn shyǵar dep oıladym. Biraq maǵan eshkim habarlaspady. Maks pen Genany úlken aǵalarym retinde kórdim, olardyń istep jatqany mynaý... Meniń kareramdy qurttyp jatyr desem de bolady.
– Golovkınmen sońǵy ret qashan sóılestińiz?
– Eki aı buryn.
– Amerıkada ma?
- Joq. Men Qazaqstanǵa kelgenime jarty jyl boldy. Sońǵy kezdesýden keıin otanyma birden oraldym.
– Sońǵy qarsylasyńyz Pablo Sezar Kano sizben bolǵan jekpe-jekten keıingi kezdesýde álem chempıony atandy. Bul siz úshin kútpegen jańalyq boldy ma?
– Joq. Maǵan bári Lınares ony syndyryp tastaıdy degen. Men asyqpańdar, Horhe jaqynda ǵana salmaq dárejesin aýystyrdy dep jaýap berdim, Kanony jeńý ońaı emes ekenin aıtqan bolatynmyn. Nátıjesinde Kano Lıneresti nokaýtqa túsirdi.
– Siz Kanomen qarymta kezdesý ótkizýińiz múmkin be?
– Birinshi kezdesýden keıin óz komandama revansh ótkizgim keletinin aıttym. Olar maǵan kerek emes, ol jaraqatynan jarty jyl emdeledi dep jaýap berdi. Qansha ýaqyt ótti, ol jekpe-jek ótkizip, chempıon atandy. Men bolsam ol ýaqyt aralyǵynda birde-bir jekpe-jek ótkizbedim. Olardyń revansh uıymdastyratyn nıeti bolmady, sondyqtan da men GGG Promotions-ten kettim.
– Qazir Big Bear-de qazaqstandyq boksshylardan tek Alı Ahmedov qana qaldy (Golovkındi eseptemegende). Oǵan qandaı keńes berer edińiz?
– Alı – óte myqty boksshy. Ol Big Bear-ge kelgende, onyń enshisinde kásipqoı boksta 12 jekpe-jek boldy. Biraq Amerıkadaǵy birinshi qarsylasy 12 ret jeńilgen óte álsiz boksshy boldy. Artynsha, 14 ret utylǵan boksshymen judyryqtasty. Endigi qarsylasy 37 jastaǵy boksshy bolmaq. Bul durys pa? Eger de Alıdi kótergisi kelmese, ne úshin ony qınap júr? Myqty qarsylas tabý úshin aqsha tóleý kerek, al olar qarajat jumsaǵysy kelmeıdi.
– Alı óz salmaǵyndaǵy myqty boksshylarmen judyryqtasýǵa daıyn ba?
– Dál qazir emes. Ol degenimiz álsiz boksshylarmen kezdesý kerek degen sóz emes qoı. Boksshy jattyǵýda emes, jekpe-jekterdiń arqasynda ósedi. Eger de qarsylastary álsiz bolsa, Alı damymaıdy. Onyń deńgeıi áldeqaıda joǵary, top-boksshylardy uta alady.
– Sanchestiń jattyǵý úderisi unamaıtynyn aıttyńyz. Jalpy onyń bapkerlik qabileti týraly ne oılaısyz?
– Boks – jekeleı sport túri. Big Bear-de biz bir jattyǵýdy kúnde isteımiz. Adam retinde Abel jaqsy kisi. Bálkim, bapker retinde de jaqsy shyǵar. Biraq onyń jattyǵý úderisi maǵan kelmedi. Kerisinshe, Golovkınge bul jattyǵý prosesi yńǵaıly bolýy múmkin. Sońǵy kezdesýimdi alatyn bolsaq, qarsylasym myqty boldy ǵoı. Big Bear-de eki aı jattyǵyp, birde-bir ret bapkermen «lapy» urmadyq. Buny qalaı túsinýge bolady? Tipti kezdesý bitken soń eshqashan bapkermen ótken jekpe-jektiń vıdeosyn kórmedik. Qatemen jumys jasaý, zertteý degen nárse joq.
– Maksım Golovkın sizdiń jaǵdaıyńyz týraly ne deıdi? Odan kómek suramadyńyz ba?
– Ol maǵan meniń maqsatym seni AQSH-qa alyp kelý bolatyn dedi. Barlyq suraqtar boıynsha Gennadııge habarlas dep aıtty. Oǵan habarlassam telefonyn almaıdy. Men turmaq zańgerlerge jaýap bermeıdi.
Usynǵan: Ásel Bolatqyzy
