Halyqtyń pikiri eskerilmeıinshe, AES salý sheshimi júzege aspaıdy. Bul týraly Qazaqstan prezıdenti Qasym-Jomart Toqaev Semeıde ótken kezdesý barysynda málimdedi dep habarlaıdy Qamshy.kz aqparat agenttigi Qazaq Times jýrnalyna silteme jasap.
Reseı prezıdentiniń Qazaqstan aýmaǵynda AES týraly usynysyna baılanysty memleket basshysy Q.Toqaev: "Atom elektr stansıasyn salý salý máselesi qoǵamda qyzý talqyǵa túsip, pikirtalas týyndap otyr. Bul – kúrdeli másele. 2030 jyly Qazaqstanda elektr energıasynyń jetispeýshiligi baıqalýy múmkin. Sondyqtan, osy máseleni qazir sheshýimiz qajet. Bul bizdiń búkil halyqtyń múddesine qatysty bolǵandyqtan, óte kúrdeli másele. Sondyqtan halyq pikiri nazarǵa alynady. Soǵan qaraı áreket etemiz", – dep málimdedi.
Osyǵan deıin QR Enegretıka mınıstrligi taratqan habarlamada: "2030 jylǵa qaraı Qazaqstannyń Ońtústiginde 2,7 GVt-qa deıin bazalyq qýat tapshylyǵy kútilýde. Elimizdiń ońtústiginde bý-gaz, gıdro jáne atom stansıalaryn salý sıaqty ártúrli otyn jáne energıa kózderin paıdalana otyryp, bazalyq jáne manevrlik generasıany engizý arqyly tapshylyqty jabý múmkindigin qarastyryp otyr. Tek múmkindikter jáne usynylatyn jobalar tıanaqty zerttelgen soń ǵana elektr energıasyn óndirýge Qazaqstan úshin neǵurlym ońtaıly jáne qolaıly tehnologıalar aıqyndalatyn bolady. Sol sebepti, aldyn ala daýryǵyp, tujyrymdar jasaýǵa jáne negizsiz alańdaýǵa sebep joq ekenin habarlaımyz", – delingen.
Nur-Sultanǵa AES qurylysyn reseılik tehnologıamen júrgizýdi Qazaqstannyń prezıdenti Qasym-Jomart Toqaevpen Kremldegi kezdesýi kezinde Reseı prezıdenti Vladımır Pýtın usynǵan bolatyn. 3 sáýirde ótken jıynda Pýtın Toqaev ekeýi "beıbit atom salasyndaǵy seriktestik" jaıly talqylaǵanyn aıtqan. Onyń sózinshe, "ýran óndirý jáne baıytý boıynsha Qazaqstan men Reseıdiń birlesken alty ónerkásibi jumys isteıdi".
Qazaqstanda salynýy yqtımal atom elektr stansıasyna (AES) arnalǵan aýmaq retinde Almaty oblysyndaǵy Úlken aýyly men Shyǵys Qazaqstan oblysyndaǵy Kýrchatov qalasy tańdalǵan. Atalǵan málimdemeden keıin, Qazaqstan azamattary stansıadan tónetin orasan zor qaýipti aıtyp, AES qurylysynan bas tartýdy talap etti.
Usynǵan: Ádilet Mádenıet
