Nursultan Nazarbaev Qytaı Halyq Respýblıkasynyń «Dostyq» ordenimen marapattaldy dep habarlaıdy Qamshy.kz aqparat agenttigi Aqorda baspasóz qyzmetine silteme jasap.
Qytaı Halyq Respýblıkasynyń Halyq jınalasy úıinde Qazaqstan Respýblıkasynyń Tuńǵysh Prezıdentin tatý kórshilik qarym-qatynasty ilgeriletýge jáne jan-jaqty strategıalyq seriktestikti damytýǵa qosqan zor úlesi úshin «Dostyq» ordenimen resmı marapattaý rásimi ótti.
– Men 1992 jyly dıplomatıalyq qatynastar ornaǵan sátten bastap táýelsiz Qazaqstannyń Qytaımen yntymaqtastyǵyn damytý jáne nyǵaıtý jolynda jumys istep kele jatqanymdy atap ótkim keledi. Sizderdiń memleketterińizben ózara senimge jáne tatý kórshilikke negizdelgen qatynastar ornatqanymyzǵa qýanyshtymyn. Bizdiń yntymaqtastyǵymyz úlgi tutarlyq. Elderimiz óńirde jáne jahandyq deńgeıde beıbitshilikti, traqtylyq pen ornyqty damýdy qamtamasyz etýge eleýli úles qosyp keledi, – dedi Elbasy.
Nursultan Nazarbaev «Bir beldeý, bir jol» bastamasyn iske asyrý úderisine jáne onyń jahandyq syn-qaterlerge tótep berý isindegi mańyzdylyǵyna toqtaldy.
– Qysqa merzim ishinde «Bir beldeý, bir jol» bastamasy álemdik tabysty jobalar qataryna endi. Sı Szınpın myrzanyń bárimizdi birigýge bastaıtyn damý ıdeıasy búgingi syn-qaterlerge tıimdi jaýap retinde qalyptasty. Qytaı usynǵan halyqaralyq yntymaqtastyqtyń jańa platformasy Azıa, Eýropa jáne Afrıkanyń kóptegen elderiniń damýynda asa mańyzdy saıası, ekonomıkalyq jáne mádenı ról atqarýda, – dedi Qazaqstannyń Tuńǵysh Prezıdenti.
Elbasy «Bir beldeý, bir jol» ekinshi halyqaralyq yntymaqtastyq forýmy ózara tıimdi qarym-qatynasty damytý máselelerine arnalǵan mańyzdy basqosýǵa aınalǵanyn aıtty.
Qazaqstannyń Tuńǵysh Prezıdenti, sondaı-aq, eki eldiń ekonomıkalyq jobalardy iske asyrýǵa baǵyttalǵan birlesken jumysynyń nátıjelerine toqtaldy.
– Osy múmkindikti paıdalan otyryp, Sizdi, Tóraǵa Sı Szınpın, Qytaı Úkimetin jáne halqyn «Bir beldeý, bir jol» forýmyn tabysty ótkizýlerińizben quttyqtaımyn. Qytaılyq ereksheligi bar «jańa dáýir» sosıalızmin qurý jáne «qytaı armanyn» júzege asyrý jónindegi barlyq maqsattar men mindetter Sizdiń jáne Qytaı Komýnıstik partıasynyń basshylyǵymen oryndalady dep senemin, – dedi Nursultan Nazarbaev.
Qazaqstannyń Tuńǵysh Prezıdenti Qytaı memleketiniń basshylyǵy men halqyna kórsetken qonaqjaılyǵy men marapaty úshin rızashylyq bildirdi.
– Qazaqstan men Qytaıdyń jan-jaqty strategıalyq seriktestigi halyqtarymyzdyń ıgiligi jolynda odan ári nyǵaıa beredi dep úmittenemin. Sizge asa jaýapty memlekettik qyzmetińizde – jańa jetistikter, al dostas Qytaı halqyna baq-bereke tileımin, – dedi Nursultan Nazarbaev.
Qytaı Halyq Respýblıkasynyń Tóraǵasy Sı Szınpın Qazaqstannyń Tuńǵysh Prezıdentiniń eki jaqty qatynastardy nyǵaıtýǵa qosqan úlesine toqtalyp, Elbasynyń halyqaralyq yntymaqtastyqty damytý isine sińirgen eńbegin erekshe atap ótti.
– Búgin biz Qytaı halqynyń naǵyz dosy – Qazaqstannyń Tuńǵysh Prezıdenti Nursultan Nazarbaevqa Qytaı Halyq Respýblıkasynyń joǵary syrtqy marapaty – «Dostyq» ordenin resmı tabys etý rásimin ótkizip otyrmyz. Prezıdent Nursultan Nazarbaevtyń búkil álemde zor bedeli bar. Ol Qazaqstan men Qytaı arasyndaǵy jan-jaqty strategıalyq seriktestiktiń negizin qalap, osy qatynastardy árdaıym damytyp keledi. Qazaqstan Shanhaı yntymaqtastyq uıymyn quryp, Azıadaǵy ózara yqpaldastyq jáne senim sharalary jónindegi keńeske bastamashy boldy. Qazaqstannyń Tuńǵysh Prezıdenti óziniń saıası kóregendiginiń arqasynda osy uıymdardy damytyp, óńirlik jáne jahandyq deńgeıde beıbitshilik pen turaqtylyqty qoldaýǵa zor úles qosyp keledi, – dedi Sı Szınpın.
Oqı otyryńyz, ♦Nursultan Nazarbaev Djekı Chanmen kezdesti (foto)
Usynǵan: Maqpal Sembaı
