Jýrnalıs quqyǵynyń óreskel buzylýyna qarsylyq retinde denesin tilip, artynsha ashtyq jarıalady. Bul týraly onyń advokaty Ǵalym Nurpeıisov Vlast.kz basylymyna habarlaǵan. 

Advokat Ǵalym Nurpeıisovtiń aıtýynsha, zań boıynsha Dýman Muhamedkárim jazasyn ózi turatyn jerde, ıaǵnı Almaty oblysynda óteýi kerek deıdi. Appelıasıalyq shaǵym ózgerissiz qalǵandyqtan, Dýman ózin Zarechnyı kentindegi túrmege aýystyrýdy talap etken. Alaıda jýrnalısti aldap, tósegi, oryndyǵy joq sýyq karserge qamap tastaǵan.

Sondaı-aq Ǵalym Nurpeıisov:

-Bul Dýmandy “syndyrý úshin” jasalyp otyr. Dýman buǵan narazylyq retinde qolyn, moınyn jáne ishin tilip, qanmen qabyrǵaǵa “Oıan, qazaq” dep jazǵan. Ony kórgen arnaıy top jýrnalısi karserden shyǵarmastan medısınalyq kómek kórsetken. Alaıda ızolátor Dýmannyń denesin tilgenin, ashtyq jarıalaǵanyn tirkemegen. Osy oqıǵadan keıin ony qaıtadan kameraǵa aýystyrǵan, - deıdi. 

Eske salsaq, tamyz aıynda Dýman Muhammedkárim «ekstremızmdi qarjylandyrdy» jáne «tyıym salynǵan uıym jumysyna aralasty» degen aıyppen jeti jylǵa sottalǵan bolatyn. Jýrnalıs ózine taǵylǵan aıypqa kelispeı, birneshe ret qarsylyq kórsetip, ashtyq jarıalaǵan. Al qarasha aıynda ótken apelásıalyq sot Dýman Muhammedkárimniń úkimin ózgerissiz qaldyrdy.