2018 جىلدىڭ اياعىنا دەيىن شىعىس قازاقستاندا 277 IT-سىنىپ اشىلادى. بۇل تۋرالى بۇگىن ايماق باسشىسى دانيال احمەتوۆ وبلىستىڭ دارىندى بالالارىن ۇلىقتاۋ كەزىندە مالىمدەدى. 

بۇكىل الەمدىك بالالاردى قورعاۋ كۇنىندە دانيال احمەتوۆ ايماقتىڭ كىشكەنتاي دارىندى بالالارىمەن كەزدەستى. رەسپۋبليكالىق «نۇر وتان – بالالارعا!» اكسياسى اياسىندا وبلىستىق فيليالدا ەرەكشە قوناقتارعا ارنايى جايىلعان «ءتاتتى» داستارحان باسىندا بەيرەسمي جاعدايدا قىزىقتى اڭگىمە بولدى. وبلىس اكىمى «قاراپايىم تىلدە» بالالارعا شىعىس قازاقستاننىڭ، جالپى رەسپۋبليكانىڭ دامۋ جوسپارى تۋرالى ايتىپ بەردى. اسىرەسە، ءتورتىنشى ونەركاسىپتىك جاڭعىرۋ جاعدايىنا توقتالدى. ءبىر قىزىعى، بالالار دا بۇل تاقىرىپتان الىس بولماي شىقتى. ماسەلەن، 8 جاسار انتون سلۋگين كىشكەنتاي بولسا دا اقپاراتتىق تەحنولوگياعا زور قىزىعۋشىلىق تانىتۋدا. وبلىستىق زياتكەرلىك بايقاۋلاردىڭ جەڭىمپازى بۇگىنگى كەزدەسۋدە كورسەتكەن Lego Mindstorms مودەلىنىڭ روبوتىن ءوزى باعدارلامالاپ، ارنايى اكەلگەن. 

– الەممەن باسكەلەستىككە ءتۇسۋ ءۇشىن بالالاردىڭ كىشكەنتاي كەزىنەن باعدارلامالاۋعا ۇيرەتۋ كەرەك. بۇل ەلباسى ايتاتىن بولاشاق. بيىل قىركۇيەكتە شىعىس قازاقستاننىڭ بارلىق مەكتەپتەرىندە روبوت تەحنيكاسى كابينەتتەرى اشىلادى جانە بۇل وسى باعىتتا اتقارىلار ءىستىڭ باسى عانا، - دەدى دانيال احمەتوۆ جۋرناليستەرگە بەرگەن سۇحباتىندا.    

  ايتا كەتۋ كەرەك، بۇگىن «نۇر وتان» پارتياسى ساياسي بيۋروسىنىڭ جيىنىندا ەل بويىنشا 1000 تەگىن IT-سىنىپتارىن اشۋ مىندەتى قويىلدى. جوبا باعدارلامالاۋ جانە روبوت تەحنيكاسىن تەرەڭدەتىپ فاكۋلتاتيۆتى وقىتۋعا باعىتتالعان. ەندى ەڭبەك نارىعىندا جوعارى سۇرانىس بىلىكتى IT-ماماندارىنا بولادى.

– شىعىس قازاقستان بۇل مىندەتتى جىل ارناسىندا شەشەدى. 1000-نىڭ 277 IT-سىنىبى شقو-دا بولادى. سونىمەن قاتار، روبوت تەحنيكاسى كابينەتتەرىن كومپيۋتەرلىك سىنىپتارىمەن كىرىكتىرەمىز. بىزدە IT-ورتالىق بار، قاجەتتى باعدارلامانى جاسايمىز. ايتا كەتۋ كەرەك، جاقىن ارادا شقو-دا باعدارلاماشىلار فورۋمى وتەدى. وندا تەك اعا بۋىندى ەمەس، بالالاردى دا شاقىرامىز. بۇگىن كورگەن ۇل-قىزدار مەن مىقتى باعدارلاماشىلاردىڭ وزىندىك سينتەزىن جاساۋدى كوزدەيمىز، - دەدى ايماق باسشىسى.

مەيرامدا بارلىق 26 بالاعا دانيال احمەتوۆ سالاۋاتتى ءومىر سالتىنا باستار ۆەلوسيپەدتىڭ سەرتيفيكاتىن تابىس ەتتى.