سوڭعى كۇندەرى الەۋمەتتىك جەلىلەردە يسماتۋللا ماقسۇم ەسىمىمەن تانىلعان ازاماتقا جانە ونىڭ قولداۋشىلارىنا قاتىستى ءبىرقاتار سۇحباتتار مەن جازبالار جاريالانىپ، تالقىلانۋدا
بۇگىن قازاقستان مۇسىلماندارى ءدىني باسقارماسى يسماتۋللا ماقسۇمعا قاتىستى رەسمي مالىمدەمە جاريالادى.
«يسماتۋللا ماقسۇم جانە ونى قولداۋشىلاردىڭ قازاقستان مۇسىلماندارى ءدىني باسقارماسىنا ەشقانداي قاتىسى جوق ەكەندىگىن مالىمدەيمىز. ولاردىڭ ارەكەتتەرى مەن ءدىني ۇستانىمدارى قازاقستان مۇسىلماندارى ءدىني باسقارماسىنىڭ ۇستانىمىمەن سايكەس كەلمەيدى.
قازاقستان مۇسىلماندارى ءدىني باسقارماسى بۇعان دەيىن دە ولاردىڭ ارەكەتتەرى مەن ءدىني ۇستانىمدارىنا قاتىستى رەسمي مالىمدەمە جاساعان.
دىنىمىزدە ادام بالاسىنا زورلىق-زومبىلىق جاساۋ، قورقىتۋ، بىرەۋدىڭ اقىسىنا قول سۇعۋ، ادامدى ماجبۇرلەۋ اۋىر كۇنا بولىپ سانالادى»، - دەدى قمدب.
«يسلام ءدىنى ادامزات بالاسىن ىزگىلىككە، ءوزارا قۇرمەت پەن ىنتىماق-بىرلىككە ۇندەيدى» دەگەن قمدب قوجا احمەت ياساۋي مۇراسى قانداي دا ءبىر توپتىڭ جەكە مۇراسى ەمەس ەكەندىگىن باسا ايتقان.
«قوجا احمەت ياساۋي بابامىزدىڭ ەسىمى مەن رۋحاني مۇراسىن قانداي دا ءبىر جەكە تۇلعانىڭ نەمەسە توپتىڭ تەرىس ءدىني پيعىلدا ءوز مۇددەلەرىنە پايدالانۋعا بولمايتىنىن جەتكىزەمىز. سەبەبى قوجا احمەت ياساۋي بابامىزدىڭ مۇراسى – حالقىمىزدىڭ سان عاسىرلىق رۋحاني قازىناسى.
قازاقستان مۇسىلماندارى ءدىني باسقارماسى حالقىمىزدى ءدىن اتىن جامىلىپ، ءوزىنىڭ عانا ءدىني ۇستانىمىن دۇرىس ساناپ، ادامدى وزىنە تاۋەلدى ەتۋگە جانە سوقىر سەنىمگە ۇندەيتىن كەز كەلگەن ورتادان ساق بولۋعا شاقىرادى»، - دەلىنگەن رەسمي مالىمدەمەدە.
