ءبىلىم مەن عىلىم – مەملەكەتتىڭ وركەندەۋىنە جول اشاتىن باستى قۇندىلىقتاردىڭ ءبىرى. قازىرگى جاھاندانۋ جانە سيفرلىق دامۋ داۋىرىندە ساپالى ءبىلىم بەرۋ، باسەكەگە قابىلەتتى، جان-جاقتى دامىعان تۇلعا قالىپتاستىرۋ – ەلىمىزدىڭ ءبىلىم بەرۋ جۇيەسىنىڭ ماڭىزدى مىندەتى. بۇل باعىتتا ۇستازداردىڭ كاسىبي شەبەرلىگى مەن تىنىمسىز ەڭبەگى ەرەكشە ورىن الادى. ويتكەنى ءاربىر شاكىرتتىڭ جەتىستىگىنىڭ ارتىندا ۇستازدىڭ ءبىلىمى، ىزدەنىسى مەن جاۋاپكەرشىلىگى تۇرادى.

مەملەكەت باسشىسى قاسىم-جومارت توقايەۆ 2026 جىلعى 28 قازانداعى «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىندا ءبىلىم مەن عىلىمدى دامىتۋعا، ادامي كاپيتالدىڭ ساپاسىن ارتتىرۋعا جانە جاڭا تەحنولوگيالاردى مەڭگەرگەن بىلىكتى ماماندار دايارلاۋعا ايرىقشا نازار اۋداردى. پرەزيدەنت اتاپ كورسەتكەندەي، ەلىمىزدىڭ بولاشاقتاعى تابىسى ءبىلىمدى، ەڭبەكقور ءارى جاڭاشىل ازاماتتاردىڭ الەۋەتىنە تىكەلەي بايلانىستى. بۇل مىندەتتەر ءبىلىم بەرۋ ۇيىمدارىنا ۇلكەن جاۋاپكەرشىلىك جۇكتەيدى. اسىرەسە، سيفرلاندىرۋ مەن جاساندى ينتەللەكت قارقىندى دامىعان كەزەڭدە جاستاردىڭ زامان تالابىنا ساي ءبىلىم الىپ، كاسىبي داعدىلارىن جەتىلدىرۋى اسا ماڭىزدى. بۇگىنگى ءبىلىم الۋشى تەك تەوريالىق بىلىممەن شەكتەلمەي، العان ءبىلىمىن تاجىريبەدە قولدانا الاتىن، جاڭا تەحنولوگيالاردى مەڭگەرۋگە ۇمتىلاتىن، وزدىگىنەن ىزدەنەتىن تۇلعا بولىپ قالىپتاسۋى ءتيىس. سوندىقتان ساپالى ءبىلىم بەرۋ مەن سانالى تاربيە بەرۋ ءىسى ءوزارا ساباقتاستىقتا جۇزەگە اسىرىلۋى قاجەت. وسى باعىتتا ەلىمىزدىڭ جەتەكشى جوعارى وقۋ ورىندارىنىڭ ءبىرى – ءال-فارابي اتىنداعى قازاق ۇلتتىق ۋنيۆەرسيتەتى farabi.university ءبىلىم مەن عىلىمدى دامىتۋعا، جاستاردىڭ ساپالى ءبىلىم الۋىنا ەرەكشە كوڭىل ءبولىپ كەلەدى. ۋنيۆەرسيتەتتىڭ جوعارى وقۋ ورنىنا دەيىنگى ءبىلىم بەرۋ فاكۋلتەتىنە قاراستى جوعارى وقۋ ورنىنا دەيىنگى دايىندىق كافەدراسى دا وسى مىندەتتەردى جۇزەگە اسىرۋعا ءوز ۇلەسىن قوسۋدا. كافەدرانىڭ نەگىزگى مىندەتتەرىنىڭ ءبىرى – شەتەلدەن كەلگەن تىڭداۋشىلارعا ساپالى ءبىلىم بەرىپ، ولاردى جوعارى وقۋ ورىندارىنا تۇسۋگە دايارلاۋ. سونىمەن قاتار ولاردىڭ جاڭا ءبىلىم بەرۋ ورتاسىنا بەيىمدەلۋىنە، ەلىمىزدىڭ مادەنيەتى مەن قوعامدىق ومىرىنە بەلسەندى ارالاسۋىنا قولايلى جاعداي جاساۋ دا باستى نازاردا. وقۋ ۇدەرىسىندە ءاربىر تىڭداۋشىنىڭ ءبىلىم دەڭگەيى، جەكە قابىلەتى مەن قىزىعۋشىلىعى ەسكەرىلەدى. ساباقتاردى مازمۇندى ءارى ءتيىمدى ۇيىمداستىرۋمەن قاتار، ولاردىڭ شىعارماشىلىق الەۋەتىن دامىتۋعا، قوعامدىق جۇمىستارعا قاتىسۋىنا مۇمكىندىك بەرىلەدى. ءتۇرلى ءبىلىم سايىستارى، مادەني-تانىمدىق جانە تاربيەلىك ءىس-شارالار ارقىلى تىڭداۋشىلاردىڭ قابىلەتتەرى اشىلىپ، وزدەرىنە دەگەن سەنىمدىلىگى ارتا تۇسەدى. اسىرەسە، شەتەلدەن كەلگەن قانداس جاستار ءۇشىن دايىندىق كەزەڭىنىڭ ماڭىزى زور. بۇل ۋاقىت ولاردىڭ ءبىلىمىن جەتىلدىرىپ قانا قويماي، تاريحي وتانىمەن جاقىنىراق تانىسۋىنا، بولاشاق ماماندىعىن سانالى تاڭداۋىنا جانە جوعارى وقۋ ورنىنىڭ ءبىلىم بەرۋ ورتاسىنا بەيىمدەلۋىنە مۇمكىندىك بەرەدى. وسى جولدا ۇستازدار تەك ءبىلىم بەرۋشى عانا ەمەس، شاكىرتكە باعىت-باعدار كورسەتەتىن تالىمگەر قىزمەتىن دە اتقارادى. كافەدرا ۇجىمى ءۇشىن ەڭ ۇلكەن قۋانىش – بىرنەشە اي بويى ءبىلىم العان تىڭداۋشىلاردىڭ جوعارى ناتيجەلەرگە قول جەتكىزىپ، مەملەكەتتىك ءبىلىم گرانتتارىنىڭ يەگەرى اتانۋى. جۇيەلى دايىندىق پەن ۇستازداردىڭ قاجىرلى ەڭبەگىنىڭ ناتيجەسىندە بيىل دا ءبىرقاتار تىڭداۋشىلار وزدەرى تاڭداعان ماماندىقتارىنا وقۋعا ءتۇسىپ، ستۋدەنت اتاندى. بۇل جەتىستىك – تەك شاكىرتتىڭ جەكە تابىسى عانا ەمەس، كافەدرا وقىتۋشىلارىنىڭ كاسىبي بىلىكتىلىگى مەن بىرلەسكەن ەڭبەگىنىڭ ناقتى ناتيجەسى. ءاربىر گرانت يەگەرىنىڭ قۋانىشى – ۇستازدار ءۇشىن ۇلكەن مارتەبە، ال ولاردىڭ بولاشاقتاعى جەتىستىكتەرى – اتقارىلعان جۇمىستىڭ شىنايى باعاسى.
پرەزيدەنت جولداۋىندا ايقىندالعان ءبىلىم مەن عىلىمدى دامىتۋ، جاستاردىڭ الەۋەتىن ارتتىرۋ جانە باسەكەگە قابىلەتتى ماماندار دايارلاۋ مىندەتتەرى ءبىزدىڭ كۇندەلىكتى جۇمىسىمىزبەن تىكەلەي ۇندەسەدى. سەبەبى ەل بولاشاعى – بۇگىنگى ءبىلىم الۋشى جاستاردىڭ قولىندا. ولاردىڭ ساپالى ءبىلىم الىپ، قوعامنان ءوز ورنىن تابۋىنا جاعداي جاساۋ – ءاربىر ۇستازدىڭ كاسىبي ءارى ازاماتتىق پارىزى. ۇستاز ەڭبەگىنىڭ قۇندىلىعى شاكىرتىنىڭ العان بىلىمىمەن، ومىردەن ءوز ورنىن تابۋىمەن جانە قوعامعا قوسقان ۇلەسىمەن ولشەنەدى. سوندىقتان ءبىلىم بەرۋ مەن تاربيەلەۋ ىسىندەگى ساباقتاستىقتى ساقتاۋ، ءاربىر جاستىڭ قابىلەتىن دامىتۋ جانە ولاردىڭ بولاشاعىنا جول اشۋ – كافەدرا ۇجىمىنىڭ باستى ۇستانىمدارىنىڭ ءبىرى.
بۇگىنگى تىڭداۋشى – ەرتەڭگى بىلىكتى مامان. ال ءبىلىمدى، ىزدەنىمپاز، وتانشىل جاس ۇرپاق – ەلىمىزدىڭ تۇراقتى دامۋى مەن جارقىن بولاشاعىنىڭ بەرىك كەپىلى. مەملەكەت باسشىسى ايقىنداعان مىندەتتەردى جۇزەگە اسىرۋ جولىندا ءاربىر ۇستازدىڭ ەڭبەگى مەن ءاربىر شاكىرتتىڭ جەتىستىگى ماڭىزدى. ويتكەنى شاكىرت تابىسى – ۇستاز ەڭبەگىنىڭ جەمىسى، ال ءبىلىمدى ۇرپاق – مەملەكەتىمىزدىڭ باستى بايلىعى.
 
ءال-فارابي اتىنداعى قازاق ۇلتتىق ۋنيۆەرسيتەتى
جوعارى وقۋ ورنىنا دەيىنگى ءبىلىم بەرۋ فاكۋلتەتى
جوعارى وقۋ ورنىنا دەيىنگى دايىندىق كافەدراسىنىڭ وقىتۋشىسى
يبراگيموۆا م.ن.، تيلەۋجانوۆا گ.ت.، مۋجيگوۆا گ.م.