اباي ۋنيۆەرسيتەتىندە مەملەكەت باسشىسى قاسىم-جومارت توقايەۆتىڭ تاپسىرماسىمەن بەكىتىلگەن «تازا قازاقستان» تۇجىرىمداماسىن جۇزەگە اسىرۋ باعىتىندا ارنايى وتكىزىلگەن ەكولوگيالىق اپتالىق ءوز جۇمىسىن قورىتىندىلادى. اپتالىققا قارا شاڭىراقتىڭ 10 مىڭ ەرىكتى ستۋدەنتى قاتىسىپ، قورشاعان ورتانى قورعاۋعا ءوز ۇلەستەرىن قوستى. وعان شەتەلدىك ءبىلىم الۋشىلار دا قاتىستى.
مەملەكەت باسشىسى قاسىم-جومارت توقايەۆ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىندا «قالالاردىڭ ءقاۋىپسىز، جايلى، كورىكتى بولۋىنا باسىمدىق، ياعني پريوريتەت رەتىندە قاراي وتىرىپ، بۇل ءىستى اسا ماڭىزدى مەملەكەتتىك مىندەت دەپ قابىلداۋ كەرەك. بۇل – «تازا قازاقستان» جالپىۇلتتىق تۇجىرىمداماسىنا تولىق ساي كەلەتىن تالاپ» دەگەن بولاتىن. وسىنداي يگى قۇندىلىقتاردى ماقسات ەتكەن اپتالىق وسكەلەڭ ۇرپاقتىڭ بويىندا پاتريوتيزم مەن ازاماتتىق جاۋاپكەرشىلىكتى كۇشەيتىپ، ەكولوگيالىق مادەنيەتتى قالىپتاستىرۋدى كوزدەيدى. سونداي-اق ستۋدەنتتەردى ورتاق ىسكە جۇمىلدىرىپ، قوعامدىق جۇمىستا بەلسەندى ءارى سالاۋاتتى ءومىر سالتىن ناسيحاتتاۋدا قۇلشىنىستى ارتتىرۋعا شاقىردى.
اپتالىقتىڭ جابىلۋىنا ىلە الاتاۋى مەملەكەتتىك تابيعي ۇلتتىق پاركىنىڭ اعا مەملەكەتتىك ينسپەكتورى سالتانات امانتاي قىزى ارنايى قاتىسىپ، جاستاردىڭ ەكولوگيالىق بەلسەندىلىگىن جوعارى باعالادى. ۋنيۆەرسيتەتتىڭ الەۋمەتتىك دامۋ جونىندەگى پرورەكتورى ماقسات جاقاۋ اتالعان جوبانىڭ جاڭا كونستيتۋسياعا نەگىزدەلگەنىن، ءقاۋىپسىز، دامىعان جانە تازا قوعامدى قالىپتاستىرۋعا باعىتتالعانىن العا تارتتى.
– «تازا قازاقستان» اكسياسى پرەزيدەنتىمىزدىڭ باستاماسىمەن جىل بويى جۇزەگە اسىرىلىپ كەلەدى. ەڭ الدىمەن بۇل ناۋقان اينالامىزعا جاناشىرلىق تانىتىپ، تابيعاتتى قۇرمەتتەۋدى ۇيرەتەدى. اپتالىق بارلىق فاكۋلتەتتە ۇيىمداستىرىلىپ، بۇگىنگى قورىتىندىسىنا بەس فاكۋلتەتتىڭ ءبىلىم الۋشىلارى جينالدى. وسىنداي باستامالار ارقىلى ستۋدەنتتەر ۋنيۆەرسيتەت قابىرعاسىندا كاسىبي ءبىلىم عانا ەمەس، پاتريوتتىق ۇستانىم مەن جاۋاپكەرشىلىگىن دە قالىپتاستىرادى، – دەدى پرورەكتور.
رەسپۋبليكا كۇنى مەرەكەسىنە بايلانىستى ۇيىمداستىرىلعان ەكولوگيالىق اپتالىق 30 قازانعا دەيىن ءبىلىم ورداسىنىڭ بارلىق كامپۋستارىندا اپتا بويى جالعاسىپ جاتتى. بۇگىن ۋنيۆەرسيتەت باس عيماراتىنىڭ الدىنا جينالعان ءبىلىم الۋشىلار بىرنەشە وقۋ كورپۋسى الاڭىندا تازالىق جۇمىستارىن جۇرگىزىپ، اۋلالاردى اعاش جاپىراقتارى مەن قوقىستاردان تازارتتى.
ايتا كەتەيىك، اباي ۋنيۆەرسيتەتىندە «تازا قازاقستان» اكسياسىن قولداۋ باعىتىندا وتكىزىلەتىن سەنبىلىكتەر مەن ءىس-شارالار مۇنىمەن تولاستامايدى. ەكولوگيالىق مادەنيەتتى قالىپتاستىرۋعا باعىتتالعان جۇمىستار جىل بويى جالعاسىن تاپپاق.
«Abai University» مەديا ورتالىعى
