الماتىدا بالالار ۇيلەرىنىڭ تاربيەلەنۋشىلەرى مەن اتا-اناسىنىڭ قامقورلىعىنسىز قالعان بالالارعا ارنالعان «الەۋمەتتىك شەبەرحانا» جوباسى اياسىندا شىعارماشىلىق، ءبىلىم بەرۋ جانە تالىمگەرلىك باعىتىنداعى جۇمىستار جۇيەلى تۇردە جۇرگىزىلۋدە.

جوبا الماتى قالاسى جاستار ساياساتى باسقارماسىنىڭ تاپسىرىسى بويىنشا «QazEquality» قوعامدىق قورىنىڭ ۇيىمداستىرۋىمەن جۇزەگە اسىرىلۋدا. وعان بالالار ۇيلەرىنىڭ تاربيەلەنۋشىلەرى مەن تۇلەكتەرى، سونداي-اق اتا-اناسىنىڭ قامقورلىعىنسىز قالعان بالالار مەن جاسوسپىرىمدەر قاتىسۋدا.

باستامانىڭ نەگىزگى ماقساتى - بالالاردىڭ شىعارماشىلىق قابىلەتتەرىن دامىتۋ، ولاردىڭ قوعامعا بەيىمدەلۋىنە ىقپال ەتۋ جانە بولاشاقتا ءوز بەتىنشە ءومىر سۇرۋىنە قاجەتتى داعدىلاردى قالىپتاستىرۋ.

جوبا اياسىندا بالالار ءۇشىن ۆوكال، حورەوگرافيا، اكتەرلىك شەبەرلىك، سۋرەت سالۋ جانە وزگە دە باعىتتار بويىنشا شىعارماشىلىق ۇيىرمەلەر تۇراقتى تۇردە ۇيىمداستىرىلۋدا. سونىمەن قاتار جاسوسپىرىمدەر باريستا، باربەر، موبيلوگرافيا سىندى زاماناۋي ماماندىقتاردىڭ نەگىزدەرىن مەڭگەرىپ، بولاشاق كاسىبىن تاڭداۋعا مۇمكىندىك الۋدا.

جوبانىڭ ەرەكشە باعىتتارىنىڭ ءبىرى - «تالىمگەرلەر مەكتەبى». ونىڭ اياسىندا بالالارمەن قوعام قايراتكەرلەرى، ءتۇرلى سالا ماماندارى، تانىمال جانە مەديا تۇلعالار كەزدەسىپ، ومىرلىك تاجىريبەلەرىمەن بولىسەدى. كەزدەسۋلەر بارىسىندا جاسوسپىرىمدەر وزدەرىن قىزىقتىرعان سۇراقتارعا جاۋاپ الىپ، بولاشاق ماقساتتارى مەن مۇمكىندىكتەرى تۋرالى اشىق پىكىر الماسادى.

«ءبىز ءۇشىن بۇل جوبانىڭ باستى ماقساتى - بالالاردىڭ بوس ۋاقىتىن ۇيىمداستىرۋ عانا ەمەس، ولاردىڭ بويىنداعى قابىلەتتى اشىپ، بولاشاققا دەگەن سەنىمىن قالىپتاستىرۋ. ءاربىر بالانىڭ ءوز ارمانى، قىزىعۋشىلىعى مەن الەۋەتى بار. ءبىزدىڭ مىندەتىمىز - سول مۇمكىندىكتەردى دامىتۋعا جاعداي جاساۋ، ولاردىڭ جانىنان تابىلىپ، دۇرىس باعىت-باعدار بەرۋ»، - دەپ اتاپ ءوتتى جوبا ۇيىمداستىرۋشىلارى.

جىل باسىنان بەرى جوبا شەڭبەرىندە 5 شىعارماشىلىق ۇيىرمە، 5 كاسىبي وقىتۋ كۋرسى ۇيىمداستىرىلىپ، 20-دان استام كاسىپتىك باعدار بەرۋ ءىس-شاراسى، 20-دان استام پسيحولوگيالىق ترەنينگ جانە 10-نان استام مادەني-تانىمدىق ءىس-شارا وتكىزىلدى. سونداي-اق بالالار مەن تۇلەكتەرگە قۇقىقتىق، پسيحولوگيالىق جانە الەۋمەتتىك قولداۋ كورسەتۋ جۇمىستارى جۇرگىزىلۋدە.

ۇيىمداستىرۋشىلاردىڭ ايتۋىنشا، مۇنداي باستامالار بالالاردىڭ جاڭا ورتاعا بەيىمدەلۋىنە، وزىنە دەگەن سەنىمدىلىگىن ارتتىرۋعا جانە قوعاممەن بايلانىسىن نىعايتۋعا مۇمكىندىك بەرەدى.

«الەۋمەتتىك شەبەرحانا» جوباسى الداعى ۋاقىتتا دا بالالاردىڭ جان-جاقتى دامۋىنا، جاڭا مۇمكىندىكتەردى يگەرۋىنە جانە بولاشاققا سەنىمدى قادام جاساۋىنا قولداۋ كورسەتۋگە باعىتتالعان جۇمىسىن جالعاستىرادى.