مارات ەلەۋسىز ۇلى الماتى وبلىسى اكتيۆىنىڭ الدىندا ءتورت جىلدا اتقارىلعان اۋقىمدى جۇمىستاردىڭ ناتيجەسىن تۇيىندەدى. كەزدەسۋ بارىسىندا ول ايماقتىڭ دامۋىنا ۇلەس قوسقان ارىپتەستەرىنە، قۇقىق قورعاۋ ورگاندارىنا، اۋماقتىق دەپارتامەنتتەرگە العىس ايتىپ، وبلىس تۇرعىندارىنا شەكسىز ريزاشىلىعىن ءبىلدىردى.
«بۇگىن ءوڭىر باسشىسى رەتىندە سىزدەرمەن جۇزدەسىپ، بىرگە اتقارعان اۋقىمدى جۇمىستارىمىزدى قورىتىندىلايتىن جاۋاپتى ساتتە تۇرمىز. وزدەرىڭىزبەن بىرگە الماتى وبلىسى مەن جەتىسۋ وبلىستارىن ءبولىپ، جاڭا ءوڭىر قۇرىلعان تاريحي كەزەڭدە جۇمىس ىستەدىك. اسا جاۋاپتى كەزەڭدە تۋعان ءوڭىرىمدى باسقارۋدى سەنىپ تاپسىرىپ، ايماقتىڭ وركەندەپ، دامۋىنا ۇنەمى قولداۋ بىلدىرگەن مەملەكەت باسشىسى قاسىم-جومارت كەمەل ۇلى توقايەۆقا العىسىمدى بىلدىرەمىن. سونداي-اق وسى كەزەڭدە جۇزەگە اسىرىلعان رەفورمالاردى دۇرىس قابىلداپ، قولداعان ءوڭىر حالقىنا دا ريزاشىلىعىم شەكسىز. بۇل وسى وبلىستىڭ تۋماسى رەتىندە مەن ءۇشىن، جالپى بارشامىز ءۇشىن ۇلكەن مۇمكىندىكتەر ۋاقىتى بولدى»، – دەدى ول.
مارات سۇلتانعازييەۆ سونداي-اق بىرلەسكەن جۇمىستىڭ ناتيجەسى جەمىستى بولعانىن، سونىڭ ارقاسىندا ءوڭىر ەكونوميكاسى ەسەلەپ ارتقانىن جەتكىزدى. اتاپ ايتقاندا، الماتى وبلىسى ەكونوميكالىق كورسەتكىشتەر بويىنشا رەسپۋبليكاداعى ۇزدىك بەستىكتىڭ قاتارىنا بەرىك ورنىعىپ، وڭىردەگى دونور اۋماقتار سانى ەكەۋدەن جەتىگە ارتقان.
«جەتىستىكتەرگە جەتۋ جولىندا وزدەرىڭىزبەن كۇش بىرىكتىرە وتىرىپ، ءوڭىر الەۋەتىن ارتتىرۋ باعىتىندا ءبىرتۇتاس ۇجىم بولىپ، ناتيجەلى ەڭبەك ەتتىك. بارلىق باستامالارىمىز بەن يگى ىستەردى جۇزەگە اسىرۋ جولىندا ۇكىمەت پەن پرەزيدەنت اكىمشىلىگىنىڭ دە قولداۋىن سەزىندىك. وسى ۋاقىت ىشىندە ءبىر جەڭنەن قول، ءبىر جاعادان باس شىعارىپ، بىرلىكتە قىزمەت اتقارعان ۇجىمعا جانە اۋماقتىق دەپارتامەنتتەرگە، قۇقىق قورعاۋ ورگاندارىنا دا ريزاشىلىعىم شەكسىز»، – دەدى مارات سۇلتانعازييەۆ.
سونداي-اق قازىرگى ۋاقىتتا وبلىستا قۇرىلىس سالاسى قارقىن الىپ، سەرپىندى ورلەۋ كەزەڭى ءجۇرىپ جاتقانىنا توقتالدى. ءسوز سوڭىندا جاڭا باسشىعا ساتتىلىك تىلەپ، ءوڭىر جەتىستىكتەرى بۇدان دا مول بولاتىنىنا سەنىم ءبىلدىردى.
«الداعى ۋاقىتتا دا وسى قالىپتى ساقتاپ، جۇمىستى باسەڭدەتپەي، جاڭادان كەلەتىن ءوڭىر باسشىسىنا تولىق قولداۋ ءبىلدىرىپ، ءبىر كىسىدەي جەمىستى جۇمىس اتقارادى دەپ سەنەمىن. ءوڭىردى ءارى قاراي دامىتۋ جولىندا جاڭا باسشىعا دا ساتتىلىك تىلەيمىن! الماتى وبلىسىنىڭ بولاشاعى بۇدان دا جارقىن، جەتىستىكتەرى بۇدان دا مول بولارىنا كامىل سەنەمىن»، – دەدى مارات ەلەۋسىز ۇلى.
