الماتى وبلىسىندا وتباسىلىق ءداستۇردى دارىپتەپ، بالالارىن ءوزارا قۇرمەت پەن قولداۋ نەگىزىندە تاربيەلەپ، ۇرپاقتان ۇرپاققا جالعاسقان قۇندىلىقتاردى كوزدىڭ قاراشىعىنداي ساقتاپ كەلە جاتقان جانۇيالارعا قۇرمەت كورسەتىلدى. «مەرەيلى وتباسى» ۇلتتىق بايقاۋىنىڭ وبلىستىق كەزەڭى جەڭىمپازدارىن ماراپاتتاۋ راسىمىندە ءوڭىردىڭ تاڭداۋلى 12 وتباسى كوپشىلىككە تانىستىرىلدى.

بيىل بايقاۋعا وبلىستىڭ بارلىق اۋداندارى مەن قالالارىنان 146 وتباسى ءوتىنىش بەرگەن. وبلىستىق كەزەڭنىڭ قورىتىندىسى بويىنشا ۇزدىك دەپ تانىلعان 12 جانۇيا سالتاناتتى شاراعا شاقىرىلدى. ولاردىڭ توعىزى ىنتالاندىرۋ سىيلىقتارىمەن قاتار، 150 مىڭ تەڭگەدەن اقشالاي جۇلدەگە يە بولدى.

ماراپاتتالعاندار قاتارىندا ەرماكاشيەۆتەر، تۋيۋتوۆتار، پيرمۋحامەدوۆتەر، احمەتوۆتەر، بەكمۇحانوۆتار، جۇنىسوۆتەر، قۋاندىكوۆتار، ساتبەك جانە قۋاندىق وتباسىلارى بار.

ال جۇلدەلى ورىندار بىلايشا ءبولىندى. ءبىرىنشى ورىن كەگەن اۋدانىنان كەلگەن باقاشوۆتار اۋلەتىنە بۇيىرىپ، 1 ميلليون تەڭگەنىڭ اقشالاي سىيلىعى تابىستالدى. ەكىنشى ورىندى جامبىل اۋدانىنان شىققان اسقاروۆتار وتباسى يەلەنىپ، 500 مىڭ تەڭگەگە يە بولدى. ءۇشىنشى ورىن ىلە اۋدانىنان كەلگەن تىنىبايەۆتار جانۇياسىنا بەرىلىپ، 300 مىڭ تەڭگە كولەمىندەگى جۇلدەمەن ماراپاتتالدى. سونىمەن قاتار بارلىق قاتىسۋشىلاردىڭ بالالارىنا ويىنشىقتار سىيعا تارتىلدى.

جەڭىمپازداردى قۇتتىقتاعان الماتى وبلىسى اكىمىنىڭ ورىنباسارى عاني مايلىبايەۆ وتباسىلىق قۇندىلىقتاردىڭ وسكەلەڭ ۇرپاق تاربيەسىندەگى ماڭىزىنا توقتالدى.

– حالقىمىزدا «وتان وتباسىنان باستالادى» دەگەن تاعىلىمدى ءسوز بار. بۇل بايقاۋ جانۇيالاردىڭ بەرەكەسى مەن بىرلىگىن عانا ەمەس، قوعامنىڭ رۋحاني-ادامگەرشىلىك نەگىزدەرىنىڭ نىعايا تۇسكەنىن دە كورسەتەدى. مەملەكەت باسشىسى «باقىتتى ءارى بەرىك وتباسى – باقۋاتتى قوعام مەن مەملەكەتتىڭ مىزعىماس تىرەگى» دەپ اتاپ وتكەن بولاتىن. ادامعا ەڭ جاقىن جانداردىڭ ونەگەسى ارقىلى پاتريوتيزم، جاۋاپكەرشىلىك، قۇرمەت، ەڭبەكقورلىق پەن جاسامپازدىققا ۇمتىلۋ سەكىلدى قاسيەتتەر بالا بويىنا ەڭ الدىمەن وتباسىندا سىڭەدى، – دەدى عاني مايلىبايەۆ.

ول بايقاۋعا اتسالىسقان بارشا جانۇيالارعا ريزاشىلىعىن ءبىلدىرىپ، ولاردىڭ بالا تاربيەسىنە، ۇلتتىق داستۇرلەردى دارىپتەۋگە جانە وتباسى قۇندىلىقتارىن نىعايتۋعا قوسىپ جۇرگەن ۇلەسىن اتاپ ءوتتى. وبلىس اكىمىنىڭ ورىنباسارىنىڭ ايتۋىنشا، وڭىردە كوپشىلىككە سىيلى، كەيىنگى بۋىنعا ونەگە بولارلىق وتباسىلار از ەمەس.

كوپشىلىكتىڭ ەسىندە ەرەكشە قالعان ساتتەردىڭ ءبىرى – ءبىرىنشى ورىن يەلەنگەن باقاشوۆتار وتباسىنىڭ اجەسىنىڭ ساحناداعى ءسوزى بولدى.

– ءبىز حان تاڭىرىندەي اسقاق شىڭى بار، شارىن شاتقالى جايقالىپ جاتقان كورىكتى ولكەدەن كەلدىك. ياعني، قاسيەتتى كەگەن جەرىنەن ات تەرلەتىپ جەتتىك، – دەدى ول.

اجە ۇيىمداستىرۋشىلارعا العىسىن ايتىپ، تۋعان جەرى كەگەن اۋدانى تۋرالى جىلى لەبىزىن ءبىلدىردى. كوپشىلىككە ءوز شىعارماسىنان ولەڭ وقىپ، ەرەكشە اسەر قالدىردى.

كەش سوڭىندا مەرەكەلىك كونسەرتتىك باعدارلاما ۇسىنىلدى. سالتاناتتى شارا وتباسى بەرەكەسىن ساقتاپ، بالا تاربيەسىنە جاۋاپكەرشىلىكپەن قاراپ، ۇلكەنگە قۇرمەت كورسەتىپ جۇرگەن جانۇيالارعا العىس ءبىلدىرىپ، ولاردىڭ قوعامداعى ورنى مەن ونەگەسىن تاعى ءبىر مارتە ايشىقتادى.