ءال-فارابي اتىنداعى قازاق ۇلتتىق ۋنيۆەرسيتەتىندە «جاساندى ينتەللەكت ءداۋىرى: باسپا ءىسى، مەديا جانە ديزاين» اتتى حالىقارالىق كۇزگى مەكتەپ ءوز جۇمىسىن باستادى. اۋقىمدى شاراعا اكادەميالىق ورتا وكىلدەرى، وتاندىق جانە شەتەلدىك باسپاگەرلەر، ب ا ق وكىلدەرى، سونداي-اق كرەاتيۆتى يندۋستريا مەن IT سالاسىنىڭ ماماندارى قاتىسۋدا.
حالىقارالىق جيىننىڭ اشىلۋىندا جۋرناليستيكا فاكۋلتەتىنىڭ دەكانى ىسقاق ەگەمبەردييەۆ، تۇركى الەمى جۋرناليستەر فەدەراسياسىنىڭ پرەزيدەنتى مەندەرەس دەمير، باسپا، پوليگرافيا جانە كىتاپ تاراتۋ ۇيىمدارى قاۋىمداستىعىنىڭ ءتوراعاسى ءادىل قويتانوۆ، سونداي-اق ۇلتتىق مەملەكەتتىك كىتاپ پالاتاسى ديرەكتورىنىڭ ورىنباسارى تولقىن سالمەنبايەۆا ءسوز سويلەپ،قاتىسۋشىلارعا ساتتىلىك تىلەدى.
باعدارلامانىڭ العاشقى كۇنى جاساندى ينتەللەكتىنىڭ تەليەۆيزيا، باسپا ءسوز، كىتاپ يندۋسترياسى جانە كوركەم اۋدارماعا تيگىزەتىن اسەرىنە ارنالدى. سونىمەن بىرگە سيفرلىق داۋىردەگى اۆتورلىق قۇقىق پەن مەديا ماماندارىنىڭ كاسىبي جاۋاپكەرشىلىگى قوزعالدى.
الداعى كۇندەرى قاتىسۋشىلار ەلەكتروندى جانە اۋديوكىتاپتار ازىرلەۋ، ءماتىندى رەداكسيالاۋ، جي ارقىلى يلليۋستراسيا مەن انيماسيا جاساۋ، كىتاپ ديزاينىن زاماناۋي فورماتتا بەزەندىرۋ جانە الەۋمەتتىك جەلىلەردە كىتاپ ونىمدەرىن ناسيحاتتاۋدىڭ جاڭا تاسىلدەرىن مەڭگەرەدى.
سونىمەن قاتار مەكتەپ باعدارلاماسىندا مەدياساۋاتتىلىق، فاكچەكينگ جانە جاساندى ينتەللەكت ارقىلى تارالاتىن فەيك اقپاراتپەن كۇرەس ماسەلەلەرىنە ەرەكشە باسىمدىق بەرىلگەن. شاراعا ۇلىبريتانيا، كانادا، تۇركيا جانە گونكونگتان ارنايى كەلگەن حالىقارالىق ساراپشىلار قاتىسىپ، ءوز تاجىريبەلەرىمەن بولىسەدى.
حالىقارالىق كۇزگى مەكتەپتىڭ جۇمىسى 19 قاراشادا قورىتىندىلانىپ، قاتىسۋشىلارعا ارنايى سەرتيفيكاتتار تابىستالادى.
ءال-فارابي اتىنداعى قازۇۋ باسپا ءسوز قىزمەتى
