ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىندە قىزمەت ەتەتىن بىرنەشە وقىتۋشىلاردىڭ جۇمىستان كەتۋى تۋرالى اقپارات الەۋمەتتىك جەلىدە قىزۋ تالقىعا ءتۇستى. قوعامدا رەزونانس تۋدىرعان بۇل جاعدايعا بايلانىستى جوعارى وقۋ ورنىنىڭ باسشىلىعى رەسمي پوزيسياسىن ءبىلدىردى.
اڭگىمە بەلگىلى اقىن، باسپاگەر ءارى اتالعان فاكۋلتەتتىڭ بۇرىنعى دەكانى تەمىرعالي كوپبايدىڭ Facebook-تەگى جازباسىنان باستالدى. ونىڭ ايتۋىنشا، فاكۋلتەتتە كوپتەگەن جىلدار بويى ەڭبەك ەتكەن ءتورت تاجىريبەلى مامان – فيلولوگيا عىلىمدارىنىڭ دوكتورى كاكەن قامزين، اقىن مۇرات شايماران، ساتيريك جازۋشى ەرماحان شايحى جانە ونىڭ ءوزى قىزمەتتەن بوساتىلعان.
تەمىرعالي كوپباي بۇل شەشىمدى كادرلىق ادىلەتسىزدىك رەتىندە باعالاپ، وقىتۋشىلاردىڭ فاكۋلتەتتەگى باسقارۋ ساياساتىنا كەلىسپەۋشىلىك بىلدىرگەنىن ايتقان.
ونىڭ پىكىرىنشە، كوپجىلدىق تاجىريبەسى بار پروفەسسور-وقىتۋشىلار قۇرامىنىڭ كەتۋى ءبىلىم ورداسىنىڭ بەدەلىنە كەرى اسەر ەتۋى مۇمكىن.
ايتا كەتۋ كەرەك، بۇعان دەيىن دە جەلى قولدانۋشىلارى مەن ستۋدەنتتەر قاۋىمى اقىن مۇرات شايماراننىڭ وقۋ ورنىنان كەتۋىنە بايلانىستى ءوز پىكىرلەرىن بىلدىرگەن بولاتىن.
ۋنيۆەرسيتەت باسشىلىعىنىڭ جاۋابى: بارلىعى زاڭ اياسىندا
الەۋمەتتىك جەلىدە تاراعان پىكىرلەرگە قاتىستى قازۇۋ باسقارما مۇشەسى – اكادەميالىق ماسەلەلەر بويىنشا پرورەكتور الينا گالەيەۆا رەسمي تۇسىنىكتەمە بەردى. رەكتورات وكىلىنىڭ سوزىنشە، كادرلىق وزگەرىستەر جوعارى وقۋ ورىندارىنا ورتاق ستاندارتتى كونكۋرس راسىمدەرىنە ساي جۇرگىزىلگەن.
ۋنيۆەرسيتەت ۇسىنعان اقپاراتقا سايكەس:
- كاكەن حامزين مەن تەمىرعالي كوپبايەۆتىڭ ەڭبەك شارتىنىڭ مەرزىمى اياقتالعان؛
- ەرماحان شايحى اكادەميالىق بىلىكتىلىكتى انىقتاۋ بايقاۋىنا قاتىسۋدان باس تارتىپ، ءتيىستى پروسەدۋرادان وتپەگەن؛
- مۇرات شايماران بەكىتىلگەن اكادەميالىق تالاپتار بويىنشا كونكۋرستىق ىرىكتەۋدەن وتە الماعان.
"لاۋازىمعا قابىلداۋ ءراسىمى جوعارى وقۋ ورىندارىندا بەلگىلەنگەن تارتىپكە سايكەس جىل سايىن جۇرگىزىلەدى. ارنايى قۇرىلعان كونكۋرستىق كوميسسيا ءوتىنىش بەرۋشىلەردىڭ عىلىمي جانە وقۋ-ادىستەمەلىك ەڭبەكتەرىن، پەداگوگيكالىق تاجىريبەسى مەن ءدارىس بەرۋ بىلىكتىلىگىن باعالايدى. بارلىق شەشىمدەر قولدانىستاعى زاڭناماعا جانە ۋنيۆەرسيتەتتىڭ ىشكى نورماتيۆتىك قۇجاتتارىنا تولىق ساي كەلەدى"، – دەپ اتاپ ءوتتى الينا گالەيەۆا.
وسىلايشا، ۋنيۆەرسيتەت تاراپى بۇل جاعدايدى ساياسي نەمەسە جەكە ارازدىق ەمەس، جىل سايىن وتەتىن جوسپارلى اتتەستاسيا مەن زاڭدى كونكۋرس ناتيجەسى دەپ ءتۇسىندىردى.
