«الماتى قۇپيالارى» انيماسيالىق سەريالى – الماتىنىڭ بۇگىنى مەن بولاشاعى تۋرالى قىزىقتى جوبا
Almaty TV قالا كۇنى قارساڭىندا جاساندى ينتەللەكت تەحنولوگيالارىن قولدانا وتىرىپ جاسالعان «الماتى قۇپيالارى: ايلين مەن بارىس» اتتى ءتول انيماسيالىق جوباسىن ۇسىنادى.
باستى كەيىپكەرلەر — ايلين مەن بارىس قىزىقتى وقيعالارعا تولى ساياحاتقا اتتانىپ، كورەرمەندەردى الماتى قالاسىمەن، ونىڭ باي تاريحىمەن، بىرەگەي مادەنيەتىمەن جانە زاماناۋي كەلبەتىمەن تانىستىرادى.
«الماتى قۇپيالارى» — تەك جارقىن ءارى قىزىقتى كونتەنت ەمەس، سونىمەن قاتار ماڭىزدى اعارتۋشىلىق باستاما. جوبا وتباسىلىق قۇندىلىقتاردى، تۋعان جەرگە دەگەن سۇيىسپەنشىلىكتى، ەكولوگيالىق مادەنيەتتى جانە ازاماتتىق ۇستانىمدى دارىپتەۋگە باعىتتالعان.
مۋلتسەريالدىڭ سيۋجەتتىك جەلىلەرىنە مەملەكەت باسشىسىنىڭ باستاماسىمەن جۇزەگە اسىرىلىپ جاتقان «تازا قازاقستان»، «ادىلەتتى قازاقستان»، «زاڭ مەن ءتارتىپ»، «امانداسۋ» جانە «جەڭىمپاز ۇلت» جالپىۇلتتىق باعدارلامالارى مەن تۇجىرىمدامالارى ەنگىزىلگەن.
كەيىپكەرلەردىڭ وقيعالارى ارقىلى جاس كورەرمەندەر زاڭدى قۇرمەتتەۋدىڭ، قوعام الدىنداعى جاۋاپكەرشىلىكتىڭ، سالاۋاتتى ءومىر سالتىنىڭ ماڭىزىن تۇسىنەدى، سونداي-اق جايلى قالالىق ورتانى دامىتۋ مەن ەل يگىلىگى جولىنداعى جاسامپاز ەڭبەك تۋرالى بىلەدى.
بالالار مەن وتباسىلىق اۋديتورياعا ارنالعان مۋلتسەريال — Almaty TV كومانداسى ازىرلەگەن بىرەگەي ءونىم. يدەيادان باستاپ سەناريي جازۋ، كەيىپكەرلەردى ازىرلەۋ، انيماسيا جاساۋ، دىبىستاۋ، مۋزىكالىق ارلەۋ جانە فينالدىق مونتاجعا دەيىنگى بارلىق وندىرىستىك سيكلدى تەلەارنا ۇجىمى ءوز كۇشىمەن جۇزەگە اسىردى. بۇل رەتتە جاساندى ينتەللەكت زاماناۋي وندىرىستىك قۇرال رەتىندە قولدانىلدى.
مۋلتسەريالدى جاساۋعا تەلەارنا قىزمەتكەرلەرىن مەملەكەت باسشىسىنىڭ قازاقستان تاريحىن بالالار مەن جاستارعا انيماسيالىق فيلمدەر ارقىلى كەڭىنەن ناسيحاتتاۋ تاپسىرماسى، سونداي-اق سيفرلاندىرۋ جىلى اياسىندا Almaty TV وندىرىستىك قىزمەتىنە جاساندى ينتەللەكت قۇرالدارىن بەلسەندى ەنگىزۋ ۇدەرىسى ىنتالاندىردى.
جاساندى ينتەللەكت تەحنولوگيالارىنىڭ، تارتىمدى سيۋجەتتىڭ جانە حاريزماسى جوعارى كەيىپكەرلەردىڭ ۇيلەسىمى جاڭا مۋلتسەريالدى وسكەلەڭ ۇرپاقتى تاربيەلەۋدىڭ جانە قازاقستاننىڭ مادەنيەتى مەن بولاشاعىنا قىزىعۋشىلىق قالىپتاستىرۋدىڭ ماڭىزدى قۇرالدارىنىڭ بىرىنە اينالدىرادى.
العاشقى بولىمدەرى تەلەارنانىڭ ەفيرىندە جانە الەۋمەتتىك جەلىلەرىندە وسى سەنبى، 19 قىركۇيەك كۇنى ساعات 10:00-دە كورەرمەنگە جول تارتادى.
1ء-بولىم: «قۇپيا الما»: ايلين مەن بارىستىڭ باستان كەشكەن وقيعالارى ارقىلى بالالار الماتىنىڭ تاريحى مەن مادەني مۇراسى، سونداي-اق ءداستۇرلى «امانداسۋ» ادەبىنىڭ ماڭىزى تۋرالى بىلەدى.
2ء-بولىم: «التىن ادام»: بۇل ءبولىم ەل تاريحىنا دەگەن قۇرمەتتى قالىپتاستىرىپ، «جەڭىمپاز ۇلت» رۋحىن اشا وتىرىپ، ادال، باتىل ءارى وپتيميست بولۋعا تاربيەلەيدى.
3ء-بولىم: «كۇمىس تيىن»: الماتىنىڭ كوپعاسىرلىق تاريحى تۋرالى قىزىقتى وقيعا ارقىلى ادال ەڭبەكتىڭ، ادالدىق پەن ءوزارا قۇرمەتتىڭ قۇندىلىعىن بايانداپ، مەملەكەت باسشىسىنىڭ «زاڭ مەن ءتارتىپ» تۇجىرىمداماسىن تۇسىندىرەدى.
4ء-بولىم: «تازالىق ساقشىلارى»: ايلين مەن بارىس الماتىنىڭ تازالىعى مەن كوركىنە قامقورلىق جاسايتىن مىڭداعان ادامنىڭ كۇندەلىكتى ەڭبەگىمەن تانىسادى. ءبولىم تۋعان قالاعا دەگەن سۇيىسپەنشىلىكتى ارتتىرىپ، «تازا قازاقستان» تۇجىرىمداماسىنىڭ ماڭىزدىلىعىن كورسەتەدى.
5ء-بولىم: «جۇلدىزدىڭ جۇمباعى»: بۇل بولىمدە ادىلدىك، ءوزارا كومەك پەن قامقورلىق تاقىرىبى كوتەرىلەدى. باس كەيىپكەرلەر ايلين مەن بارىس مەيىرىمدى، باۋىرمال بولۋدى جانە قيىن جاعدايعا تاپ بولعاندارعا قولداۋ كورسەتۋدى ۇيرەنىپ، پرەزيدەنتتىڭ «ادىلەتتى قازاقستان» باستاماسىنىڭ ماڭىزىن ايقىن كورسەتەدى.
ەسكە سالا كەتەيىك، بۇعان دەيىن Almaty TV سوڭعى جىلدارداعى ەڭ اۋقىمدى تەلەماۋسىمداردىڭ ءبىرى بولاتىن جاڭا تەليەۆيزيالىق ماۋسىمنىڭ باستالعانىن جاريالاعان بولاتىن. كورەرمەندەردى سۇيىكتى باعدارلامالارمەن قاتار جاڭا جارقىن جوبالار مەن وتاندىق تەلەحيكايالاردىڭ پرەمەرسى كۇتەدى.
ولاردىڭ قاتارىندا «تاڭعى studio»، «الماتينسكيە يستوريي»، «ارحيتەكتور»، «ۆەچەرنيي الماتى»، «DODA» جانە «ادىلدىك الاڭى» باعدارلامالارى مەن شوۋلارى، سونداي-اق «كورشىلەر»، «بالام»، «ەرىكتى»، «تۇنگى قالا»، «اق كەلىن» جانە «جولاۋشى» تەلەحيكايالارى بار.
جاڭا ماۋسىمدا تەلەارنا «جاڭالىقتار»باعدارلاماسىنىڭ جاڭارتىلعان نۇسقاسىن ۇسىنادى. باعدارلاما تىڭ تۇجىرىمداما مەن اقپارات بەرۋدىڭ زاماناۋي فورماتىندا ەفيرگە شىعادى. ماسەلەن، مەملەكەت باسشىسىنىڭ «جەڭىمپاز ۇلت» باستاماسى اياسىندا جاس قازاقستاندىقتاردىڭ تابىس تاريحىنا، ەل تۇرعىندارىنىڭ جەتىستىگىنە، جاسامپاز ەڭبەك، ازاماتتىق جاۋاپكەرشىلىك جانە قوعامدى دامىتۋعا قوسقان جەكە ۇلەسى مەن ۇلگىسىنە ارنالعان ارنايى ايدار دايىندالادى.
Almaty TVء-دىڭ جاڭا ماۋسىمى — يگى ىستەرگە شابىتتاندىراتىن زاماناۋي كەيىپكەرلەر تۋرالى وقيعالار، عىلىمدى، ءتۋريزمدى، ەكولوگيانى جانە وتباسىلىق قۇندىلىقتاردى ناسيحاتتايتىن جوبالار، سونداي-اق كورەرمەندەردى الماتى مەن بۇكىل قازاقستاننىڭ تىنىس-تىرشىلىگىمەن تانىستىرۋدى جالعاستىراتىن مازمۇندى كونتەنت.
