بۇگىن ايماق باشىسى بەرىك ءۋاليدىڭ توراعالىعىمەن مەملەكەت باسشىسى قاسىم-جومارت توقايەۆتىڭ قازاقستان حالقىنا ارناعان «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىن تالقىلاۋعا ارنالعان وبلىس اكتيۆىنىڭ وتىرىسى ءوتتى. جيىنعا وبلىستىق باسقارمالاردىڭ باسشىلارى، قوعامدىق كەڭەس مۇشەلەرى، ساياسي پارتيا فيليالدارى وكىلدەرى، قۇقىق قورعاۋ ورگاندارى مەن دەپارتامەنتتەردىڭ باسشىلارى قاتىستى. قالا-اۋدان اكىمدەرى بەينە رەجيم ارقىلى قوسىلدى.
وبلىس اكىمى پرەزيدەنت جولداۋىندا ايقىندالعان نەگىزگى باسىمدىقتارعا توقتالىپ، ءوڭىردىڭ الەۋمەتتىك-ەكونوميكالىق دامۋى ءۇشىن ماڭىزىن اتاپ ءوتتى.
«پرەزيدەنتتىڭ جولداۋى – ەلىمىزدىڭ الداعى دامۋ باعدارىن ايقىندايتىن، مەملەكەتتىك ساياساتتىڭ نەگىزگى باسىمدىقتارىن ناقتىلايتىن ماڭىزدى ستراتەگيالىق قۇجات. مەملەكەت باسشىسى قاسىم-جومارت كەمەل ۇلى توقايەۆ جولداۋىندا: «قازاقستان اۋقىمدى قۇرىلىس الاڭىنا اينالۋعا ءتيىس»، – دەپ اتاپ ءوتتى. پرەزيدەنت ايقىنداعان بۇل باسىمدىقتار جاڭادان قۇرىلعان اباي وبلىسى ءۇشىن ايرىقشا ماڭىزدى. ءوڭىردىڭ ورنىقتى دامۋىن قامتاماسىز ەتۋ، تۇرعىنداردىڭ تۇرمىس ساپاسىن جاقسارتۋ جانە ەلدى مەكەندەردىڭ ينفراقۇرىلىمىن جاڭعىرتۋ – الدىمىزدا تۇرعان نەگىزگى مىندەتتەر. جولداۋدا بەلگىلەنگەن مىندەتتەردى ورىنداۋ – ءوڭىردىڭ بولاشاعىنا، تۇرعىندارىمىزدىڭ ءال-اۋقاتىنا جانە مەملەكەتىمىزدىڭ دامۋىنا قوسىلعان ناقتى ۇلەس»، – دەدى بەرىك ءۋالي.
ايماق باسشىسى پرەزيدەنت كوتەرگەن «حالىقتىق قۇرىلىس» باستاماسىنىڭ ءوڭىر ءۇشىن ەرەكشە ماڭىزعا يە ەكەنىن ايتتى. قازىرگى ۋاقىتتا وبلىستا «اياگوز – باقتى» تەمىرجول جەلىسى، سەمەي قالاسىنداعى جاڭا ءتورت جولاقتى كوپىر، اقتوعاي مىس بالقىتۋ زاۋىتى مەن ەت وڭدەۋ كەشەنى سياقتى ءىرى جوبالار جۇزەگە اسىرىلىپ جاتىر. سونىمەن قاتار بيۋدجەت قاراجاتى ەسەبىنەن جالپى قۇنى 35 ملرد تەڭگەنى قۇرايتىن 28 الەۋمەتتىك نىساندا قۇرىلىس جانە جوندەۋ جۇمىستارى جۇرگىزىلۋدە.
مەملەكەت باسشىسىنىڭ قولداۋىمەن قولعا الىنعان «ابايعا قۇرمەت» اكسياسى اياسىندا سەمەي قالاسىندا شىعارماشىلىق ورتالىعى، مەديا ورتالىق، دەنە شىنىقتىرۋ-ساۋىقتىرۋ كەشەنى، ينكليۋزيۆتى سپورت كەشەنى، ۇستەل تەننيسى ورتالىعى، جەكپە-جەك سارايى جانە دوستىق ءۇيى سالىنىپ جاتىر. وبلىس ورتالىعىندا العاش رەت BINOM مەكتەبىنىڭ قۇرىلىسى باستالدى. الداعى جىلدارى وڭىردە جاڭا تەاتر، وبلىستىق اۋرۋحانا جانە بالالار اۋرۋحاناسىن سالۋ جوسپارلانعان.
جيىندا كولىك-لوگيستيكا ينفراقۇرىلىمىن دامىتۋ ماسەلەسىنە ەرەكشە نازار اۋدارىلدى. توعىز جولدىڭ تورابىندا ورنالاسقان ءوڭىرىمىز ءۇشىن جول ماسەلەسىنىڭ ماڭىزى ەرەكشە. بۇل باعىتتا ءبىرقاتار جۇمىس اتقارىلدى. بىلتىر حالىقتى كوپتەن بەرى تولعاندىرعان «ومبى – مايقاپشاعاي» باعىتىنداعى اۆتوموبيل جولى جوندەلىپ، پايدالانۋعا بەرىلدى. سەمەي قالاسىندا 100 كوشەنى اسفالتتاۋ جۇمىستارى قولعا الىندى. بۇل بۇرىن اسفالت توسەلمەگەن كوشەلەردىڭ جول ساپاسىن جاقسارتۋعا مۇمكىندىك بەرەتىن ماڭىزدى قادام. سونىمەن قاتار وتكەن جىلى ەكى كوپىردىڭ اسفالت جابىنى جاڭارتىلدى. الداعى ۋاقىتتا سەمەي قالاسىنداعى شۋگايەۆ پەن ساتبايەۆ كوشەلەرىنىڭ قيىلىسىندا جول ايرىعى سالىنىپ، ەرتىس وزەنى ارقىلى وتەتىن اسپالى كوپىر كۇردەلى جوندەۋدەن وتەدى.
وبلىس اكىمى «اياگوز – باقتى» تەمىرجولىنىڭ ستراتەگيالىق ماڭىزىن اتاپ ءوتىپ، ونىڭ قۇرىلىسىن تۇراقتى باقىلاۋدا ۇستاۋ قاجەتتىگىن اتاپ ءوتتى. سونداي-اق، وبلىستىق جانە اۋداندىق ماڭىزى بار اۆتوموبيل جولدارىنىڭ ساپاسىن جاقسارتۋ، ەلدى مەكەندەر اراسىنداعى كولىك قاتىناسىن قامتاماسىز ەتۋ مىندەتتەرىنە توقتالدى.
اۋىل شارۋاشىلىعى سالاسىندا 2026-2028 جىلدارعا ارنالعان جول كارتاسى اياسىندا جالپى قۇنى 112،5 ملرد تەڭگەنى قۇرايتىن 19 ينۆەستيسيالىق جوبانى جۇزەگە اسىرۋ كوزدەلگەن. ايماق باسشىسى اۋىل شارۋاشىلىعى ونىمدەرىن تەرەڭ وڭدەۋدى دامىتۋ، جەرگىلىكتى شيكىزاتتى ءتيىمدى پايدالانۋ، سۋارمالى جەرلەردىڭ كولەمىن ۇلعايتۋ جانە سۋ ۇنەمدەۋ تەحنولوگيالارىن ەنگىزۋ قاجەتتىگىنە توقتالدى.
وڭىردە ينۆەستيسيا تارتۋ جۇمىسى جالعاسۋدا. بيىل توعىز ايدا وبلىس ەكونوميكاسىنا 417،7 ملرد تەڭگە ينۆەستيسيا تارتىلدى. ونىڭ 365،2 ملرد تەڭگەسى جەكە ينۆەستيسيالاردىڭ ۇلەسىنە تيەسىلى. جاقىندا وتكەن وڭىرلىك ۇيلەستىرۋ كەڭەسىندە جالپى قۇنى 19،2 ملرد تەڭگەنى قۇرايتىن، 443 جاڭا جۇمىس ورنىن اشۋدى كوزدەيتىن 12 ينۆەستيسيالىق جوبا ماقۇلداندى.
دەنساۋلىق ساقتاۋ سالاسىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا وڭىردە 65 العاشقى مەديسينالىق-سانيتاريالىق كومەك نىسانى سالىندى. اۋداندىق اۋرۋحانالاردىڭ ماتەريالدىق-تەحنيكالىق بازاسى نىعايتىلىپ، جاڭا مەديسينالىق بولىمشەلەر اشىلدى. وبلىستىڭ دەنساۋلىق ساقتاۋ ۇيىمدارىنا، اۋداندىق اۋرۋحانالارعا 100 جاڭا جەدەل جاردەم كولىكتەرى تابىستالىپ جاتىر.
جيىن قورىتىندىسىندا وبلىس اكىمى ورىنباسارلارىنا، باسقارما باسشىلارىنا، قالا جانە اۋدان اكىمدەرىنە پرەزيدەنت جولداۋىنداعى باسىمدىقتاردى ءوز سالالارى بويىنشا پىسىقتاپ، جوسپارلانعان جوبالاردىڭ ساپالى ءارى ۋاقتىلى ورىندالۋىن قامتاماسىز ەتۋدى تاپسىردى. ەكونوميكا جانە بيۋدجەتتىك جوسپارلاۋ باسقارماسىنا الەۋمەتتىك نىساندار مەن ينجەنەرلىك ينفراقۇرىلىمعا دەگەن قاجەتتىلىكتى تالداپ، باسىم جوبالاردىڭ ءتىزىمىن ازىرلەۋدى، جولاۋشىلار كولىگى جانە اۆتوموبيل جولدارى باسقارماسىنا جوندەۋدى قاجەت ەتەتىن جول ۋچاسكەلەرىن انىقتاپ، جۇمىس ساپاسىنا باقىلاۋدى كۇشەيتۋدى جۇكتەدى.
سونىمەن قاتار وتىرىستا اباي وبلىسى ارداگەرلەر كەڭەسىنىڭ ءتوراعاسى مۇراتقازى الين، وبلىستىق قوعامدىق كەڭەستىڭ ءتوراعاسى مەيرامحات اينابەكوۆ، قوعامدىق كەڭەس مۇشەسى نيكولاي يسايەۆ جانە قازاقستان حالىق كەڭەسىنىڭ مۇشەسى دۋمان ورىنبەكوۆ ءسوز سويلەدى.
