كوشپەلى قابىلداۋلار بارىسىندا بالالارعا ەرەكشە كوڭىل ءبولىندى. 40 بالاعا لوگوپەد-دەفەكتولوگ، پسيحولوگ، بەيىمدەلگەن دەنە شىنىقتىرۋ مامانى جانە پەدياتر كەڭەس بەردى. تەكسەرۋ قورىتىندىسى بويىنشا قازان ايىندا بەس بالاعا تەگىن وڭالتۋ شارالارى ۇيىمداستىرىلادى.

جالپى، 462 ادامعا مەديسينالىق كومەك كورسەتىلىپ، سونىڭ ىشىندە 389 ادامدى دارىگەر-ونكولوگتار قابىلدادى. بۇل رەتتە، ون ادام ونكولوگقا العاش رەت جۇگىنىپ وتىر. ەندى ولار قوسىمشا تەكسەرۋدەن ءوتۋ ءۇشىن وبلىس ورتالىعىنا جىبەرىلەدى.

سونىمەن قاتار 33 ادام ايتۆ ينفەكسياسىنىڭ الدىن الۋ بويىنشا كونسۋلتاسيادان ءوتتى.

«بەيىندى مامانداردىڭ اۋدانعا كەلۋى تۇرعىنداردىڭ كەڭەس الۋىن جانە دارىگەرگە جۇگىنۋ ءىسىن كەيىنگە قالدىرماۋىن ايتارلىقتاي جەڭىلدەتەدى. بىرنەشە مامانعا سۇراق قويۋ جانە بىردەن قاجەتتى ۇسىنىم الۋ مۇمكىندىگى بولعانى – اسا ماڭىزدى»، – دەدى كۇرشىم اۋدانىنىڭ تۇرعىنى ۆلاديمير پەتروۆ.

«ادىلەت كەرۋەنى» نەگىزگى باعىتتارىنىڭ ءبىرى – اۋرۋلاردىڭ الدىن الۋ جانە ولاردى ەرتە انىقتاۋ. كوشپەلى قابىلداۋلار بارىسىندا ماماندار تۇرعىندارعا دەنساۋلىقتىڭ قانداي وزگەرىستەرىنە ءمان بەرۋ جانە قاي كەزدە دارىگەرگە جۇگىنۋ قاجەت ەكەنىن دە تۇسىندىرۋدە.

«باستاپقى كەزەڭدە كوپ اۋرۋدىڭ ايقىن بەلگىلەر بولماۋى مۇمكىن. سوندىقتان پروفيلاكتيكالىق تەكسەرۋدەن ءوتۋ جانە مامانعا دەر كەزىندە جۇگىنۋ – اسا ماڭىزدى. كوشپەلى قابىلداۋلار بارىسىندا تۇرعىندارعا تەك كەڭەس بەرىپ قانا قويماي، دەنساۋلىقتىڭ قانداي وزگەرىستەرىنە نازار اۋدارۋ قاجەت ەكەنىن تۇسىندىرۋگە تىرىسامىز»،– دەدى دارىگەر-ونكولوگ ەربول قۇسايىنوۆ.

مەديسينالىق كونسۋلتاسيالاردان بولەك، تۇرعىندارعا زاڭگەرلەر مەن سوت ورىنداۋشىلارى قۇقىقتىق كومەك كورسەتتى. سونداي-اق ازاماتتار تۇرعىن ءۇي ماسەلەسى بويىنشا «وتباسى بانكى» ماماندارىنان كەڭەس الىپ، دەپۋتاتتاردىڭ قوعامدىق قابىلداۋ بولمەسىنە دە جۇگىندى.  

الداعى ۋاقىتتا «ادىلەت كەرۋەنىن» ەلىمىزدىڭ وزگە دا وڭىرلەرىندە وتكىزۋ جوسپارلانىپ وتىر. مۇنداي فورمات شالعاي ەلدى مەكەندەردىڭ تۇرعىندارىنا وبلىس ورتالىعىنا بارماي-اق قاجەتتى كومەك الۋعا مۇمكىندىك بەرەدى.

پارتيانىڭ قىزمەتى تۋرالى باسقا دا جاڭالىقتاردى رەسمي Telegram-ارنامىزدان وقي الاسىزدار: https://t.me/adilet_partiyasy