قازاقستان رەسپۋبليكاسىنىڭ قۇرىلتايىندا ونلاين-پلاتفورمالار مەن ماسس-مەديا ماسەلەلەرىنە قاتىستى زاڭ جوبالارى ءبىرىنشى وقىلىمدا قارالدى. ولاردىڭ نەگىزگى ەرەجەلەرىن مادەنيەت جانە اقپارات ءمينيسترى ارمان قىرىقبايەۆ تانىستىردى.
ءمينيستردىڭ ايتۋىنشا، مەديا كەڭىستىكتەگى جاڭا سىن-قاتەرلەر زاڭنامانى جەتىلدىرۋدى قاجەت ەتەدى. ۇسىنىلعان تۇزەتۋلەر ونلاين-پلاتفورمالاردىڭ جاۋاپكەرشىلىگىن ارتتىرۋعا، بالالاردىڭ ينتەرنەتتەگى قاۋىپسىزدىگىن قامتاماسىز ەتۋگە جانە ازاماتتاردىڭ قۇقىقتارىن قورعاۋعا باعىتتالعان.
زاڭ جوبالارىندا ونلاين-پلاتفورمالاردىڭ قازاقستاندا زاڭدى تۇلعا رەتىندە وكىلدىك اشۋى تۋرالى تالاپتى بەكىتۋ ۇسىنىلادى. قۇقىققا قايشى كونتەنتتى، سونىڭ ىشىندە بالالارعا قاتىستى كيبەربۋللينگ دەپ تانىلعان اقپاراتتى جويۋ جونىندەگى نۇسقامانى ورىنداماعانى ءۇشىن اكىمشىلىك جاۋاپتىلىق كوزدەلگەن. 2026 جىلدىڭ العاشقى ون ايىنداعى مونيتورينگ بارىسىندا قۇقىققا قايشى 128،5 مىڭ ماتەريال انىقتالىپ، ولاردىڭ شامامەن 70 پايىزى جويىلعان.
سونداي-اق پايدالانۋشىلاردى جانە بەس مىڭنان استام جازىلۋشىسى بار اشىق قاۋىمداستىقتاردى سايكەستەندىرۋ تەتىكتەرىن ەنگىزۋ ۇسىنىلادى.
بالالاردى قورعاۋعا ەرەكشە كوڭىل بولىنگەن. زاڭ جوبالارى 16 جاسقا تولماعان بالالاردىڭ ونلاين-پلاتفورمالارعا تىركەلۋىنە تىيىم سالۋدى جانە پلاتفورمالاردى پايدالانۋشىلاردىڭ جاسىن تەكسەرۋگە مىندەتتەۋدى كوزدەيدى. بۇل شەكتەۋ بالالاردىڭ اتا-اناسىمەن، جاقىندارىمەن جانە مۇعالىمدەرىمەن بايلانىسۋىنا ارنالعان مەسسەندجەرلەرگە قولدانىلمايدى.
اۋديوۆيزۋالدىق قىزمەتتەر سالاسىندا تەلە- جانە راديوارنالاردى ءتيىستى پلاتفورمالار ارقىلى تاراتۋدى ليسەنزيالاۋ، سونداي-اق ونلاين-كينوتەاترلاردى قازاقستانداعى زاڭدى وكىلىن بەلگىلەۋگە مىندەتتەۋ ۇسىنىلادى.
ازاماتتاردىڭ ار-نامىسىن، قادىر-قاسيەتىن جانە ىسكەرلىك بەدەلىن قورعاۋ ءۇشىن نۇقسان كەلتىرەتىن مالىمەت قاي جەردە جاريالانسا، ونى سول دەرەككوزدە، ونىڭ ىشىندە الەۋمەتتىك جەلىدە تەرىسكە شىعارۋ كوزدەلگەن. بۇعان قوسا، ونلاين-پلاتفورمالاردا جالا جاپقانى، ال ماسس-مەديا مەن پلاتفورمالاردا بىلاپىت ءسوز قولدانعانى ءۇشىن اكىمشىلىك جاۋاپتىلىق ەنگىزۋ جانە ادامنىڭ بەينەسىن كەلىسىمىنسىز پايدالانۋ شارتتارىن ناقتىلاۋ ۇسىنىلادى.
تۇزەتۋلەردە مەملەكەتتىك ورگانداردىڭ رەسمي جاۋاپتارىن بۇقارالىق اقپارات قۇرالدارىندا جاريالاعاندا ارنايى بەلگىلەۋ، سونداي-اق ءبىلىم بەرۋ كۋرستارى مەن وككۋلتتىك قىزمەتتەر تۋرالى اقپاراتتىڭ اشىقتىعىن ارتتىرۋ قاراستىرىلعان.
ۇسىنىلعان نورمالار مەملەكەت پەن ونلاين-پلاتفورمالار اراسىنداعى ءوزارا ءىس-قيمىلدى جاقسارتىپ، اقپارات كەڭىستىگىندە ازاماتتاردىڭ قۇقىقتارىن قورعاۋ كەپىلدىكتەرىن كۇشەيتۋگە باعىتتالعان. زاڭ جوبالارىن ىسكە اسىرۋ رەسپۋبليكالىق بيۋدجەتتەن قوسىمشا شىعىندى تالاپ ەتپەيدى.
ق ر مادەنيەت جانە اقپارات مينيسترلىگىنىڭ باسپا ءسوز قىزمەتى