الماتىدا VI رەسپۋبليكالىق «100 ولەڭ» كوركەمسوز وقۋ بايقاۋىنىڭ قورىتىندىسى شىعارىلدى. بيىل ەلىمىزدىڭ ءار وڭىرىنەن 3000-نان استام ادام قاتىسقان بايقاۋدا 35 قاتىسۋشى فينالعا جولداما الدى.

سولاردىڭ اراسىنان ۇزدىك شىققان استانا قالاسىنداعى №107 جالپى ورتا ءبىلىم بەرەتىن مەكتەپتىڭ ديرەكتورى ايگۇل بازارباي قىزى باس جۇلدەگە يە بولدى. جەڭىمپازعا اۆتوكولىك تابىستالدى.

ايگۇل بازارباي قىزى بايقاۋدىڭ نەگىزگى تالابىن ورىنداۋ ءۇشىن 100 كۇن ىشىندە قازاق اقىندارىنىڭ 100 ولەڭىن جاتتاپ، فينالدىق كەزەڭدە شىعارمالاردى كوركەمسوز شەبەرلىگىمەن ورىندادى. ول — پەداگوگ-شەبەر، ىبىراي التىنسارين توسبەلگىسىنىڭ يەگەرى.

بايقاۋدىڭ بيىلعى ەرەكشەلىگى — فينالعا ءتۇرلى ماماندىق يەلەرىنىڭ شىعۋى. ولاردىڭ قاتارىندا فيزيك، ماتەماتيك، گەوگراف، مەتاللۋرگ، اقىن، فيلولوگ، ايتىسكەر، مۇعالىمدەر، ستۋدەنتتەر مەن مەكتەپ وقۋشىلارى بولدى.

ال باس جۇلدە يەگەرىنە قاتىستى تاعى ءبىر قىزىقتى جايت بار. ايگۇل بازارباي قىزىنىڭ جۇرگىزۋشى كۋالىگى جوق. ياعني، 100 ولەڭدى جاتتاپ، باس جۇلدە رەتىندە اۆتوكولىك ۇتىپ العانىمەن، ازىرگە كولىكتى ءوزى جۇرگىزە المايدى.

بايقاۋدا II ورىندى 10 جاسار سەيتقازى رايانا نۇرجان قىزى يەلەندى. ال III ورىن استانا قالاسىنىڭ وكىلدەرى تىلەۋجان ەرعانات ۇلى مەن ايدوس بەكتۇرسىنعا بۇيىردى.

التىنشى رەت ۇيىمداستىرىلعان «100 ولەڭ» بايقاۋى قازاق پوەزياسىن دارىپتەپ، ۇلتتىق ءسوز ونەرىنە دەگەن قىزىعۋشىلىقتى ارتتىرۋدى ماقسات ەتەدى. جوبا جىل سايىن ولەڭدى جاتقا وقۋ ءداستۇرىن جاڭعىرتىپ، ادەبيەتكە ءارتۇرلى جاستاعى جانە ءتۇرلى ماماندىقتاعى ادامداردى تارتىپ كەلەدى.